ತ್ರಿಪುರದಲ್ಲಿ ಟಿಎಂಸಿ –ಬಿಜೆಪಿ ಕಾದಾಟದಲ್ಲಿ 17 ಮಂದಿಗೆ ಗಾಯ

ಅಗರ್ತಲಾ : ಎರಡು ಗುಂಪುಗಳ ಒಳಗೆ ನಡೆದ ಕಾದಾಟದಲ್ಲಿ ಒಟ್ಟು ಹದಿನೇಳು ಮಂದಿ ಗಾಯಗೊಂಡಿದ್ದು ಇವರಲ್ಲಿ 11 ಪೊಲೀಸರು, ಇಬ್ಬರು ಛಾಯಾಚಿತ್ರ ಪತ್ರಕರ್ತರು ಮತ್ತು ಟಿಎಂಸಿ ಹಾಗೂ ಬಿಜೆಪಿಯ ತಲಾ ಇಬ್ಬರು ಕಾರ್ಯಕರ್ತರು ಸೇರಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.

ಟಿಎಂಸಿ ನಾಯಕ ಸುದೀಪ್‌ ರಾಯ್‌ ಬರ್ಮನ್‌ ಅವರ ಹಿರಿಯ ಸಹೋದರ ಸಂದೀಪ್‌ ರಾಯ್‌ ಬರ್ಮನ್‌ ಅವರು ಬಿಜೆಪಿ ಕಾರ್ಯಕರ್ತನೊಬ್ಬನನ್ನು ಹೊಡೆದರೆಂಬ ಕಾರಣಕ್ಕೆ ಕಾದಾಟ ಉಂಟಾಯಿತು.

ಎರಡೂ ಪಕ್ಷಗಳ ಬೆಂಬಲಿಗರು ಪಶ್ಚಿಮ ಅಗರ್ತಲಾ ಪೊಲೀಸ್‌ ಠಾಣೆಗೆ ನಿನ್ನೆ ರಾತ್ರಿ ಎಫ್ಐಆರ್‌ ದಾಖಲಿಸಲು ಬಂದಿದ್ದಾಗ ಉಭಯ ಗುಂಪುಗಳ ನಡುವೆ ಕಾದಾಟ ಆರಂಭವಾಯಿತು. ಇದರಲ್ಲಿ ಮಧ್ಯಪ್ರವೇಶಿಸಿದ ಹನ್ನೊಂದು ಮಂದಿ ಪೊಲೀಸ್‌ ಸಿಬಂದಿಗಳಿಗೆ ಸಣ್ಣ ಪುಟ್ಟ ಗಾಯಗಳಾದವು. 

ಕಾದಾಟದಲ್ಲಿ ಬಿಜೆಪಿ ಉಪಾಧ್ಯಕ್ಷ ಸುಬಲ್‌ ಭೌಮಿಕ್‌ ಮತ್ತು ಟಿಎಂಸಿ ನಾಯಕ ಪನ್ನಾ ದೇಬ್‌ ಸೇರಿದಂತೆ ಬಿಜೆಪಿ ಹಾಗೂ ಟಿಎಂಸಿಯ ನಾಲ್ವರು ಕಾರ್ಯಕರ್ತರು ಗಾಯಗೊಂಡರು ಎಂದು ಎಸ್‌ಪಿ ತಿಳಿಸಿದ್ದಾರೆ.