Adani Group: ಸಾಲ ಅಗತ್ಯವಿಲ್ಲ: ಅದಾನಿ “ಆರ್ಥಿಕ ಶಕ್ತಿ’ ಪ್ರದರ್ಶನ

ಹೊಸದಿಲ್ಲಿ: ಅದಾನಿ ಗ್ರೂಪ್‌ ವಿರುದ್ಧ ಅಮೆರಿಕದಲ್ಲಿ ಆರೋಪ ಕೇಳಿಬಂದ ಬೆನ್ನಲ್ಲೇ ಕಂಪೆನಿ ತನ್ನ ಆದಾಯ, ಲಾಭ, ನಗದಿನ ಹರಿವು ಕುರಿತ ದಾಖಲೆಗಳನ್ನು ಬಿಡುಗಡೆ ಮಾಡಿದೆ. ಈ ಮೂಲಕ ಹೂಡಿಕೆದಾರರಿಗೆ ತನ್ನ “ಆರ್ಥಿಕ ಶಕ್ತಿ ಪ್ರದರ್ಶನ’ ಮಾಡಿದೆ.

ಕಂಪೆನಿ ಲಾಭದಲ್ಲಿದ್ದು, ಕಂಪನಿಯನ್ನು ನಿರ್ವಹಿಸಲು ಯಾವುದೇ ಬಾಹ್ಯ ಸಾಲದ ಆವಶ್ಯಕತೆ ಇಲ್ಲ. ಅಲ್ಲದೇ ಕಂಪೆನಿಯ ಬಳಿ 55,024 ಕೋಟಿ ರೂ. ನಗದು ಇದ್ದು, ಮುಂದಿನ 28 ತಿಂಗಳುಗಳ ಕಾಲ ಸಾಲದ ನಿರ್ವಹಣೆ ಮಾಡಲಿದೆ ಎಂದು ಹೇಳಿದೆ.

ಕಂಪೆನಿಯ ಈಕ್ವಿಟಿ ಒಟ್ಟು ಆಸ್ತಿಯ ಮೂರನೇ ಎರಡರಷ್ಟಿದ್ದು, ಕಳೆದ 5 ವರ್ಷಕ್ಕೆ ಹೋಲಿಸಿದರೆ ಸಂಪೂರ್ಣ ಬದಲಾಗಿದೆ. ಕಂಪೆನಿ ಒಟ್ಟು 75,227 ಕೋಟಿ ರೂ. ಹೂಡಿಕೆ ಮಾಡಿದ್ದು, ಸಾಲ ಕೇವಲ 16,882 ಕೋಟಿ ರೂ.ಗಳಷ್ಟಿದೆ ಎಂದು ಹೇಳಿದೆ.

ಅಲ್ಲದೇ ಅದಾನಿ ಎಂಟರ್‌ಪ್ರೈಸಸ್‌ ಶೇ.6, ಅದಾನಿ ಗ್ರೀನ್‌ ಎನರ್ಜಿ ಶೇ.34, ಅದಾನಿ ಎನರ್ಜಿ ಸಲ್ಯೂಶನ್‌, ಅದಾನಿ ಪೋರ್ಟ್‌, ಅದಾನಿ ಸಿಮೆಂಟ್‌ ಸಂಸ್ಥೆಗಳ ಮೌಲ್ಯ ಏರಿಕೆಯಾಗಿದೆ ಎಂದು ಕಂಪೆನಿ ತಿಳಿಸಿದೆ. ಕಂಪೆನಿ ವಿರುದ್ಧ ಅಮೆರಿಕ ಕೋರ್ಟ್‌ನಲ್ಲಿ ದೋಷಾರೋಪ ನಿಗದಿಯಾದ ಕಾರಣ ಈ ಪ್ರಕಟನೆ ಹೊರಡಿಸಿದೆ.