Hunsur: ವನ್ಯಪ್ರಾಣಿ ದಾಳಿಗೆ ಸುಮಾರು 70 ಸಾವಿರ ಬೆಲೆಬಾಳುವ ಎತ್ತು ಬಲಿ

ಹುಣಸೂರು: ವನ್ಯಪ್ರಾಣಿ ದಾಳಿಗೆ ಎತ್ತೊಂದು ಬಲಿಯಾಗಿರುವ ಘಟನೆ ನಾಗರಹೊಳೆ ಉದ್ಯಾನದಂಚಿನ ಗುರುಪುರ ಗ್ರಾ.ಪಂ.ವ್ಯಾಪ್ತಿಯ ಹುಣಸೆಕಟ್ಟೆ ಹಳ್ಳದಲ್ಲಿ ನಡೆದಿದೆ.

ಹೊಸೂರು ಗೇಟ್‌ನ ರೈತ ಸ್ವಾಮಿಯವರಿಗೆ ಸೇರಿದ ಸುಮಾರು 70 ಸಾವಿರ ರೂ ಬೆಲೆ ಬಾಳುವ ಎತ್ತು ಇದಾಗಿದೆ. ಶನಿವಾರ ತಮ್ಮ ಜಮೀನಿನಲ್ಲಿ ಇತರೆ ಜಾನುವಾರುಗಳೊಂದಿಗೆ ಮೇಯಲು ಬಿಟ್ಟಿದ್ದ ವೇಳೆ ಹುಲಿ ಅಥವಾ ಚಿರತೆ ದಾಳಿ ಇಟ್ಟು ಕೊಂದು ಸುಮಾರು 500ಮೀಟರ್‌ನಷ್ಟು ದೂರದ ಹುಣಸೆಕಟ್ಟೆ ಹಳ್ಳದ ಕುರುಚಲು ಕಾಡು ಪ್ರದೇಶಕ್ಕೆ ಎಳೆದೊಯ್ದು ಕೆಲ ಭಾಗ ತಿಂದು ಹಾಕಿದೆ.

ವನ್ಯಪ್ರಾಣಿಯ ದಾಳಿಗೆ ಬೆದರಿದ ಇತರೆ ಜಾನುವಾರುಗಳು ಮನೆ ಕಡೆ ಪೇರಿ ಕಿತ್ತಿದ್ದರೆ, ಜೋಡಿ ಎತ್ತಿನ ಪೈಕಿ ಒಂದು ಎತ್ತು ಬಾರದನ್ನು ಗಮನಿಸಿದ ಮನೆಯವರು ಹುಡುಕಾಟ ನಡೆಸಿದ ವೇಳೆ ಹುಣಸೆಕಟ್ಟೆ ಹಳ್ಳಿದಲ್ಲಿ ಎತ್ತಿನ ಶವ ಪತ್ತೆಯಾಗಿದೆ.

ಮಾಹಿತಿ ಮೇರೆಗೆ ಪ್ರಾದೇಶಿಕ ಅರಣ್ಯ ವಿಭಾಗದ ಡಿಆರ್‌ಎಫ್‌ಓ ಮಲ್ಲಿಕಾರ್ಜುನ್ ಹಾಗೂ ಸಿಬ್ಬಂದಿ ಭೇಟಿ ಇತ್ತು ಪರಿಶೀಲಿಸಿ, ಮಹಜರ್ ನಡೆಸಿದ್ದಾರೆ. ಸರಕಾರದಿಂದ ಸೂಕ್ತ ಪರಿಹಾರ ಕೊಡಿಸುವಂತೆ ರೈತ ಸ್ವಾಮಿ ಮನವಿ ಮಾಡಿದ್ದಾರೆ. ಇದು ಹುಲಿಯೋ ಅಥವಾ ಚಿರತೆಯೋ ಎಂಬುದು ತಿಳಿದು ಬಂದಿಲ್ಲ. ಪರಿಹಾರ ಕಲ್ಪಿಸಲು ಕ್ರಮವಹಿಸಲಾಗಿದೆ ಎಂದು ಆರ್.ಎಫ್.ಓ. ನಂದಕುಮಾರ್ ತಿಳಿಸಿದ್ದಾರೆ.