ನಾನು ನಟನಾಗಿ ಬೆಳೆದದ್ದು ಹೀಗೆ : ಅನಿಲ್‌ ಕಪೂರ್

ಪಣಜಿ: ಒಬ್ಬ ನಟ ಬೆಳೆಯುತ್ತಾ ಹೋಗುವುದು ಹೇಗೆ? ಈ ಪ್ರಶ್ನೆಗೆ ಹಿಂದಿಯ ಶ್ರೇಷ್ಠ ನಟ ಅನಿಲ್‌ ಕಪೂರ್‌ ಕೊಟ್ಟ ಉತ್ತರ ಬಹಳ ಸರಳ.
‘ನಾವು ಪಾತ್ರವಾಗುತ್ತಾ ಹೋಗಬೇಕು, ನಟನಾಗಲ್ಲ‘. ಭಾರತೀಯ ಅಂತಾರಾಷ್ಟ್ರೀಯ ಚಿತ್ರೋತ್ಸವದ ಇಫಿ] ಭಾಗವಾಗಿ ಶುಕ್ರವಾರ ನಡೆದ ‘ನಿರ್ದೇಶಕ ಮತ್ತು ನಟ‘ ನ ನಡುವಿನ ಸಂವಾದದಲ್ಲಿ ಸಭಿಕರೊಬ್ಬರ ಪ್ರಶ್ನೆಗೆ ಉತ್ತರಿಸಿದ್ದು ಅನಿಲ್‌ ಕಪೂರ್.

ಸಭಿಕರೊಬ್ಬರ ಪ್ರಶ್ನೆ: ಇಂದಿಗೂ ನೀವು ಒಬ್ಬ ಒಳ್ಳೆಯ ನಟನಾಗಿರುವುದು ಹೇಗೆ?
ಉತ್ತರ ಅನಿಲ್‌ ಕಪೂರ್‌ರದ್ದು:  ನಾನು ನಟನೆಗೆ ಬಂದಾಗ ನನ್ನೊಂದಿಗೆ ಕಪೂರ್‌ ಎಂಬ ಸರ್‌ ನೇಮ್‌ ನ ಬ್ಯಾಗೇಜ್‌ ಘಹೊರೆ] ಇತ್ತು ಇದರರ್ಥ ರಾಜ್‌ಕಪೂರ್‌. ಶಮ್ಮಿಕಪೂರ್‌ ಶ್ರೇಷ್ಠ ನಟರ ಸರ್‌ ನೇಮ್‌]. ನಾನು ಮೊದಲು ಕಳಚಿಕೊಂಡಿದ್ದು ಅದನ್ನು. ಪ್ರಜ್ಣಾಪೂರ್ವಕವಾಗಿ ಅದರಿಂದ ದೂರ ಉಳಿಯುತ್ತಾ ಬಂದೆ, ಅಂದರೆ ನಾನು ಆ ಹೊರೆಯಿಂದ ದೂರ ಉಳಿದುಕೊಂಡು ಎಲ್ಲರೊಂದಿಗೆ ದುಡಿದೆ. ಹಾಗಾಗಿ ಎಂ.ಎಸ್‌. ಸತ್ಯು ಅವರ ಬಳಿ ಹೋದೆ, ಕೆಲಸ ಮಾಡಿದೆ. ಆಮೇಲೆ ಮಣಿರತ್ನಂ, ವಿಶ್ವನಾಥ್‌, ಬಾಪು.. ಹೀಗೆ ಅವಕಾಶ ಕೊಟ್ಟದ್ದನ್ನೆಲ್ಲಾ ಒಪ್ಪಿಕೊಂಡು, ಅದರಲ್ಲಿ ನಟನಾಗುವುದಕ್ಕಿಂತ ಆ ಪಾತ್ರವಾಗುವುದನ್ನು ಕಲಿತೆ. ಇದು ನಾನು ನನ್ನ ಹೊರೆಯನ್ನು ಇಳಿಸಿಕೊಳ್ಳಲು ಮಾಡಿದ ಪ್ರಯತ್ನ.

ಈ ಪ್ರಯತ್ನ ನನ್ನನ್ನು ಒಬ್ಬ ನಟನಾಗಿಸಿತು. ಯಾವುದೇ ಪಾತ್ರದೊಳಗೆ ಇಳಿದು ಆ ಪಾತ್ರವಾಗಿಬಿಡಬಲ್ಲ ನನ್ನೊಳಗಿನ ಸಾಧ್ಯತೆಯನ್ನು ಹೆಚ್ಚಿಸಿತು. ಒಂದಿಷ್ಟು ವರ್ಷ ಹಾಗೆಯೇ ಮಾಡಿದೆ. ಬಳಿಕ ಕೆಲವು ವರ್ಷ ನಟನಾಗಬೇಕೆನಿಸಿತು. ಆಗಲೂ ಅದನ್ನು ನಿಭಾಯಿಸಿದೆ. ಈಗ ಮತ್ತೆ ಪಾತ್ರಗಳಾಗುತ್ತಿದ್ದೇನೆ. ಇಂಥದೊಂದು ಹೊರೆ ಬೇರೆ ಬೇರೆ ರೂಪದಲ್ಲಿ ಎಲ್ಲರಿಗೂ ಇರುತ್ತದೆ. ಅದರಿಂದ ಬಿಡುಗಡೆಯಾಗದ ಹೊರತು ನಾವು ಉತ್ತಮ ನಟನಾಗಲು ಸಾಧ್ಯವಿಲ್ಲ.