ಉತ್ತರ ಪ್ರದೇಶ : ಬಾವಿಗೆ ಬಿದ್ದು ಇಬ್ಬರ ದಾರುಣ ಸಾವು

ಭಡೋಹಿ, ಉತ್ತರ ಪ್ರದೇಶ : ಇಲ್ಲಿನ ರಮಲ್‌ಪುರ ಪ್ರದೇಶದಲ್ಲಿ ಇಬ್ಬರು ದುರ್ದೈವಿಗಳು ಬಾವಿಗೆ ಬಿದ್ದು ಮೃತಪಟ್ಟ ಘಟನೆ ನಡೆದಿದೆ. ಇಬ್ಬರಲ್ಲಿ ಒಬ್ಟಾತ ಆಕಸ್ಮಿಕವಾಗಿ ಬಾವಿಗೆ ಬಿದ್ದಾಗ ಆತನನ್ನು ಪಾರು ಮಾಡಲು ಇನ್ನೊಬ್ಬ ಬಾವಿಗೆ ಇಳಿದಿದ್ದ; ಆದರೆ ದುರದೃಷ್ಟದಿಂದ ಇಬ್ಬರೂ ಮುಳುಗಿ ಮೃತಪಟ್ಟರು.

ಮನೆಯೊಂದರಲ್ಲಿ  ವೈಕುಂಠ ಸಮಾರಾಧನೆ ಪ್ರಯುಕ್ತ ಜನರು ಸೇರಿದ್ದರು. ಮನೆಯ ಮುಖ್ಯ ಬಾಗಿಲಿನ ಎದುರುಗಡೆಯೇ ಇದ್ದ ಬಾವಿಗೆ ಜೈನಾಥ್‌ ಗೌತಮ್‌ (65) ಆಕಸ್ಮಿಕವಾಗಿ ಬಾವಿಗೆ ಬಿದ್ದರು. ಅವರನ್ನು ಪಾರುಗೊಳಿಸಲು ಬಾವಿಗೆ ಇಳಿದ ಮನೋಜ್‌ ಗೌತಮ್‌ (35) ಕೂಡ ಬಾವಿಯಲ್ಲಿ ಮುಳುಗಿ ಮೃತಪಟ್ಟರು. 

ಎರಡೂ ಮೃತದೇಹಗಳನ್ನು ಬಾವಿಯಿಂದ ಮೇಲಕ್ಕೆತ್ತಲಾಗಿ ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದೆ ಎಂದು ಸರ್ಕಲ್‌ ಆಫೀಸರ್‌ ಅಭಿಷೇಕ್‌ ಪಾಂಡೆ ತಿಳಿಸಿದ್ದಾರೆ.