ಇತಿಹಾಸ ನಿರ್ಮಿಸಿದ ಅನ್ಮೋಲ್‌

ವಾಷಿಂಗ್ಟನ್‌: ಭಾರತ ಮೂಲದ ಸೆಕೆಂಡ್‌ ಲೆಫ್ಟಿನಂಟ್‌ ಅನ್ಮೋಲ್‌ ನಾರಂಗ್‌, ಪ್ರತಿಷ್ಠಿತ ವೆಸ್ಟ್‌ ಪಾಯಿಂಟ್‌ ಯುನೈಟೆಡ್‌ ಸ್ಟೇಟ್ಸ್‌ ಮಿಲಿಟರಿ ಅಕಾಡೆಮಿಯಿಂದ ಪದವಿ ಪಡೆದಿದ್ದಾರೆ. ಅಷ್ಟೇ ಅಲ್ಲ, ಈ ಪದವಿ ಪಡೆದ ಮೊದಲ ಖಟ್ಟರ್‌ ಸಿಖ್‌ ಮಹಿಳೆ ಎಂಬ ಹೆಗ್ಗಳಿಕೆಗೆ ಪಾತ್ರರಾಗುವ ಮೂಲಕ ಇತಿಹಾಸ ನಿರ್ಮಿಸಿದ್ದಾರೆ.

ವೆಸ್ಟ್‌ ಪಾಯಿಂಟ್‌ ಮಿಲಿಟರಿ ಅಕಾಡೆಮಿಯಲ್ಲಿ ಶನಿವಾರ ನಡೆದ 2020ನೇ ಸಾಲಿನ ಸಮಾರಂಭದಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌, ಅನ್ಮೋಲ್‌ ಅವರಿಗೆ ಪ್ರತಿಷ್ಠಿತ ಪದವಿ ಪ್ರದಾನ ಮಾಡಿದರು. ಈ ವೇಳೆ ಮಾತನಾಡಿದ ನಾರಂಗ್‌, “”ವೆಸ್ಟ್‌ ಪಾಯಿಂಟ್‌ನಿಂದ ಪದವಿ ಪಡೆಯಬೇಕೆಂಬ ನನ್ನ ಕನಸು ನನಸಾದ ದಿನವಿದು. ಜಾರ್ಜಿಯಾದಲ್ಲಿರುವ ನನ್ನ ಕುಟುಂಬ ಹಾಗೂ ನನ್ನ ಸಮುದಾಯ ನೀಡಿದ ಸಹಕಾರದಿಂದ ಈ ಸಾಧನೆ ಸಾಧ್ಯವಾಗಿದೆ” ಎಂದರು.