ಹೊಸದಿಲ್ಲಿ : ಇಲ್ಲಿನ ಸೀಮಾಪುರಿಯಲ್ಲಿ ನಾಲ್ಕು ಮಹಡಿಗಳ ಅಪಾರ್ಟ್‌ಮೆಂಟ್‌ ಕಟ್ಟಡದಲ್ಲಿ ಇಂದು ಶುಕ್ರವಾರ ನಸುಕಿನ 3 ಗಂಟೆಯ ವೇಳೆಗೆ ಸಂಭವಿಸಿದ ಬೆಂಕಿ ಅವಘಡದಲ್ಲಿ, ಇಂದೇ ಹುಟ್ಟಹಬ್ಬ ಆಚರಿಸಲಿದ್ದ 12ರ ಹರೆಯದ ಬಾಲಕಿಯ ಸಹಿತ ಒಂದೇ ಕುಟುಂಬದ ನಾಲ್ಕು ಮಂದಿ ಮೃತಪಟ್ಟ ದಾರುಣ ಘಟನೆ ವರದಿಯಾಗಿದೆ.
ಮೃತರನ್ನು 12ರ ಹರೆಯದ ಹರ್‌ಷು, ಆಕೆಯ ತಂದೆ ಸಂಜಯ್‌ ವರ್ಮಾ 40, ಅಜ್ಜ ವಿಜಯ್‌ ವರ್ಮಾ 63, ಮತ್ತು ನಾಲ್ಕರ ಹರೆಯ ಸಹೋದರ ಚಿಕು ಎಂದು ಗುರುತಿಸಲಾಗಿದೆ. ಇವರೆಲ್ಲರೂ ತಮ್ಮ ಮನೆಯ ಹೊರಗೆ ಮಾಳಿಗೆ ಮೆಟ್ಟಲಲ್ಲಿ ಸತ್ತು ಬಿದ್ದಿರುವುದು ಪತ್ತೆಯಾಗಿದೆ.
ವಿದ್ಯುತ್‌ ಶಾರ್ಟ್‌ ಸರ್ಕ್ನೂಟ್‌ನಿಂದ ಕಟ್ಟಡದ ಮೊದಲ ಅಂತಸ್ತಿನಲ್ಲಿ ಉಂಟಾದ ಬೆಂಕಿ ಕೂಡಲೇ ಇತರ ಮಹಡಿಗಳಿಗೂ ಹರಡಿತು. ಬೆಂಕಿ ಅಷ್ಟೇನೂ ದೊಡ್ಡದಾಗಿರಲಿಲ್ಲ; ವರ್ಮಾ ಕುಟುಂಬದವರು ತಮ್ಮ ಮನೆಯಿಂದ ಹೊರಗೆ ಬಾರದೇ ಬಾಲ್ಕನಿಯಲ್ಲೇ ಉಳಿದುಕೊಂಡಿದ್ದರೆ ಯಾರೂ ಸಾಯುತ್ತಿರಲಿಲ್ಲ ಎಂದು ಅಗ್ನಿಶಾಮಕ ದಳದವರು ಹೇಳಿದ್ದಾರೆ.
ಕಟ್ಟಡದಲ್ಲಿ ವಾಸವಾಗಿದ್ದವರಲ್ಲಿ ಹಲವರು ರೂಫ್ ಟಾಪ್‌ ಗೆ ಹೋಗಿ ಬಚಾವಾದರೆ ಇನ್ನು ಕೆಲವರು ತಮ್ಮ ತಮ್ಮ ಮನೆಯ ಬಾಲ್ಕನಿಯಲ್ಲೇ ಉಳಿದು ಬಚಾವಾದರು. ಈ ಕಟ್ಟಡದಲ್ಲಿ ಒಟ್ಟು 11 ಮನೆಗಳಿವೆ.
ಮೃತ ಬರ್ತ್‌ಡೇ ಹುಡುಗಿ ಹರ್‌ಷು ವಿನ ತಾಯಿ ಮೋನಾ 34 ಜಿಟಿಬಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಒಂದನೇ ಮಹಡಿಯಿಂದ ಹಾರಿದ್ದ ಬಿನೇಶ್‌ ರತಿ 40 ಎಂಬಾಕೆಗೆ ಗಾಯಗಳಾಗಿದ್ದು ಆಕೆಯೂ ಆಸ್ಪತ್ರೆಯಲ್ಲಿ ಚೇತರಿಸಿಕೊಳ್ಳುತ್ತಿದ್ದಾರೆ.
