ಸೀಲ್ಡಾ ಎಕ್ಸ್‌ಪ್ರೆಸ್‌ ರೈಲು ಹರಿದು ಮೂವರು ಯುವಕರ ದಾರುಣ ಸಾವು

ಬಲ್ಲಿಯಾ, ಉತ್ತರ ಪ್ರದೇಶ : ಉತ್ತರ ಪ್ರದೇಶದ ಬಲ್ಲಿಯಾ ಜಿಲ್ಲೆಯಲ್ಲಿ ರೈಲು ಹರಿದು ಮೂವರು ಯುವಕರು ದಾರುಣವಾಗಿ ಮೃತಪಟ್ಟ ಘಟನೆ ವರದಿಯಾಗಿದೆ.

ಈ ಘಟನೆ ಇಂದು ನಸುಕಿನ 5.45ರ ಸುಮಾರಿಗೆ ಛಾಪ್ರಾ-ಬಲ್ಲಿಯಾ-ವಾರಾಣಸಿ ಸೆಕ್ಷನ್‌ನಲ್ಲಿ ಯಾದವನಗರ ಚಾಂದ್‌ ದಿಯಾರ್‌ ಗ್ರಾಮದಲ್ಲಿ ನಡೆಯಿತು.

ಮೃತರನ್ನು ವಿಕ್ಕಿ ಬಿಂದ್‌, ಪಪ್ಪು ಬಿಂದ್‌ ಮತ್ತು ಅವಧೇಶ್‌ ಬಿಂದ್‌ ಎಂದು ಗುರುತಿಸಲಾಗಿದೆ. ಇವರೆಲ್ಲ 25ರಿಂದ 27ರ ಹರೆಯದ ಒಳಗಿನವರು.

ಇವರು ಮದುವೆ ಕಾರ್ಯಕ್ರಮ ಮುಗಿಸಿ ಬರುತ್ತಿರುವಾಗ ನಿಸರ್ಗ ಕರೆಗೆ ಓಗೊಟ್ಟು ರೈಲು ಹಳಿಯ ಮೇಲಿದ್ದಾಗ ಧಾವಿಸಿ ಬಂದ ಸೀಲ್ಡಾ ಎಕ್ಸ್‌ಪ್ರೆಸ್‌ ರೈಲು ಇವರ ಮೇಲೆ ಕ್ಷಣಾರ್ಧದಲ್ಲಿ ಹರಿದು ಹೋಯಿತು ಎಂದು ಬೈರಿಯಾ ಪೊಲೀಸ್‌ ಠಾಣೆ ಎಸ್‌ಎಚ್‌ಓ ಅನಿಲ್‌ ತಿವಾರಿ ತಿಳಿಸಿದ್ದಾರೆ.