ಹತ್ಯೆಗೀಡಾದ 4 ಅಡಿಯ ಉಗ್ರ ಬಿಜೆಪಿ ಸೇರ್ಪಡೆಗೆ ಮುಂದಾಗಿದ್ದ!!

ಹೊಸದಿಲ್ಲಿ: ಪುಲ್ವಾಮಾದಲ್ಲಿ ಮಂಗಳವಾರ ಸೇನಾಪಡೆಗಳಿಂದ ಹತ್ಯೆಗೀಡಾದ 4 ಅಡಿ ಎತ್ತರದ ಕುಬ್ಜ ಉಗ್ರ ಬಿಜೆಪಿ ಸೇರ್ಪಡೆಗೆ ಯತ್ನಿಸಿದ ಎನ್ನುವ ಅಂಶ ಬಹಿರಂಗಗೊಂಡಿದೆ. 

ಡಿಎನ್‌ಎ ವರದಿ ಮಾಡಿದಂತೆ ಪಾಕ್‌ ಮೂಲದ ಉಗ್ರ ನೂರ್‌ ಮಹಮನ್‌ ಬಿಜೆಪಿ  ಸೇರ್ಪಡೆಯಾಗಿ  ಬಳಿಕ ಕೆಲ ನಾಯಕರನ್ನು ಹತ್ಯೆಗೈಯುವ ಸಂಚು ರೂಪಿಸಿದ್ದ ಎನ್ನಲಾಗಿದೆ. 

2003 ರಲ್ಲಿ ದೆಹಲಿಯ ಬಿಜೆಪಿ ಮುಖ್ಯ ಕಚೇರಿಗೆ ಭೇಟಿ ನೀಡಿ ಪಕ್ಷದ ಪ್ರಾಥಮಿಕ ಸದಸ್ಯತ್ವ ಪಡೆಯಲೂ ಯತ್ನ ನಡೆಸಿದ್ದ ಎನ್ನಲಾಗಿದೆ. 

ಈತನ ಯೋಜನೆಕಾರ್ಯರೂಪಕ್ಕೆ ಬರುವ ಮೊದಲೇ ದೆಹಲಿಯ ಎಟಿಎಸ್‌ ಪೊಲೀಸರು ಭಾರೀ ಪ್ರಮಾಣದ ಶಸ್ತ್ರಾಸ್ತ್ರಗಳೊಂದಿಗೆ ವಶಕ್ಕೆ ಪಡೆದಿದ್ದರು. 

ಜಮ್ಮು ಮತ್ತು ಕಾಶ್ಮೀರದ ಪುಲ್ವಾಮಾದಲ್ಲಿ ನಡೆದ ಪ್ರಮುಖ ಸೇನಾ ಕಾರ್ಯಾಚರಣೆಯಲ್ಲಿ ಜೈಶ್‌ -ಎ-ಮೊಹಮ್ಮದ್‌ ಉಗ್ರ ನೂರ್‌ ಮೊಹಮ್ಮದ್‌ ತಾಂತ್ರಿ  ಮತ್ತು ಸಂಘಟನೆಗೆ ಸೇರಿದ ಇನ್ನೋರ್ವ ಪ್ರಮುಖನನ್ನುಹತ್ಯೆ ಮಾಡಲಾಗಿತ್ತು. 

 47 ವರ್ಷ ವಯಸ್ಸಿನ ಕುಬ್ಜ ನಾಗಿದ್ದ ತಾಂತ್ರಿ  ಕಣಿವೆ ರಾಜ್ಯದಲ್ಲಿ ಹಲವೆಡೆ ಉಗ್ರ ಚಟುವಟಿಕೆ ಚಿಗಿತುಕೊಳ್ಳಲು ಕಾರಣನಾಗಿದ್ದ. ಈ ಕಾರಣಕ್ಕಾಗಿಯೇ ಈತನನ್ನು ದೆಹಲಿ ನ್ಯಾಯಾಲಯವೊಂದು “ಸಾವಿನ ವ್ಯಾಪಾರಿ’ ಎಂದು ಬಣ್ಣಿಸಿತ್ತು. ಶ್ರೀನಗರ ಏರ್‌ಪೋರ್ಟ್‌ನಲ್ಲಿರುವ ಬಿಎಸ್‌ಎಫ್ ಶಿಬಿರದ ಮೇಲೆ ನಡೆದಿದ್ದ ದಾಳಿ ಸೇರಿದಂತೆ ಪ್ರಮುಖ ಉಗ್ರ ಕೃತ್ಯಗಳಲ್ಲಿ ಭಾಗಿಯಾಗಿದ್ದ.