ನಡಾಲ್‌-ಡೆಲ್‌ ಪೊಟ್ರೊ ಸೆಮಿ ಸಮರ

ನ್ಯೂಯಾರ್ಕ್‌: ವಿಶ್ವದ ನಂಬರ್‌ ವನ್‌ ಖ್ಯಾತಿಯ, ಈ ವರ್ಷದ ಫ್ರೆಂಚ್‌ ಓಪನ್‌ ಚಾಂಪಿಯನ್‌ ರಫೆಲ್‌ ನಡಾಲ್‌ ಮತ್ತು ಆರ್ಜೆಂಟೀನಾದ 24ನೇ ಶ್ರೇಯಾಂಕಿತ ಜುವಾನ್‌ ಮಾರ್ಟಿನ್‌ ಡೆಲ್‌ ಪೊಟ್ರೊ ಯುಎಸ್‌ ಓಪನ್‌ ಸೆಮಿಫೈನಲ್‌ ಸಮರಕ್ಕೆ ಅಣಿಯಾಗಿದ್ದಾರೆ. ಇವರಿಬ್ಬರ ಹೊಡೆತಕ್ಕೆ ಸಿಲುಕಿ ಕೂಟದಿಂದ ಹೊರಬಿದ್ದವರೆಂದರೆ ರಶ್ಯದ ಯುವ ಆಟಗಾರ ಆ್ಯಂಡ್ರೆ ರುಬ್ಲೇವ್‌ ಮತ್ತು ಸ್ವಿಟ್ಸರ್‌ಲ್ಯಾಂಡಿನ ಹಿರಿಯ ತಾರೆ ರೋಜರ್‌ ಫೆಡರರ್‌.

ಈ ಪಂದ್ಯಾವಳಿಯಲ್ಲಿ ಭಾರೀ ಸದ್ದು ಮಾಡಿದ್ದ 19ರ ಹರೆಯದ ರುಬ್ಲೇವ್‌ ಅವರನ್ನು ನಡಾಲ್‌ 6-1, 6-2, 6-2 ಅಂತರದಿಂದ ಸುಲಭದಲ್ಲಿ ಸೋಲಿಸಿದರು. ಕೇವಲ 97 ನಿಮಿಷಗಳಲ್ಲಿ ರುಬ್ಲೇವ್‌ ಶರಣಾದರು.

ಇನ್ನೊಂದು ಹಣಾಹಣಿಯಲ್ಲಿ ಜುವಾನ್‌ ಮಾರ್ಟಿನ್‌ ಡೆಲ್‌ ಪೊಟ್ರೊ 4 ಸೆಟ್‌ಗಳ ಕಾದಾಟದ ಬಳಿಕ ರೋಜರ್‌ ಫೆಡರರ್‌ ಅವರನ್ನು 7-5, 3-6, 7-6 (10-8), 6-4 ರಿಂದ ಹಿಮ್ಮೆಟ್ಟಿಸುವಲ್ಲಿ ಯಶಸ್ವಿಯಾದರು. 2009ರ ಬಳಿಕ ಇವರಿಬ್ಬರು ಯುಎಸ್‌ ಓಪನ್‌ನಲ್ಲಿ ಮೊದಲ ಸಲ ಮುಖಾಮುಖೀಯಾಗಿದ್ದರು. ಅಂದಿನ ಫೈನಲ್‌ನಲ್ಲಿ ಫೆಡರರ್‌ಗೆ ಸೋಲುಣಿಸಿದ ಡೆಲ್‌ ಪೊಟ್ರೊ ಚಾಂಪಿ ಯನ್‌ ಆಗಿದ್ದರು. ಅದೇ ವರ್ಷದ ಸೆಮಿಫೈನಲ್‌ನಲ್ಲಿ ಡೆಲ್‌ ಪೊಟ್ರೊ ನಡಾಲ್‌ಗ‌ೂ ಸೋಲುಣಿಸಿದ್ದನ್ನು ಮರೆಯುವಂತಿಲ್ಲ!