50,000 ಕೆಲಸಗಾರರು ಬೇಕು: ಅಮೆಜಾನ್‌!

ಬೆಂಗಳೂರು: ಒಂದು ಕಡೆ ಬಹುತೇಕ ಕಂಪನಿಗಳು ಉದ್ಯೋಗಿಗಳನ್ನು ಕೆಲಸದಿಂದ ಕಿತ್ತು ಹಾಕಲು ಆದ್ಯತೆ ನೀಡಿದ್ದರೆ, ಅಲ್ಲಲ್ಲಿ ಸಂಭ್ರಮದ ಸುದ್ದಿಗಳೂ ಕೇಳಿ ಬರುತ್ತಿವೆ. ಇದೀಗ ಅಂತಹ ಸಂಭ್ರಮದ ಸುದ್ದಿಯನ್ನು ನೀಡಿರುವುದು, ಭಾರತದ ದೈತ್ಯ ಅಂತರ್ಜಾಲ ಆಧಾರಿತ ಮಾರಾಟ ಸಂಸ್ಥೆ ಅಮೆಜಾನ್‌. ಇಡೀ ದೇಶದಲ್ಲಿ ಮನೆಗಳಿಗೆ ವಸ್ತುಗಳನ್ನು ತಲುಪಿಸಲು ವಿವಿಧ ಹಂತದಲ್ಲಿ ತನಗೆ 50,000 ಉದ್ಯೋಗಿಗಳು ಬೇಕಾಗಿದ್ದಾರೆ ಎಂದು ಅದು ಪ್ರಕಟಿಸಿದೆ. ವಸ್ತುಗಳನ್ನು ಮನೆಗೆ ತಲುಪಿಸುವವರು, ಕಚೇರಿ ಕೆಲಸಗಾರರು, ಅರೆಕಾಲಿಕ ಕೆಲಸಗಾರರೂ ಸಂಸ್ಥೆಗೆ ಬೇಕಾಗಿದ್ದಾರೆ.

ಕೋವಿಡ್ ಇರುವುದರಿಂದ ಜನರು ಅಂತರ ಪಾಲಿಸಲು ಬಯಸುತ್ತಾರೆ, ಅದಕ್ಕೆ ಪೂರಕವಾಗಿ ಕೆಲಸ ಮಾಡಲು ನಮಗೆ ಜನ ಬೇಕು ಎಂದು ಅಮೆಜಾನ್‌ ತಿಳಿಸಿದೆ. ಅಮೆಜಾನ್‌ ಇಂತಹ ಸುದ್ದಿ ನೀಡಿರುವ ಆಸುಪಾಸಲ್ಲೇ, ಸ್ವಿಗ್ಗಿ,  ಜೊಮ್ಯಾಟೊ, ಉಬೆರ್‌, ಓಲಾ, ಶೇರ್‌ಚ್ಯಾಟ್‌, ವೀವರ್ಕ್‌ನಂತಹ ಸಂಸ್ಥೆಗಳು ಸಾವಿರಾರು ಉದ್ಯೋಗಿಗಳನ್ನು ಒಂದೇ ಏಟಿಗೆ ಮನೆಗೆ ಕಳುಹಿಸಿದ್ದನ್ನು ಇಲ್ಲಿ ನೆನಪಿಸಿಕೊಳ್ಳಬಹುದು