ತಿರುಪತಿಯಿಂದ 522 ಕಿ.ಮೀ.ಕ್ರಮಿಸಿ ಅಚ್ಚರಿ ಮೂಡಿಸಿದ ಶ್ವಾನ

ಚಿಕ್ಕಮಗಳೂರು: ತಿರುಪತಿಯಿಂದ ಶಬರಿಮಲೆಗೆ ಪಾದಯಾತ್ರೆ ಮೂಲಕ ತೆರಳುತ್ತಿದ್ದ ಮೂಡುಬಿದ್ರೆ ಮೂಲದ ಅಯ್ಯಪ್ಪ ಸ್ವಾಮಿ ಮಾಲಾಧಾರಿಗಳ ತಂಡದ ಜತೆ ಶ್ವಾನವೊಂದು ಹೆಜ್ಜೆ ಹಾಕಿದ್ದು, ತಿರುಪತಿಯಿಂದ ನೂರಾರು ಕಿ.ಮೀ.ನಡೆದುಕೊಂಡು ಬಂದಿದ್ದು, ಅಚ್ಚರಿ ಮೂಡಿಸಿದೆ.

ತಿರುಪತಿಯಿಂದ ಅ.31ರಂದು ಪಾದಯಾತ್ರೆ ಆರಂಭಿಸಿ ಸುಮಾರು 522 ಕಿ.ಮೀ. ಕ್ರಮಿಸಿದ ಮೂಡುಬಿದ್ರೆಯ ತೋಡಾರು ಗ್ರಾಮದ ಅಯ್ಯಪ್ಪ ಮಾಲಾಧಾರಿಗಳು, ಶನಿವಾರ ಕೊಟ್ಟಿಗೆಹಾರ ತಲುಪಿದ್ದು, ಈ ಶ್ವಾನ ಅವರೊಂದಿಗೆ ಹಿಂಬಾಲಿಸಿಕೊಂಡು ಬಂದಿದೆ.

ಈ ಬಗ್ಗೆ ಸುದ್ದಿಗಾರರೊಂದಿಗೆ ಮಾಹಿತಿ ನೀಡಿದ ಗುರುಸ್ವಾಮಿ ರಾಜೇಶ್‌, ತಿರುಪತಿಯಿಂದ ಅಯ್ಯಪ್ಪ ಮಾಲಾಧಾರಣೆ ಮಾಡಿ 5 ಕಿ.ಮೀ.ಮುಂದೆ ಬರುವಾಗ ನಾಯಿಯೊಂದು ಹಿಂಬಾಲಿಸಲು ಆರಂಭಿಸಿ, 16 ದಿನಗಳ ಕಾಲ ಪಾದಯಾತ್ರೆಯಲ್ಲಿ ನಮ್ಮೊಂದಿಗೆ ಹೆಜ್ಜೆ ಹಾಕಿದೆ. ಸ್ವಲ್ಪ ದೂರ ಬಂದ ನಂತರ ಕುಂಟಲು ಆರಂಭಿಸಿತು.

2 ಕಡೆಗಳಲ್ಲಿ ನಾಯಿಗೆ ಚಿಕಿತ್ಸೆ ಕೊಡಿಸಿದೆವು ಎಂದರು.ಹಗಲು ವೇಳೆಯಲ್ಲಿ ಪಾದಯಾತ್ರೆ ಮಾಡುವ ನಾವು ರಾತ್ರಿ ಸಮಯದಲ್ಲಿ ದಾರಿಯಲ್ಲಿ ಸಿಗುವ ದೇವ ಸ್ಥಾನಗಳಲ್ಲಿ ತಂಗುತ್ತೇವೆ. ಶುಕ್ರವಾರ ಮೂಡಿಗೆರೆಯ ಅಯ್ಯಪ್ಪ ಸ್ವಾಮಿ ದೇವಸ್ಥಾನದಲ್ಲಿ ಉಳಿದುಕೊಂಡಿದ್ದೆವು. ಡಿ.15ರಂದು ಶಬರಿಮಲೆ ತಲುಪುತ್ತೇವೆ ಎಂದರು.