ಇಂಗ್ಲೆಂಡ್‌ ವಿರುದ್ಧ ಭಾರತಕ್ಕೆ 5 ಟೆಸ್ಟ್‌ ಪಂದ್ಯ

ಹೊಸದಿಲ್ಲಿ: ಮುಂದಿನ ವರ್ಷಾರಂಭದಲ್ಲಿ ಇಂಗ್ಲೆಂಡ್‌ ತಂಡ 5 ಪಂದ್ಯಗಳ ಟೆಸ್ಟ್‌ ಸರಣಿಯನ್ನಾಡಲು ಭಾರತಕ್ಕೆ ಆಗಮಿಸಲಿದ್ದು, ಇದರ ವೇಳಾಪಟ್ಟಿಯನ್ನು ಬಿಸಿಸಿಐ ಪ್ರಕಟಿಸಿದೆ.

ಮೊದಲ ಟೆಸ್ಟ್‌ ಜ. 25ರಂದು ಹೈದರಾಬಾದ್‌ನಲ್ಲಿ ಆರಂಭವಾಗಲಿದೆ. ದ್ವಿತೀಯ ಟೆಸ್ಟ್‌ ಪಂದ್ಯದ ತಾಣ ವಿಶಾಖಪಟ್ಟಣ (ಫೆ. 2-6). ರಾಜ್‌ಕೋಟ್‌ಗೆ 3ನೇ ಟೆಸ್ಟ್‌ ಪಂದ್ಯದ ಆತಿಥ್ಯ ಲಭಿಸಿದೆ (ಫೆ. 15-19). 4ನೇ ಟೆಸ್ಟ್‌ ಪಂದ್ಯ ಫೆ. 23ರಿಂದ 27ರ ತನಕ ರಾಂಚಿಯಲ್ಲಿ ಹಾಗೂ ಅಂತಿಮ ಟೆಸ್ಟ್‌ ಮಾ. 7-11ರ ತನಕ ಧರ್ಮಶಾಲಾದಲ್ಲಿ ನಡೆಯಲಿದೆ.

ಈ ವರ್ಷದ ವಿಶ್ವಕಪ್‌ಗ್ೂ ಮುನ್ನ ಆಸ್ಟ್ರೇಲಿಯ ವಿರುದ್ಧ 3 ಏಕದಿನ ಪಂದ್ಯ, ವಿಶ್ವಕಪ್‌ ಬಳಿಕ ಆಸ್ಟ್ರೇಲಿಯ ಮತ್ತು ಅಫ್ಘಾನಿಸ್ಥಾನ ವಿರುದ್ಧ ಟಿ20 ಸರಣಿಯಲ್ಲೂ ಭಾರತ ಪಾಲ್ಗೊಳ್ಳಲಿದೆ. ಆಸೀಸ್‌ ಎದುರಿನ ಏಕದಿನ ಪಂದ್ಯಗಳನ್ನು ಸೆ. 22-27ರ ನಡುವೆ ಮೊಹಾಲಿ, ಇಂದೋರ್‌ ಮತ್ತು ರಾಜ್‌ಕೋಟ್‌ನಲ್ಲಿ ಆಡಲಾಗುವುದು. ವಿಶ್ವಕಪ್‌ ಬಳಿಕ ಆಸ್ಟ್ರೇಲಿಯ ವಿರುದ್ಧ 5 ಟಿ20 ಹಾಗೂ ಅಫ್ಘಾನಿಸ್ಥಾನ ವಿರುದ್ಧ 3 ಟಿ20 ಪಂದ್ಯಗಳ ಸರಣಿ ನಡೆಯಲಿದೆ.