ಹೆಣೆದ ಟೋಪಿಗಳಿಂದಲೇ ಗಿನ್ನೆಸ್‌ ವರ್ಲ್ಡ್ ರೆಕಾರ್ಡ್‌

ನವದೆಹಲಿ: ದೇಶದ ಏರ್‌ಫೋರ್ಸ್‌ ವೈವ್ಸ್‌ ವೆಲ್‌ಫೇರ್‌ ಅಸೋಸಿಯೇಷನ್‌ (ಎಎಫ್ಡಬ್ಲ್ಯೂಎಎ)  ಉಣ್ಣೆಯಿಂದ ಹೆಣೆದ ಟೋಪಿಗಳಿಂದಲೇ ಗಿನ್ನೆಸ್‌ ವರ್ಲ್ಡ್ ರೆಕಾರ್ಡ್‌ ಮಾಡಿದೆ.

ವಿಶ್ವದಲ್ಲೇ ಅತಿ ಹೆಚ್ಚು ಉಣ್ಣೆ ಟೋಪಿಗಳನ್ನು ಪ್ರದರ್ಶಿಸಿದ ತಂಡ ಎನ್ನುವ ಖ್ಯಾತಿಗೆ ಅಸೋಸಿಯೇಷನ್‌ನ ಮಹಿಳೆಯರು ಭಾಜನರಾಗಿದ್ದಾರೆ.

3000 ಮಹಿಳಾ ಸದಸ್ಯರು ಜು.15ರಿಂದ ಒಟ್ಟು 3 ತಿಂಗಳ ಅವಧಿಯಲ್ಲಿ ಸುಮಾರು 40,000ಕ್ಕೂ ಅಧಿಕ ಟೋಪಿಗಳನ್ನು ಹೆಣೆದಿದ್ದಾರೆ.

ನವದೆಹಲಿಯ ಆಡಿಟೋರಿಯಂ ಕ್ಯಾಂಪಸ್‌ನಲ್ಲಿ 41,541 ಟೋಪಿಗಳನ್ನು ಪ್ರದರ್ಶಿಸಲಾಗಿದೆ. ಈ ಹೊಸ ದಾಖಲೆಯು ಗಿನ್ನೆಸ್‌ ಪುಸ್ತಕದಲ್ಲಿ ಸ್ಥಾನ ಪಡೆದಿದೆ.

ಈ ಟೋಪಿಗಳನ್ನು ಚಳಿಗಾಲದ ಸಮಯದಲ್ಲಿ ಅಗತ್ಯವಿರುವವರಿಗೆ ಹಂಚಲಾಗುವುದು ಎಂದು ಅಸೋಸಿಯೇಷನ್‌ ತಿಳಿಸಿದೆ.