ಭಾರತದಲ್ಲಿ 1 ಬಾಟಲ್‌ ಕೋಲ್ಡ್‌ ಡ್ರಿಂಕ್‌ಗಿಂತ 1ಜಿಬಿ ಡಾಟಾ ಅಗ್ಗ : PM

ಟೋಕಿಯೋ : ‘ಭಾರತದಲ್ಲಿ ಒಂದು ಬಾಟಲ್‌ ಕೋಲ್ಡ್‌ ಡ್ರಿಂಕ್‌ ಗಿಂತಲೂ ಒಂದು ಜಿಬಿ ಡಾಟಾ ಅಗ್ಗ ಇದೆ’ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದಾರೆ.

ಜಪಾನ್‌ ಭೇಟಿಯಲ್ಲಿರುವ ಪ್ರಧಾನಿ ಮೋದಿ ಅವರಿಂದು “ಭಾರತ ಡಿಜಿಟಲ್‌ ಮೂಲ ಸೌಕರ್ಯ ಅಭಿವೃದ್ಧಿಯಲ್ಲಿ ಅತ್ಯದ್ಬುತ ಪ್ರಗತಿಯನ್ನು ಸಾಧಿಸಿದೆ’ ಎಂದು ಹೇಳಿದರು 

ಭಾರತ – ಜಪಾನ್‌ 13ನೇ ವಾರ್ಷಿಕ್‌ ಶೃಂಗದಲ್ಲಿ ಪಾಲ್ಗೊಳ್ಳಲು ಕಳೆದ ಶನಿವಾರ ಜಪಾನಿಗೆ ಬಂದಿರುವ ಪ್ರಧಾನಿ ಮೋದಿ ಅವರು ಜಪಾನಿನ ಉನ್ನತ ನಾಯಕರೊಂದಿಗೆ ಸರಣಿ ಸಭೆಗಳನ್ನು ನಡೆಸಿದರಲ್ಲದೆ ಇಲ್ಲಿನ ಭಾರತೀಯ ಸಮುದಾಯವನ್ನು ಉದ್ದೇಶಿಸಿ ಮಾತನಾಡಿದರು. 

ಭಾರತದಲ್ಲಿ ದೂರಸಂಪರ್ಕ ಮತ್ತು ಇಂಟರ್‌ನೆಟ್‌ ಜಾಲ ಬೃಹತ್‌ ಗಾತ್ರದಲ್ಲಿ ವಿಸ್ತರಣೆಯಾಗಿರುವುದನ್ನು ಪ್ರಧಾನಿ ಮೋದಿ ಶ್ಲಾಘನೆಗೈದರು.

2022ರಲ್ಲಿ ಭಾರತದ ಡಿಜಿಟಲ್‌ ಆರ್ಥಿಕತೆಯು 1 ಟ್ರಿಲಿಯನ್‌ ಡಾಲರ್‌ ಪ್ರಮಾಣಕ್ಕೆ ಬೆಳೆಯಲಿದೆ; ಇದರಿಂದಾಗಿ ದೇಶದಲ್ಲಿ ಒಂದು ಕೋಟಿ ಉದ್ಯೋಗಾವಕಾಶಗಳು ಸೃಷ್ಟಿಯಾಗಲಿವೆ ಎಂದು ಆರ್ಥಿಕ ಸಮಾಲೋಚನ ಸಂಸ್ಥೆ ‘EY’ ಹೇಳಿದೆ.

ಭಾರತದಲ್ಲಿನ ಇಂಟರ್‌ನೆಟ್‌ ಸೇವಾ ರಂಗ 2022ರೊಳಗ್ಗೆ 76.4 ಬಿಲಿಯ ಡಾಲರ್‌ ತಲುಪಲಿದ್ದು ಆ ಮೂಲಕ ಶೇ.44ರ ಪ್ರಗತಿಯನ್ನು ದಾಖಲಿಸಲಿದೆ; ಪ್ರಕೃತ ಇದು 33.8 ಬಿಲಿಯ ಡಾಲರ್‌ ಇದೆ ಎಂದು ಭಾರತದ ಇಂಟರ್‌ನೆಟ್‌ ಮತ್ತು ಮೊಬೈಲ್‌ ಅಸೋಸಿಯೇಶನ್‌ ವರದಿ ತಿಳಿಸಿದೆ.

“ಭಾರತ ಇಂದು ಡಿಜಿಟಲ್‌ ಮೂಲ ಸೌಕರ್ಯದಲ್ಲಿ ಅತ್ಯಪಾರ ಪ್ರಗತಿಯನ್ನು ಕಾಣುತ್ತಿದೆ. ಬ್ರಾಡ್‌ ಬ್ಯಾಂಡ್‌ ಸಂಪರ್ಕ ಇಂದು ದೇಶದ ಮೂಲೆ ಮೂಲೆಯಲ್ಲಿರುವ ಹಳ್ಳಿಗಳನ್ನು ತಲುಪುತ್ತಿದೆ; ಪ್ರಕೃತ ಭಾರತದಲ್ಲಿ ನೂರು ಕೋಟಿಗೂ ಅಧಿಕ ಮೊಬೈಲ್‌ ಫೋನ್‌ಗಳು ಕ್ರಿಯಾಶೀಲವಾಗಿವೆ’ ಎಂದು ಪ್ರಧಾನಿ ಭಾರತೀಯ ಬಾಹುಳ್ಯವನ್ನು ಉದ್ದೇಶಿಸಿ ಹೇಳಿದರು.