ಪ್ರೇಮಿಗಳ ದಿನಕ್ಕೆ ಟೀಸರ್ ಬಿಡುಗಡೆ ಮಾಡಿ ಸಿನಿ ರಸಿಕರ ಹೃದಯ ಕದ್ದ ಪ್ರಭಾಸ್ ನಟನೆಯ ‘ರಾಧೆ ಶ್ಯಾಮ್
’ ಚಿತ್ರದ ಕುರಿತು ಇದೀಗ ಮತ್ತೊಂದು ಕುತೂಹಲಕಾರಿ ವಿಷಯ ಟಾಕ್ ಆಫ್ ದಿ ಟೌನ್ ಆಗಿದೆ.
ಟಾಲಿವುಡ್ ಡಾರ್ಲಿಂಗ್ ಪ್ರಭಾಸ್ ಲವರ್ ಬಾಯ್ ಆಗಿ ಕಾಣಿಸಿಕೊಂಡಿರುವ ರಾಧೆ ಶ್ಯಾಮ್ ಸಿನಿಮಾದ ಬಜೆಟ್ ಈಗ ಎಲ್ಲರ ಗಮನ ಸೆಳೆಯುತ್ತಿದೆ. ಅದರಲ್ಲೂ ಈ ಚಿತ್ರದಲ್ಲಿ ಬಾಹುಬಲಿ ಖ್ಯಾತಿಯ ಪ್ರಭಾಸ್ ವೇಷಭೂಷಣಕ್ಕೆ ಚಿತ್ರತಂಡ ವ್ಯಯಿಸುತ್ತಿರುವ ಮೊತ್ತ ಎಲ್ಲರ ಹುಬ್ಬೇರುವಂತೆ ಮಾಡಿದೆ.
ಹೌದು, ಹೇಳಿ ಕೇಳಿ ಇದು ಬಿಗ್ ಬಜೆಟ್ ಸಿನಿಮಾ. ಅದರಲ್ಲೂ ಪ್ರಭಾಸ್ ಅವರಂತ ಸ್ಟಾರ್ ನಟ ಅಭಿನಯಿಸುತ್ತಿರುವ ಚಿತ್ರ. ಅಂದ್ಮೇಲೆ ಸಿನಿಮಾದ ಬಜೆಟ್ ಕೂಡ ಸ್ವಲ್ಪ ಜಾಸ್ತಿನೆ ಇದೆ. ಸದ್ಯ ರಿವೀಲ್ ಆಗಿರುವ ಮಾಹಿತಿ ಪ್ರಕಾರ ಈ ಚಿತ್ರದಲ್ಲಿ ಪ್ರಭಾಸ್ ತೊಡಲಿರುವ ಉಡುಗೆಗಳಿಗೆ ಬರೋಬ್ಬರಿ 6 ಕೋಟಿ ರೂಪಾಯಿ ಖರ್ಚು ಮಾಡುತ್ತಿದ್ದಾರಂತೆ.
ನಟ ಪ್ರಭಾಸ್ ಚಿತ್ರದುದ್ದಕ್ಕೂ ವಿಶೇಷವಾಗಿ ಸಿದ್ಧಪಡಿಸಲಾಗುವ ಕಾಸ್ಟ್ಯೂಮ್ ನಲ್ಲಿ ಕಾಣಿಸಿಕೊಳ್ಳಲಿದ್ದಾರಂತೆ. ಈಗಾಗಲೇ ಕಾಸ್ಟ್ಯೂಮ್ ತಯಾರಿ ಕೆಲಸ ಕೂಡ ಶುರುವಾಗಿದೆಯಂತೆ.
ಇನ್ನು ರಾಧಾ ಕೃಷ್ಣ ಕುಮಾರ ನಿರ್ದೇಶನದ ‘ರಾಧೆ ಶ್ಯಾಮ್’ ಚಿತ್ರವನ್ನು ಗುಲ್ಸ್ಯಾನ್ ಕುಮಾರ ಹಾಗೂ ಟಿ-ಸಿರಿಸ್ ನಿರ್ಮಾಣ ಮಾಡುತ್ತಿದೆ. ಪ್ರಭಾಸ್ ಅವರ ಜತೆ ನಟಿ ಪೂಜಾ ಭಟ್ ತೆರೆ ಮೇಲೆ ರೊಮ್ಯಾನ್ಸ್ ಮಾಡಲಿದ್ದಾರೆ. ಇದೇ ಜುಲೈ 30 ಕ್ಕೆ ಕನ್ನಡ, ತಮಿಳು, ತೆಲಗು ಹಾಗೂ ಮಲಯಾಳಂ ಭಾಷೆಯಲ್ಲಿ ರಾಧೆ ಶ್ಯಾಮ್ ಬಿಡುಗಡೆಯಾಗಲಿದೆ. ನಿನ್ನೆಯಷ್ಟೆ ರಿಲೀಸ್ ಆದ ಚಿತ್ರದ ಟೀಸರ್ ಕೇವಲ ಒಂದೇ ದಿನದಲ್ಲಿ ಬರೋಬ್ಬರಿ 55 ಲಕ್ಷ ವೀಕ್ಷಣೆಯಾಗಿದೆ.
