ಅಂಬರೀಷ್‌ ಅವರಿಗೆ ತಮ್ಮ ಮಗ ಅಭಿಷೇಕ್‌ ರಾಜಕೀಯಕ್ಕೆ ಬರೋದು ಒಂಚೂರು ಇಷ್ಟವಿರಲಿಲ್ಲ. “ರಾಜಕೀಯಕ್ಕೆ ನಮಗೇ ಸಾಕು, ಅವನಿಗೆ ಬೇಡ’ ಎಂದು ಆಗಾಗ ಹೇಳುತ್ತಿದ್ದರು. ಅವರ ಮಗನಿಗೂ ಸಿನಿಮಾ ಆಸಕ್ತಿ ಇರುವುದರಿಂದ ಮುಂದೆ ಆತ ದೊಡ್ಡ ನಟನಾಗಬೇಕೆಂದು ಕನಸು ಕಂಡಿದ್ದರು ಅಂಬರೀಷ್‌. ಅಭಿಷೇಕ್‌ ನಾಯಕನಾಗಿ ಲಾಂಚ್‌ ಆಗಲು ವೇದಿಕೆ ಸಿದ್ಧವಾದ ಸಂದರ್ಭದಲ್ಲಿ ಮಗನ ಕಥೆ ಕೇಳಿ ಓಕೆ ಮಾಡಿದ್ದು ಕೂಡಾ ಅಂಬರೀಷ್‌.
ಮುಂದೆಯೂ ಆತನ ಕಥೆಯ ಆಯ್ಕೆ ನಂದೇ ಎಂದಿದ್ದ ಅಂಬಿಗೆ ತಮ್ಮ ಮಗನ ಚೊಚ್ಚಲ ಸಿನಿಮಾವನ್ನು ಚಿತ್ರಮಂದಿರದಲ್ಲಿ ಕಣ್ತುಂಬಿಕೊಳ್ಳುವ ಆಸೆ ಇತ್ತು. ಆದರೆ ಆ ಸಿನಿಮಾವನ್ನು ನೋಡುವ ಮುನ್ನವೇ ಅಂಬಿ ಇಹಲೋಕ ತ್ಯಜಿದ್ದಾರೆ. ಆದರೆ, ಪುತ್ರ ಅಭಿಷೇಕ್‌ ನಟನೆಯ “ಅಮರ್‌’ ಸಿನಿಮಾದ ಫ‌ಸ್ಟ್‌ಹಾಫ್ ಅನ್ನು ಅಂಬರೀಷ್‌ ನೋಡಿ, ಖುಷಿಪಟ್ಟಿದ್ದರು ಎಂಬುದು ಅನೇಕರಿಗೆ ಗೊತ್ತಿರಲಿಕ್ಕಿಲ್ಲ.
ಈ ವಿಚಾರವನ್ನು ಅಂಬರೀಷ್‌ ಅವರ ಆಪ್ತ ಸ್ನೇಹಿತ, “ಅಮರ್‌’ ಚಿತ್ರದ ನಿರ್ಮಾಪಕ ಸಂದೇಶ್‌ ನಾಗರಾಜ್‌ ಹೇಳಿಕೊಂಡಿದ್ದಾರೆ. “ಅಂಬಿಗೆ ಮಗ ಕನ್ನಡ ಚಿತ್ರರಂಗದಲ್ಲಿ ದೊಡ್ಡ ಹೀರೋ ಆಗಬೇಕು, ದೊಡ್ಡ ಮಟ್ಟದಲ್ಲಿ ಬೆಳೆಯಬೇಕೆಂಬ ಕನಸು ಕಂಡಿದ್ದ. ಅದರಂತೆ ಆತನ ಮಗನ ಮೊದಲ ಸಿನಿಮಾವನ್ನು ನಿರ್ಮಿಸುವ ಅವಕಾಶ ನನಗೆ ಸಿಕ್ಕಿತ್ತು. ಈಗಾಗಲೇ ಚಿತ್ರದ ಬಹುತೇಕ ಭಾಗದ ಚಿತ್ರೀಕರಣ ಕೂಡಾ ಮುಗಿದಿದೆ. ಅಂಬಿಗೆ ಮಗ ಏನು ಮಾಡಿದ್ದಾನೆಂಬುದುನ್ನು ನೋಡುವ ಆಸೆಯಾಗಿದೆ.
ಅದೊಂದು ದಿನ “ಅಮರ್‌’ ಏನು ಶೂಟಿಂಗ್‌ ಆಗಿದೆ ಅದನ್ನು ನೋಡಲೇಬೇಕೆಂದ. ನಾನು, “ಈಗಲೇ ಬೇಡ, ಇನ್ನೆ°àನು ಕೆಲವು ದಿನ ಶೂಟಿಂಗ್‌ ಆದರೆ ಸಿನಿಮಾನೇ ನೋಡಬಹುದಲ್ವಾ’ ಎಂದೆ. ಆದರೆ, ಅಂಬಿ “ಇಲ್ಲ ನನಗೆ ನೋಡಲೇಬೇಕು’ ಎಂದ. ಕೊನೆಗೆ ಡಬ್ಬಿಂಗ್‌ ಮಾಡಿಸಿ “ಅಮರ್‌’ ಸಿನಿಮಾದ ಫ‌ಸ್ಟ್‌ಹಾಫ್ ನೋಡಿದ. ಸಿನಿಮಾ ನೋಡಿ ಖುಷಿಯಾದ ಅಂಬಿ, ಮಗನ ಕರೆದು “ತುಂಬಾ ಚೆನ್ನಾಗಿ ನಟಿಸಿದ್ದೀಯಾ, ಏನು ಹೆದರಬೇಡ’ ಎಂದು ಬೆನ್ನುತಟ್ಟಿದ್ದರು’ ಎನ್ನುತ್ತಾ “ಅಮರ್‌’ ಸಿನಿಮಾದ ಮೊದಲರ್ಧ ನೋಡಿದ ಬಗ್ಗೆ ಹೇಳುತ್ತಾರೆ ಹಿರಿಯ ನಿರ್ಮಾಪಕ, ಅಂಬರೀಷ್‌ ಆಪ್ತ ಸಂದೇಶ್‌ ನಾಗರಾಜ್‌.
