ಮಾನವೀಯತೆ ಮೆರೆದ ಪೊಲೀಸ್ ಕಾನ್ಸ್ ಟೇಬಲ್!

ತಮಿಳುನಾಡು : ಪೊಲೀಸರು ಅಂದ್ರೆ, ಅವರು ಯಾವಾಗಲೂ ಜನರನ್ನು ಹೊಡೆಯುತ್ತಾರೆ, ಹೆದರಿಸುತ್ತಾರೆ, ಭಯ ಪಡಿಸುತ್ತಾರೆ ಎಂಬ ಕಲ್ಪನೆ ಬಹಳ ಜನರಿಗೆ ಇದೆ. ಆದ್ರೆ ಎಲ್ಲಾ ಪೊಲೀಸರು ಈ ರೀತಿ  ಮಾಡುವುದಿಲ್ಲ ಎಂಬುದಕ್ಕೆ ನಿನ್ನೆ(ಏ.6) ತಮಿಳುನಾಡು ವಿಧಾನ ಸಭಾ ಚುನಾವಣೆಯಲ್ಲಿ ನಡೆದಿರುವ ಈ ಘಟನೆಯೇ ಸಾಕ್ಷಿ.

ತಾಯಿಯೊಬ್ಬರು ಮತದಾನ ಮಾಡಲು ಹೋದ ವೇಳೆ ತನ್ನ ಒಂದು ತಿಂಗಳ ಮಗುವನ್ನು ಪೊಲೀಸರ ಕೈಗೆ ಕೊಟ್ಟು ಹೋಗಿದ್ದಾರೆ. ಆ ವೇಳೆ ಆ ಹಸುಗೂಸನ್ನು ಪೊಲೀಸ್ ಪೇದೆ ಜೋಪಾನವಾಗಿ ನೋಡಿಕೊಂಡಿದ್ದಾರೆ. ಪೊಲೀಸ್ ಮಗುವನ್ನು ಹಿಡಿದುಕೊಂಡಿರುವ ಫೋಟೋ ಸಾಮಾಜಿಕ ಜಾಲತಾಣದಲ್ಲಿ ಮೆಚ್ಚುಗೆಗೆ ಪಾತ್ರವಾಗುತ್ತಿದೆ.

ಈ ಫೋಟೋವನ್ನು ಆಂಧ್ರ ಪ್ರದೇಶ ಪೊಲೀಸ್ ಟ್ವಿಟ್ಟರ್ ಖಾತೆಯಿಂದ ಪೋಸ್ಟ್ ಮಾಡಲಾಗಿದೆ. ಪೊಲೀಸ್ ಕೂಡ ಆಂ‍ಧ್ರ ಪ್ರದೇಶದ ಮೂಲದವರೆಂದು ಹೇಳಲಾಗಿದ್ದು, ಪೊಲೀಸರ ಈ ಮಾನವೀಯ ಕಾರ್ಯ ಭಾರೀ ಮೆಚ್ಚುಗೆಗೆ ಪಾತ್ರವಾಗಿದೆ.

ಇನ್ನು ನಿನ್ನೆ ತಮಿಳುನಾಡು ವಿಧಾನಸಭಾ ಚುನಾವಣೆ ನಡೆದಿದೆ. ಈಗಾಗಲೇ ಐದು ರಾಜ್ಯಗಳಲ್ಲಿ ಚುನಾವಣೆ ನಡೆದಿದ್ದು, ಅಸ್ಸಾ, ಕೇರಳ, ಪಶ್ಚಿಮ ಬಂಗಾಳ, ಪಾಂಡಿಚರಿ, ತಮಿಳುನಾಡಿನಲ್ಲಿ ಮತದಾನ ನಡೆದಿದೆ.