Sandeep Lamichhane: ಅತ್ಯಾಚಾರ ಆರೋಪ; ಲಮಿಚಾನೆ ಮುಕ್ತ

ಕಾಠ್ಮಂಡು: ನೇಪಾಲದ ಕ್ರಿಕೆಟಿಗ ಸಂದೀಪ್‌ ಲಮಿಚಾನೆ ಅವರನ್ನು ಇಲ್ಲಿನ ಪಟಾನ್‌ ಹೈಕೋರ್ಟ್‌ ಅತ್ಯಾಚಾರ ಆರೋಪದಿಂದ ಮುಕ್ತಗೊಳಿಸಿದೆ. ಇದರಿಂದ ಅವರು ಮುಂಬರುವ ಟಿ20 ವಿಶ್ವಕಪ್‌ ಸಹಿತ ತತ್‌ಕ್ಷಣದಿಂದಲೇ ಕ್ರಿಕೆಟ್‌ ಆಟವಾಡಲು ಅವಕಾಶ ಸಿಕ್ಕಿದೆ.

ಐಸಿಸಿ ಅನುಮತಿ ನೀಡಿದರೆ ಲಮಿಚಾನೆ ಅವರನ್ನು ನೇಪಾಲದ ಟಿ20 ವಿಶ್ವಕಪ್‌ ತಂಡಕ್ಕೆ ಪರಿಗಣಿಸಲಾಗುವುದು ಎಂದು ನೇಪಾಲ ಕ್ರಿಕೆಟ್‌ ಅಸೋಸಿಯೇಶನ್‌ ನ್ಯಾಯಾಲಯದ ತೀರ್ಪಿನ ನಂತರ ಪ್ರಕಟನೆಯಲ್ಲಿ ದೃಢಪಡಿಸಿದೆ. ವಿಶ್ವಕಪ್‌ಗೆ 15 ಸದಸ್ಯರ ಅಂತಿಮ ತಂಡವನ್ನು ಐಸಿಸಿಗೆ ಸಲ್ಲಿಸಲು ಮೇ 25 ಕೊನೆಯ ದಿನವಾಗಿದೆ.

ನೇಪಾಲದ ಸಂಭಾವ್ಯ ತಂಡವೀಗ ಕೆರೆಬಿಯನ್‌ನಲ್ಲಿದ್ದು ಸೈಂಟ್‌ ವಿನ್ಸೆಂಟ್‌ನಲ್ಲಿ ತರಬೇತಿ ಪಡೆಯುತ್ತಿದೆ. ವಿಶ್ವಕಪ್‌ ಆರಂಭವಾಗಲು ಕೆಲವು ದಿನಗಳಿರುವಾಗ ತಂಡವು ಅಮೆರಿಕಕ್ಕೆ ಪ್ರಯಾಣಿಸಲಿದೆ. ವಿಶ್ವಕಪ್‌ನಲ್ಲಿ ತಂಡದ ಮೊದಲ ಪಂದ್ಯವು ಜೂನ್‌ 4ರಂದು ನೆದರ್ಲೆಡ್ಸ್‌ ವಿರುದ್ಧ ಡಲ್ಲಾಸ್‌ನಲ್ಲಿ ನಡೆಯಲಿದೆ.

ಸಾಕ್ಷಾಧಾರಗಳ ಕೊರತೆಯಿಂದಾಗಿ ಲಮಿಚಾನೆರನ್ನು ಆರೋಪದಿಂದ ಮುಕ್ತಗೊಳಿಸಲಾಗಿದೆ ಎಂದು ಪಟಾನ್‌ ಹೈಕೋರ್ಟ್‌ನ ವಕ್ತಾರ ತೀರ್ಥರಾಜ ಭಟ್ಟಾರಾಯ್‌ ತಿಳಿಸಿದ್ದಾರೆ. ಈ ಮೊದಲು ಕಾಠ್ಮಂಡು ನ್ಯಾಯಾಲಯದ ಏಕಸದಸ್ಯ ಪೀಠವು 18 ವರ್ಷದ ಮಹಿಳೆಯ ಮೇಲೆ ಅತ್ಯಾಚಾರ ಎಸಗಿದ ಪ್ರಕರಣದಲ್ಲಿ ಲಮಿಚಾನೆ ತಪ್ಪಿತಸ್ಥನೆಂದು ತೀರ್ಪು ನೀಡಿತ್ತು.