2 ವರ್ಷ, 8 ತಿಂಗಳು, 19 ದಿನಗಳ ನಂತರ ಕೋಮಾದಿಂದ ಹೊರಬಂದ ಫುಟ್ಬಾಲಿಗ

ಆ್ಯಮ್‌ಸ್ಟರ್‌ಡಾಮ್‌ (ನೆದರ್ಲೆಂಡ್‌): ಎಲ್ಲ ಕಡೆ ಕೊರೊನಾ ವೈರಸ್‌ ದಾಳಿಯ ಸುದ್ದಿಗಳೇ ಕೇಳಿ ಬರುತ್ತಿವೆ. ಸತತ ಸಾವಿನ ಸುದ್ದಿಗಳ ನಡುವೆ ಅತ್ಯಂತ ಭರವಸೆಯ, ಸಂತಸದ ಸುದ್ದಿಯೊಂದು ಸಿಕ್ಕಿದೆ. 2 ವರ್ಷ 8 ತಿಂಗಳು, 19 ದಿನಗಳ ಹಿಂದೆ ಕೋಮಾಕ್ಕೆ ಜಾರಿದ್ದ ನೆದರ್ಲೆಂಡ್‌ನ‌ ಫ‌ುಟ್‌ಬಾಲಿಗ ಅಬ್ಧೆಲ್‌ಹಾಕ್‌ ನೌರಿ ಚೇತರಿಸಿಕೊಂಡಿದ್ದಾರೆ.

ಅವರು ಬಾಹ್ಯ ಜಗತ್ತಿಗೆ ಸ್ಪಂದಿಸುತ್ತಿದ್ದಾರೆ ಎಂದು ಕುಟುಂಬಸ್ಥರು ತಿಳಿಸಿದ್ದಾರೆ. ಅವರಿನ್ನು ಗಾಲಿಕುರ್ಚಿಯಲ್ಲಿ ಚಲಿಸಲಿದ್ದಾರೆ. ಸದ್ಯದ ಮಟ್ಟಿಗೆ ಇದನ್ನೊಂದು ಪವಾಡವೆಂದೇ ಹೇಳಬೇಕು. ಅಂತಹ ದುರ್ಘ‌ಟನೆಗೆ ನೌರಿ ಒಳಗಾಗಿದ್ದರು.

ಘಟನೆ ಏನು?:
ನೆದರ್ಲೆಂಡ್‌ನ‌ ಅಜಾಕ್ಸ್‌ ಕ್ಲಬ್‌ ತಂಡದ ತಾರಾ ಆಟಗಾರರಾಗಿದ್ದ ನೌರಿ, ತಮ್ಮ 20ನೇ ವಯಸ್ಸಿನಲ್ಲಿ ಮೈದಾನದಲ್ಲೇ ಹೃದಯಘಾತಕ್ಕೊಳಗಾಗಿದ್ದರು. 2017, ಜು.8ರಂದು ಜರ್ಮನಿಯ ವೆರ್ಡರ್‌ ಬ್ರೆಮನ್‌ ಕ್ಲಬ್‌ ವಿರುದ್ಧ ಆಸ್ಟ್ರಿಯದಲ್ಲಿ ನಡೆದ ಪಂದ್ಯದಲ್ಲಿ ದಿಢೀರನೆ ಅವರು ಕುಸಿದುಬಿದ್ದಿದ್ದರು. ಆ ವೇಳೆ ಮೈದಾನದಲ್ಲಿದ್ದ ವೈದ್ಯರು ಸೂಕ್ತ ಚಿಕಿತ್ಸೆ ನೀಡಲಿಲ್ಲ ಎಂದು ಅವರನ್ನು ಪದಚ್ಯುತಿ ಮಾಡಲಾಗಿತ್ತು. ತಕ್ಷಣ ವಿಮಾನದಲ್ಲಿ ಒಯ್ದು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಅವರು ಶಾಶ್ವತವಾಗಿ ಮೆದುಳಿನ ಆಘಾತಕ್ಕೆ ಒಳಗಾಗಿದ್ದರು.