RSS: “ಎಲ್ಲ ಹಿಂದೂಗಳು ಸೇರಿ ಜಗತ್ತಿನ ಹೃದಯ ಗೆಲ್ಲಿರಿ” ಮೋಹನ್‌ ಭಾಗವತ್‌

ಬ್ಯಾಂಕಾಕ್‌: ಪ್ರಪಂಚದಲ್ಲಿರುವ ಎಲ್ಲ ಹಿಂದೂಗಳೂ ಪರಸ್ಪರ ಸಂಪರ್ಕ ಸಾಧಿಸಬೇಕು. ಆಗ ವಿಶ್ವವನ್ನು ಒಗ್ಗೂಡಿಸಿ, ಜನರನ್ನು ಒಗ್ಗೂಡಿಸಿ ಹೃದಯಗಳನ್ನು ಗೆಲ್ಲಲು ಸಾಧ್ಯವಾಗಲಿದೆ. ಭೌತಿಕತೆ, ಕಮ್ಯೂನಿಸಂ, ಬಂಡವಾಳಶಾಹಿ ಪ್ರಯೋಗಗಳಿಂದ ಮುಗ್ಗರಿಸುತ್ತಿರುವ ಜಗತ್ತಿಗೆ ಭಾರತ ಸಂತೋಷ ಮತ್ತು ತೃಪ್ತಿಯ ಮಾರ್ಗವನ್ನು ತೋರಿಸಲಿದೆ ಎಂದು ಆರ್‌ಎಸ್‌ಎಸ್‌ ಸರಸಂಘಚಾಲಕರಾದ ಮೋಹನ್‌ ಭಾಗವತ್‌ ಹೇಳಿದ್ದಾರೆ.

ಥಾಯ್ಲೆಂಡ್‌ ರಾಜಧಾನಿಯಲ್ಲಿ ನಡೆಯುತ್ತಿರುವ 3ನೇ ವಿಶ್ವ ಹಿಂದೂ ಸಮ್ಮೇಳನ/ಕಾಂಗ್ರೆಸ್‌ (ಡಬ್ಲೂಎಚ್‌ಸಿ) ಉದ್ಘಾಟನಾ ಅಧಿವೇಶನವನ್ನುದ್ದೇಶಿಸಿ ಭಾಗವತ್‌ ಮಾತನಾಡಿದರು. ಈ ವೇಳೆ ನಾವು ಪ್ರತಿಯೊಬ್ಬ ಹಿಂದೂವನ್ನು ತಲುಪಬೇಕು. ವಿಶ್ವದ ಎಲ್ಲೆಡೆಯೂ ಹಿಂದೂಗಳು ಸಂಪರ್ಕ ಹೊಂದಿದ್ದಾರೆ. ಹಾಗಾಗಿ ನಾವೆಲ್ಲರೂ ಎಲ್ಲ ಮೂಲೆಯಲ್ಲಿನ ಹಿಂದೂಗಳನ್ನು ತಲುಪುತ್ತಾ ವಿಶ್ವದೊಂದಿಗೆ ಸಂಪರ್ಕ ಸಾಧಿಸಬೇಕು. ಕೊರೊನಾ ಕಾಲಘಟ್ಟದ ಬಳಿಕ ಜಗತ್ತಿಗೆ ಭಾರತ ಸಂತೋಷದ ಮೂಲವನ್ನೇ ನೀಡಬಲ್ಲದು ಎಂಬುದು ಅರ್ಥವಾಗಿದೆ. ಹೀಗಾಗಿ ನಾವೆಲ್ಲರೂ ಒಗ್ಗೂಡಿ ವಿಶ್ವದ ಎಲ್ಲ ಹೃದಯಗಳನ್ನು ಗೆದ್ದು, ಸಂತೋಷ, ಸಂತೃಪ್ತಿಯನ್ನು ನೀಡಬೇಕು. ಈ ಮೂಲಕ ವಿಶ್ವವೇ ಒಂದು ಕುಟುಂಬ ಎಂಬುದನ್ನು ಸಾಬೀತುಪಡಿಸಿ ಎಂದು ಕರೆ ನೀಡಿದ್ದಾರೆ.