ಎಂಡಿಎಚ್‌ ಮಸಾಲಾ ಸಿಇಒ ಸಂಭಾವನೆ 21 ಕೋಟಿ!

ಮುಂಬಯಿ: 94 ವರುಷದ, ಬಿಳಿ ಪೊದೆಮೀಸೆ ಹೊತ್ತ ಈ ಅಜ್ಜನ ಪರಿಚಯ ಯಾರಿಗಿಲ್ಲ! ಭಾರತದ ಗ್ರಾಹ ಕೋತ್ಪನ್ನ ಸಂಸ್ಥೆಗಳಲ್ಲೇ ನಂ.1 ಸಿಇಒ ಆಗಿರುವ ಈ ತಾತಾ ಯಾವುದೇ ಮ್ಯಾಗಜಿನ್‌ನ ಮುಖಪುಟ ದಿಂದ ಪರಿಚಿತರಾದವರಲ್ಲ. ಇವರ ಇಂಟರ್‌ವ್ಯೂ ಬ್ಯುಸಿನೆಸ್‌ ಟಿವಿಗಳಲ್ಲಿ ಬರುವುದಿಲ್ಲ. ಆದರೆ, ಎಲ್ಲ ಚಾನೆಲ್‌ಗ‌ಳಲ್ಲೂ ಇವರ ಉತ್ಪನ್ನದ ಜಾಹೀರಾತಿ ನದ್ದೇ ಸದ್ದು! ದೇಶದ ಪ್ರಮುಖ ಸಂಸ್ಥೆಗಳ ಸಿಇಒ ಗಳಿಗಿಂತ ಹೆಚ್ಚು ಸಂಭಾವನೆ ಇವರದು! 

ಅವರೇ ಎಂಡಿಎಚ್‌ ಉತ್ಪನ್ನ ಕಂಪೆನಿಯ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ (ಸಿಇಒ) ಧರ್ಮಪಾಲ್‌ ಗುಲಾಟಿ. ಇವರು 2016ರಲ್ಲಿ ಪಡೆದ ಒಟ್ಟು ಸಂಭಾವನೆ 21 ಕೋಟಿ ರೂಪಾಯಿ! ಸಂಭಾವನೆಯ ಶೇ.90 ಭಾಗವನ್ನು ದತ್ತಿ ಸಂಸ್ಥೆಗಳಿಗೆ ದಾನ ನೀಡುತ್ತಿದ್ದಾರೆ.

ಮಹಾಶಿಯನ್‌ ಡಿ ಹಟ್ಟಿ ಮಸಾಲ ಉತ್ಪನ್ನ “ಎಂಡಿಎಚ್‌’ ಅಂತಲೇ ಪ್ರಸಿದ್ಧಿ. ಉತ್ಪನ್ನದ ಪ್ರತಿ ಪ್ಯಾಕೆಟ್‌ನಲ್ಲೂ ಇದರ ಸಿಇಒ ಆಗಿರುವ ಧರ್ಮಪಾಲ್‌ ಗುಲಾಟಿಯ ಚಿತ್ರವಿದೆ. 2016ರಲ್ಲಿ ಇವರ ಸಂಭಾವನೆ ಗೋದ್ರೇಜ್‌ ಕಂಪನಿಯ ಆದಿ ಗೋದ್ರೆಜ್‌ ಮತ್ತು ವಿವೇಕ್‌ ಗಂಭೀರ್‌, ಹಿಂದೂಸ್ತಾನ್‌ ಯೂನಿಲಿವರ್‌ನ ಸಂಜೀವ್‌ ಮೆಹ್ತಾ ಮತ್ತು ಐಟಿಸಿಯ ಸಿಇಒ ವೈಸಿ ದೇವೇಶ್ವರ್‌ಗಿಂತ ಅಧಿಕ! ಅಲ್ಲದೆ, 2016ರಲ್ಲಿ ಎಂಡಿಎಚ್‌ ವ್ಯವಹಾರ ಶೇ.15ರಿಂದ ಶೇ.24ಕ್ಕೆ ಏರಿಕೆ ಕಂಡಿದೆ. ಕಂಪೆ‌ನಿಯ ಒಟ್ಟು ವಾರ್ಷಿಕ ಗಳಿಕೆ 924 ಕೋಟಿ ರೂಪಾಯಿ ಇದ್ದು, ಈ ವರ್ಷ 213 ಕೋಟಿ ರೂಪಾಯಿ ಲಾಭ ಹೆಚ್ಚಿಸಿಕೊಂಡಿದೆ.

ಓದಿದ್ದು 5ನೇ ಕ್ಲಾಸ್‌!
ದೇಶದ ಬೇರೆಲ್ಲ ಸಿಇಒಗಳು ಪದವಿಗಳ ಮೇಲೆ ಪದವಿ ಪಡೆದಿದ್ದರೂ ಎಂಡಿಎಚ್‌ನ ಗುಲಾಟಿ ಓದಿದ್ದು ಕೇವಲ 5ನೇ ಕ್ಲಾಸ್‌ ಮಾತ್ರ. 5ನೇ ತರಗತಿಯ ಅರ್ಧದಲ್ಲೇ ಶಾಲೆ ಬಿಟ್ಟವರು! ಇಂಗ್ಲಿಷನ್ನು ನಿರರ್ಗಳ ಮಾತ ನಾಡುತ್ತಾರೆ. 60 ವರ್ಷಗಳಿಂದ “ಎಂಡಿಎಚ್‌’ನಲ್ಲೇ ಕಾರ್ಯನಿರ್ವಹಿಸಿದ್ದಾರೆ.

ಹುಟ್ಟಿದ್ದು ಪಾಕಿಸ್ಥಾನ
 ಯಾರಿಗೂ ಇದು ಅಚ್ಚರಿಯೇ! ಭಾರತದ ಹಳ್ಳಿಹಳ್ಳಿಗಳಲ್ಲಿ ಜನಪ್ರಿಯ ವಿರುವ ಎಂಡಿಎಚ್‌ ಮಸಾಲ ಕಂಪನಿಯ ಹುಟ್ಟಿದ್ದು ಪಾಕಿಸ್ಥಾನದ ಸಿಯಾಲ್‌ಕೋಟ್‌ನಲ್ಲಿ, 1919ರಲ್ಲಿ. ಗುಲಾಟಿ ಅವರ ತಂದೆ ಚುನ್ನಿ ಲಾಲ್‌ ಈ ಕಂಪೆನಿಯನ್ನು ಸ್ಥಾಪಿಸಿದ್ದು, ನಂತರ ಈ ಕಂಪೆನಿ ದಿಲ್ಲಿಯ ಕರೋಲ್‌ಬಾಗ್‌ಗೆ ಸ್ಥಳಾಂತರವಾಯಿತು. ಗುಲಾಟಿ ಅವಧಿಯಲ್ಲಿ ಭಾರತದಾದ್ಯಂತ 15 ಫ್ಯಾಕ್ಟರಿಗಳು ಆರಂಭಗೊಂಡಿದ್ದು, ದುಬೈ ಹಾಗೂ ಲಂಡನ್ನಿನಲ್ಲೂ ಇದರ ಶಾಖೆಗಳಿವೆ. ಎಂಡಿಎಚ್‌ನ 60ಕ್ಕೂ ಅಧಿಕ ಮಸಾಲಾ ಉತ್ಪನ್ನಗಳು 100 ದೇಶಗಳಿಗೆ ರವಾನೆ ಆಗುತ್ತಿವೆ. ಕಂಪೆನಿಯ ಸದ್ಯದ ಮೌಲ್ಯ 1500 ಕೋಟಿ ರೂಪಾಯಿ.