ಟ್ರಕ್ಕಿಗೆ ಢಿಕ್ಕಿಯಾಗಿ ಕಾರಿಗೆ ಬೆಂಕಿ: ಮಗು ಸಹಿತ ನಾಲ್ವರ ಸಾವು

ಚಂಡೀಗಢ : ಹರಿಯಾಣದ ಕರ್ನಾಲ್‌ ಜಿಲ್ಲೆಯಲ್ಲಿ ಇಂದು ಬೆಳಗ್ಗೆ  ಟ್ರಕ್ಕಿಗೆ ಢಿಕ್ಕಿ ಹೊಡೆದ ಕಾರು ಬೆಂಕಿಗೆ ಆಹುತಿಯಾದಾಗ ಅದರೊಳಗಿದ್ದ 7 ತಿಂಗಳ ಹೆಣ್ಣು ಮಗು ಸೇರಿದಂತೆ ನಾಲ್ವರು ಸುಟ್ಟು ಕರಕಲಾದ ದಾರುಣ ಘಟನೆ ವರದಿಯಾಗಿದೆ.

ಹರಿಯಾಣದ ಶ್ಯಾಮಗಢ ಗ್ರಾಮದಲ್ಲಿ ಇಂದು ನಸುಕಿನ ವೇಳೆ ಈ ದುರ್ಘ‌ಟನೆ ನಡೆಯಿತು ಎಂದು ಪೊಲೀಸರು ತಿಳಿಸಿದ್ದಾರೆ.

ದಿಲ್ಲಿಗೆ ಹೋಗುತ್ತಿದ್ದ ಕಾರು ಡಿವೈಡರ್‌ ಜಂಪ್‌ ಮಾಡಿ ಎದುರುಗಡೆಯಿಂದ ಬರುತ್ತಿದ್ದ ಟ್ರಕ್ಕಿಗೆ ಢಿಕ್ಕಿಹೊಡೆಯಿತು. ಬಳಿಕ ಕಾರಿಗೆ ಬೆಂಕಿ ಹೊತ್ತಿಕೊಂಡಿತು. ಅದರೊಳಗಿದ್ದ ಮಗು ಸಹಿತ ನಾಲ್ವರು ಹೊರಗೆ ಬರಲಾಗದೇ ಬೆಂಕಿಯಲ್ಲಿ ಸುಟ್ಟು ಬೆಂದು ಹೋದರು ಎಂದು  ಕರ್ನಾಲ್‌ನ ತರಾವರಿ ಪೊಲೀಸ್‌ ಠಾಣೆಯ ಎಸ್‌ಎಚ್‌ಓ ಜನಕ ರಾಜ್‌ ತಿಳಿಸಿದ್ದಾರೆ. 

ಸುದ್ದಿ ತಿಳಿದು ಅಗ್ನಿ ಶಾಮಕ ಘಟಕ ಸ್ಥಳಕ್ಕೆ ಧಾವಿಸಿ ಬಂದಿತಾದರೂ ಅಷ್ಟರೊಳಗೆ ಕಾರು ಸುಟ್ಟು ಭಸ್ಮವಾಗಿತ್ತು.