ಯಾದಗಿರಿಯಲ್ಲಿ ಮತ್ತೆ 66 ಜನರಲ್ಲಿ ಸೋಂಕು ಪತ್ತೆ

ಯಾದಗಿರಿ: ಜಿಲ್ಲೆಯಲ್ಲಿ ಕೋವಿಡ್- 19 ಅಟ್ಟಹಾಸ ಇನ್ನು ಮುಂದುವರೆದಿದ್ದು ಗುರುವಾರವೂ 66 ಜನರಲ್ಲಿ ಸೋಂಕು ಪತ್ತೆಯಾಗಿದೆ.ಬುಧವಾರ 27 ಜನರಲ್ಲಿ ಕಾಣಿಸಿಕೊಂಡ ವೈರಸ್ ಇಂದು 10 ವರ್ಷದೊಳಗಿನ 9 ಮಕ್ಕಳು ಸೇರಿದಂತೆ 29 ಪುರುಷರು ಹಾಗೂ 37 ಮಹಿಳೆಯರಲ್ಲಿ ವಕ್ಕರಿಸಿದೆ.

ಈವರೆಗೆ 669 ಇದ್ದ ಸೋಂಕಿತರ ಸಂಖ್ಯೆ ಗುರುವಾರ 735 ಗೆ ಏರಿಕೆಯಾಗಿದೆ.ಜಿಲ್ಲೆಗೆ ಮಹಾರಾಷ್ಟ್ರ ದಿಂದ ಮರಳಿದ ಗ್ರಾಮೀಣ ಪ್ರದೇಶಗಳಲ್ಲಿ ಹೆಚ್ಚಿನ ಸೋಂಕು ಕಾಣಿಸುತ್ತಿದ್ದು, ಕೆಲವು ಕಡೆ ಸೋಂಕಿತರು ಪತ್ತೆಯಾದ ಪ್ರದೇಶವನ್ನು ಸೀಲ್ ಡೌನ್ ಮಾಡಲು ಜನರ ವಿರೋಧ ವ್ಯಕ್ತವಾಗುತ್ತಿದೆ.

ಸೋಂಕಿತರ ವರದಿ ಬರುವ ಮುನ್ನ ಬಿಟ್ಟು ಈಗ ಎಲ್ಲರನ್ನು ತೊಂದರೆಗೀಡು ಮಾಡುವುದು ಎಷ್ಟು ಸರಿ? ಮುಂಗಾರು ಬಿತ್ತನೆಗೆ ತೆರಳಬೇಕಿದೆ ಈ ಮದ್ಯೆ ಸೀಲ್ ಡೌನ್ ಮಾಡಿದರೆ ನಮ್ಮ ಕೃಷಿ ಚಟುವಟಿಕೆಗಳಿಗೆ ತೊಂದರೆಯಾಗುತ್ತದೆ ಎಂದು ಜನರು ಅಧಿಕಾರಿಗಳೊಂದಿಗೆ ವಾಗ್ವಾದಕ್ಕೆ ಇಳಿಯುವ ಪರಿಸ್ಥಿತಿ ನಿರ್ಮಾಣವಾಗಿದೆ.