ನನ್ನ ಹೆಸರು ಲಿಲ್‌ – ಕ್ಯಾರನ್‌; ನಾನು ನಾರ್ವೇಯ ಓರ್ವ ನಿವೃತ್ತ ಶಾಲಾ ಶಿಕ್ಷಕಿ, 66 ವರ್ಷ ವಯಸ್ಸಿನಾಕೆ. ಮೂವರು ಮಕ್ಕಳು ಮತ್ತು ಐವರು ಮೊಮ್ಮಕ್ಕಳು ನನಗಿದ್ದಾರೆ. ನನ್ನ ಪತಿ ಮರಣಿಸಿದ ಬಳಿಕ ನಾನು ಏಕಾಂಗಿಯಾಗಿ ವಾಸಿಸುತ್ತಿದ್ದೇನೆ, ಓದು, ಹೆಣಿಗೆ, ಹೊಲಿಗೆ, ಕವಿತೆಗಳನ್ನು ಬರೆಯುವುದು ಮತ್ತು ಪ್ರವಾಸಗಳಲ್ಲಿ ನನ್ನ ಸಮಯ ಕಳೆಯುತ್ತದೆ. ನಾನು ಹಲವಾರು ಬಾರಿ ಭಾರತಕ್ಕೆ ಬಂದಿದ್ದೆನಾದರೂ ಕೇರಳಕ್ಕೆ ಭೇಟಿ ನೀಡಿರಲಿಲ್ಲ. ಹೀಗಾಗಿ 2010ರಲ್ಲಿ ನಾನು ಕೇರಳ ಪ್ರವಾಸ ಹಾಕಿಕೊಂಡೆ ಮತ್ತು ಸ್ಥಳೀಯ ಕುಟುಂಬವೊಂದರ ಜತೆಗೆ ವಾಸ್ತವ್ಯಕ್ಕೆ ಅನುಕೂಲ ಕಲ್ಪಿಸಿಕೊಂಡೆ. ಆದರೆ ದುರದೃಷ್ಟ ಬಹಳ ಬೇಗನೆ ನನ್ನನ್ನು ಮುತ್ತಿಕೊಂಡಿತು. ನನ್ನ ಆತಿಥ್ಯ ವಹಿಸಿಕೊಂಡಿದ್ದ ವ್ಯಕ್ತಿ ನನ್ನನ್ನು ವಿಮಾನನಿಲ್ದಾಣದಿಂದ ಕರೆದೊಯ್ದರಾದರೂ, ನಾವು ನಗರ ಸೇರುವುದಕ್ಕೆ ಮುನ್ನ ಅವರ ಕಾರು ಲಾರಿಯೊಂದಕ್ಕೆ ಢಿಕ್ಕಿ ಹೊಡೆಯಿತು.
ನನ್ನ ಕಾಲು ತೀವ್ರವಾಗಿ ಜಖಂಗೊಂಡು ಮುರಿದಿತ್ತು, ಆ್ಯಂಬ್ಯುಲೆನ್ಸ್‌ನಲ್ಲಿ ಮಲಗಿ ನಾನು ಆಸ್ಪತ್ರೆ ತಲುಪಿದೆ. ಆಸ್ಪತ್ರೆ ಸೇರಿದ ಬಳಿಕ ಪ್ಲಾಸ್ಟಿಕ್‌ ಹಾಸಿಗೆಯ ಮೇಲೆ, ಸುತ್ತಲೂ ರೋಗಿಗಳು ಕಿಕ್ಕಿರಿದಿದ್ದ ಕೊಠಡಿಯಲ್ಲಿ ಎರಡು ದಿನಗಳನ್ನು ಕಳೆದೆ. ದಿನಕ್ಕೆ ಒಂದು ಬಾರಿ ಒಂದು ಬೋಗುಣಿ ನೀರನ್ನು ನನಗೆ ನೀಡುತ್ತಿದ್ದರು; ಆದರೆ ಕಾಲು ಮುರಿದಿತ್ತಾದ್ದರಿಂದ ಶೌಚಕ್ಕೆ ತೆರಳಲು ಅಥವಾ ಬಟ್ಟೆ ಬದಲಾಯಿಸಿಕೊಳ್ಳಲು ನನಗೆ ಸಾಧ್ಯವಿರಲಿಲ್ಲ. ಆದ್ದರಿಂದ ಸೆಖೆಯ ಕೊಠಡಿಯಲ್ಲಿ ನಾನು ಮಲಗಿಯೇ ಇದ್ದೆ.
Advertisement
ಕೊನೆಗೊಮ್ಮೆ ನಾನು ಖಾಸಗಿ ಕೊಠಡಿಗೆ ವರ್ಗಾಯಿಸಲ್ಪಟ್ಟೆ ಮತ್ತು ಪೃಷ್ಠ ಬದಲಾವಣೆ ಶಸ್ತ್ರಕ್ರಿಯೆಯನ್ನು ನನಗೆ ನಡೆಸಲಾಯಿತು. ಭಾರತದಲ್ಲಿ ರೋಗಿಯನ್ನು ಅವರ ಕುಟುಂಬವೇ ನೋಡಿಕೊಳ್ಳಬೇಕು; ಹೀಗಾಗಿ ವೈದ್ಯರು ಅಥವಾ ದಾದಿಯರ ಗಮನ ನನ್ನತ್ತ ಹೆಚ್ಚೇನೂ ಇರಲಿಲ್ಲ. ನನ್ನ ಆತಿಥ್ಯ ವಹಿಸಿಕೊಂಡಿದ್ದವರ ಜತೆಯನ್ನು ಬಿಟ್ಟರೆ ಅವು ತೀವ್ರ ಏಕಾಂಗಿತನದ ದಿನಗಳು; ಕೊನೆಗೂ ನನಗೆ ಮನೆಗೆ ತೆರಳಲು ಅನುಮತಿ ಸಿಕ್ಕಿತು.
Related Articles
Advertisement
– ಮುಂದಿನ ವಾರಕ್ಕೆ
– ಡಾ| ವಂದನಾ ಕೆ. ಇ.ಪ್ರೊಫೆಸರ್‌ ಆಫ್ ಮೈಕ್ರೊಬಯಾಲಜಿ
ಡಾ| ಟಿ.ಎಂ.ಎ.ಪೈ ಆ್ಯಂಟಿ ಮೈಕ್ರೋಬಿಯಲ್‌ ಸ್ಟೀವರ್ಡ್‌ಶಿಪ್‌ ದತ್ತಿಪೀಠ, ಕಸ್ತೂರ್ಬಾ ವೈದ್ಯಕೀಯ ಕಾಲೇಜು, ಮಣಿಪಾಲ ವಿಶ್ವವಿದ್ಯಾನಿಲಯ, ಮಣಿಪಾಲ.