JDS: ಮೈತ್ರಿ ನಿರ್ಧಾರ ನನ್ನದೇ- ಮಾಜಿ ಪ್ರಧಾನಿ ದೇವೇಗೌಡರ ಸ್ಪಷ್ಟ ಮಾತು

ಬೆಂಗಳೂರು: ಪ್ರಾದೇಶಿಕ ಪಕ್ಷವನ್ನು ಉಳಿಸಲೇಬೇಕೆಂಬ ಕಾರಣ ದಿಂದ ನಾನೇ ಬಿಜೆಪಿ ಜತೆ ಹೋಗುವ ನಿರ್ಣಯ ತೆಗೆದುಕೊಂಡೆ ಎಂದು ಮಾಜಿ ಪ್ರಧಾನಿ ಎಚ್‌.ಡಿ.ದೇವೇಗೌಡರು ಹೇಳಿದ್ದಾರೆ.

ಪಕ್ಷದ ಕಚೇರಿಯಲ್ಲಿ ಬುಧವಾರ ಪತ್ರಿಕಾಗೋಷ್ಠಿ ನಡೆಸಿದ ಅವರು, ಜಾತ್ಯತೀತ ಅಸ್ತಿತ್ವವನ್ನು ಕೆಳಗೆ ಹಾಕುವ ರಾಜ ಕಾರಣವನ್ನು ನಾನೆಂದೂ ಮಾಡಿಲ್ಲ. ಮುಂದೆ ಮಾಡುವುದೂ ಇಲ್ಲ ಎಂದು ಖಡಾಖಂಡಿತವಾಗಿ ಹೇಳುತ್ತೇನೆ. ಹಾಗೆಯೇ, ಬಿಜೆಪಿ ಜತೆಗೆಮೈತ್ರಿ ಮಾಡಿಕೊಂಡಿದ್ದೇವೆ ಎಂದ ಮಾತ್ರಕ್ಕೆ ಜಾತ್ಯತೀತ ಅಸ್ತಿತ್ವವನ್ನು ಬಿಟ್ಟಿದ್ದೇವೆ ಎಂದಲ್ಲ. ಬಿಜೆಪಿ ಜತೆಗೆ ಮೈತ್ರಿ ಮಾಡಿಕೊಂಡಿರುವುದಕ್ಕೆ ಅಲ್ಪಸಂಖ್ಯಾಕರು ಪಕ್ಷ ಬಿಡುತ್ತಾರೆ ಎಂಬುದು ಸುಳ್ಳು.  ಅವರೆಲ್ಲರೂ ಪಕ್ಷದೊಂದಿಗೆ  ಇರುತ್ತಾರೆ ಎಂದರು.

ಕಾಂಗ್ರೆಸ್‌ ಸಹವಾಸ ಬೇಡ ಎಂದು ಹೇಳಿದ್ದೆ

ರಾಜ್ಯದಲ್ಲಿ ಕುಮಾರ ಸ್ವಾಮಿ  ಸರಕಾರ ತೆಗೆದವರು ಯಾರು? 17  ಶಾಸಕರನ್ನು ಮುಂಬಯಿಗೆ ಕಳುಹಿಸಿ ಕೊಟ್ಟಿದ್ದು ಯಾರು? ಬಿಜೆಪಿ ಸರಕಾರ ರಚಿಸಲು ಅವಕಾಶ ಮಾಡಿ ಕೊಟ್ಟಿದ್ದು ಯಾರು ಎಂಬೆಲ್ಲ ವಿಷಯಗಳ ಚರ್ಚಿಸೋಣ.   ನಿಮ್ಮ ಸಹವಾಸ ಬೇಡ ಎಂದು ಎಷ್ಟು ಒತ್ತಾಯ ಮಾಡಿದ್ದೆ ಎಂಬುದು ಗೊತ್ತಿಲ್ಲವೇ ಎಂದು ದೇವೇಗೌಡರು ಕಾಂಗ್ರೆಸ್ಸನ್ನು ಪ್ರಶ್ನಿಸಿದರು.