ದೇಶಾದ್ಯಂತ ಶೀಘ್ರವೇ “5 ಜಿ’ಹವಾ!

ನವದೆಹಲಿ: ನಗದುರಹಿತ ವಹಿವಾಟಿಗೆ ಕೈಹಾಕಿ, ಡಿಜಿಟಲೀಕರಣಕ್ಕೆ ಮುಂದಾಗಿರುವ ಕೇಂದ್ರ ಸರ್ಕಾರ ಈಗ “5 ಜಿ’ ನೆಟ್‌ವರ್ಕ್‌ ಸ್ಥಾಪನೆಗೆ ಮುಂದಾಗಿದೆ. 5ಜಿ ಸ್ಪೆಕ್ಟ್ರಂನ ಹರಾಜು ಪ್ರಕ್ರಿಯೆ ಈ ವರ್ಷವೇ ಆಗಲಿದ್ದು, 700 ಮೆಗಾಹರ್ಟ್ಸ್ ತರಂಗಾಂತರದಿಂದ ಮಾರಾಟ ಪ್ರಕ್ರಿಯೆ ಆರಂಭಗೊಳ್ಳಲಿದೆ. 5 ಜಿ ನೆಟ್‌ವರ್ಕ್‌ ಒಂದು ಸೆಕೆಂಡಿಗೆ 10 ಗಿಗಾಬೈಟ್ಸ್‌ ರವಾನೆ ವೇಗವನ್ನು ಹೊಂದಿರುತ್ತವೆ. ಅಂದರೆ, ಇದು 4ಜಿ ಗಿಂತ 100 ಪಟ್ಟು ಅಧಿಕ ವೇಗ!

ಕೇಂದ್ರ ದೂರಸಂಪರ್ಕ ಇಲಾಖೆ “5 ಜಿ’ ಯೋಜನೆ ಜಾರಿಗೆ ಶೀಘ್ರವೇ ಟ್ರಾಯ್‌ಗೆ ಶಿಫಾರಸ್ಸು ಮಾಡಲಿದೆ. ಮೂಲಗಳ ಪ್ರಕಾರ, 800, 900, 1800, 2100, 2300 ಮತ್ತು 3400 ಮೆಗಾಹರ್ಟ್ಸ್ಗಳು ಮಾರಾಟಕ್ಕೆ ಸೂಕ್ತ ಎಂಬುದನ್ನು ಸರ್ಕಾರ ನಿರ್ಧರಿಸಿದೆ. ಅತಿವೇಗದ ತರಂಗಾಂತರಗಳಾದ 3,300 ಮತ್ತು 3,400 ಮೆಗಾಹರ್ಟ್ಸ್ಗಳು ಹೊಸ ತಲೆಮಾರಿನ ಬಹುತೇಕ ಸೇವೆಗಳನ್ನು ಪೂರೈಸಲಿವೆ. ಕೇಂದ್ರ ಸರ್ಕಾರದ ಉದ್ದೇಶಿತ ಸ್ಮಾರ್ಟ್‌ಸಿಟಿಯಲ್ಲಿ ಇರಲಿವೆ ಎನ್ನಲಾದ ವೇಗದ ಇಂಟರ್ನೆಟ್‌, ಮಶಿನ್‌ನಿಂದ ಮಶಿನ್‌ಗೆ ಸಂವಹನ, ಹೈ ರೆಸಲ್ಯೂಶನ್‌ ವಿಡಿಯೋ ಶೀಘ್ರವೇ ಡೌನ್‌ಲೋಡ್‌ ಮತ್ತು ವರ್ಗಾವಣೆ ಸೌಲಭ್ಯಗಳನ್ನು ಇವು ಒದಗಿಸಲಿವೆ.

ಈ ಹಿಂದೆ ಕೇಂದ್ರ ಸರ್ಕಾರ 700 ಮೆಗಾಹರ್ಟ್ಸ್ ಅನ್ನು 55 ಸಾವಿರ ಕೋಟಿ ರೂ.ಗೆ ಮಾರಲು ಮುಂದಾಗಿದ್ದಾಗ, ಅದರಲ್ಲಿ ತರಂಗಾಂತರ ದೋಷಗಳ ಕಾರಣಕ್ಕಾಗಿ ಹರಾಜು ವೈಫ‌ಲ್ಯ ಕಂಡಿತ್ತು.

ಜಾಗತಿಕವಾಗಿ 5ಜಿ ಈಗಾಗಲೇ ಚೀನಾದಂಥ ದೇಶಗಳಲ್ಲಿ ಜಾರಿಯಲ್ಲಿದ್ದರೂ, 2022ರ ವೇಳೆ ಭಾರತವೂ ಒಳಗೊಂಡಂತೆ 5ಜಿ ಸೌಲಭ್ಯವನ್ನು ಹೊಂದಿರಲಿವೆ. ಎರಿಕ್ಸನ್‌ ಮೊಬೈಲ್‌ ಕಂಪನಿಯ ಅಂದಾಜಿನಂತೆ, 2020ರೊಳಗೆ 5ಜಿ ಸೌಲಭ್ಯಕ್ಕೆ ಎಲ್ಲ ಮೊಬೈಲ್‌ ಸಂಸ್ಥೆಗಳು ಒಗ್ಗಿಕೊಳ್ಳಲಿವೆ. 2022ರ ವೇಳೆ ಜಗತ್ತಿನಾದ್ಯಂತ 55 ಕೋಟಿ 5ಜಿ ಗ್ರಾಹಕರು ಇರಲಿದ್ದಾರೆ. ಅಂದರೆ, ಒಟ್ಟು ಜನಸಂಖ್ಯೆಯ ಶೇ.10 ಮಂದಿ 5ಜಿ ತರಂಗಾಂತರ ಬಳಕೆ ಮಾಡಲಿದ್ದಾರೆ. ಸದ್ಯ ಇರುವ “4ಜಿ’ಯ ದತ್ತಾಂಶ ರವಾನೆ ವೇಗ ಪ್ರತಿ ಸೆಕೆಂಡಿಗೆ 100 ಎಂಬಿಯಿಂದ 1 ಜಿಬಿ ವರೆಗೆ ಏರಿಸಲಾಗಿದ್ದರೂ ಯುವಜನತೆ ಇನ್ನಷ್ಟು ವೇಗದ ನೆಟ್‌ವರ್ಕ್‌ ಅನ್ನು ಬಯಸಿದ್ದರು.