ಮೂವರಿಗೆ ಭೌತಶಾಸ್ತ್ರ ನೊಬೆಲ್‌

ಸ್ಟಾಕ್‌ಹೋಮ್‌: 2018ರ ಭೌತಶಾಸ್ತ್ರ ನೊಬೆಲ್‌ ಅನ್ನು ಲೇಸರ್‌ ಕ್ಷೇತ್ರದಲ್ಲಿ ನಡೆಸಿದ ಸಂಶೋಧನೆಗಾಗಿ ಮೂವರಿಗೆ ನೀಡಲು ನಿರ್ಧರಿಸಲಾಗಿದೆ. ಅಮೆರಿಕದ ಆರ್ಥರ್‌ ಆಶ್ಕಿನ್‌, ಫ್ರಾನ್ಸ್‌ನ ಗೆರಾರ್ಡ್‌ ಮೌರೌ ಮತ್ತು ಕೆನಡಾದ ಡೊನ್ನಾ ಸ್ಟ್ರಿಕ್‌ಲಾಂಡ್‌ ಈ ಪುರಸ್ಕಾರ ಪಡೆದಿದ್ದಾರೆ. 55 ವರ್ಷಗಳ ಬಳಿಕ ಮಹಿಳೆಯೊಬ್ಬರಿಗೆ (ಡೊನ್ನಾ) ಭೌತಶಾಸ್ತ್ರ ನೊಬೆಲ್‌ ನೀಡಲಾಗಿದೆ. ಲೇಸರ್‌ ಕಿರಣದ ಬೆರಳುಗಳ ಮೂಲಕ ಅಣು-ಕಣಗಳು, ವೈರಸ್‌ಗಳು ಹಾಗೂ ಇತರ ಜೀವ ಕೋಶಗಳನ್ನು ಒಂದೆಡೆಯಿಂದ ಇನ್ನೊಂದೆಡೆಗೆ ಚಲಿಸುವಂತೆ ಮಾಡುವ ಆಪ್ಟಿಕಲ್‌ ಟ್ವೀಜರ್‌ಗಳ ಸಂಶೋಧನೆ ನಡೆಸಿದ್ದಕ್ಕಾಗಿ ಆಶ್ಕಿನ್‌ಗೆ ಈ ಪುರಸ್ಕಾರ ನೀಡಲಾಗಿದೆ. ಅತ್ಯಂತ ಸಣ್ಣದಾದ ಆಪ್ಟಿಕಲ್‌ ಪಲ್ಸ್‌ಗಳನ್ನು ಉತ್ಪಾದಿಸುವ ವಿಧಾನವನ್ನು ಮೌರೌ ಹಾಗೂ ಸ್ಟ್ರಿಕ್‌ಲ್ಯಾಂಡ್‌ ಕಂಡು ಹಿಡಿದಿದ್ದಾರೆ. ಇವರು ಕಂಡುಕೊಂಡ ಈ ವಿಧಾನವನ್ನು ಈಗ ಕಣ್ಣಿನ ಶಸ್ತ್ರಚಿಕಿತ್ಸೆಯಲ್ಲಿ ಬಳಸಲಾಗುತ್ತಿದೆ. ಎಕನಾಮಿಕ್ಸ್‌ನಲ್ಲಿ ಸಾಧನೆಗೈದವರಿಗೆ ಅ.8ರಂದು ಪುರಸ್ಕಾರ ನೀಡಲಾಗುತ್ತದೆ. 

ಲೈಂಗಿಕ ಕಿರುಕುಳ ಆರೋಪದ ಹಿನ್ನೆಲೆಯಲ್ಲಿ, 1949ರ ಅನಂತರ ಇದೇ ಮೊದಲ ಬಾರಿಗೆ ಸಾಹಿತ್ಯ ನೊಬೆಲ್‌ ಘೋಷಣೆಯನ್ನು ಮುಂದಿನ ವರ್ಷಕ್ಕೆ ಮುಂದೂಡಲಾಗಿದೆ.