ಬೆಂಗಳೂರು : ಏಪ್ರಿಲ್ 1 ರಂದು ತೆರೆ ಮೇಲೆ ಬರಲು ತುದಿಗಾಲಿನಲ್ಲಿ ನಿಂತಿರುವ ‘ಯುವರತ್ನ’ ಚಿತ್ರದ ಟ್ರೈಲರ್ ಇಂದು (ಮಾರ್ಚ್ 20) ಬಿಡುಗಡೆಯಾಗಿದೆ.
ಎರಡು ನಿಮಿಷ 17 ಸೆಕೆಂಡ್‍ ಗಳ ಯುವರತ್ನ ಟ್ರೇಲರ್ ಜಬರ್ದಸ್ತಾಗಿ ಮೂಡಿ ಬಂದಿದೆ. ಪಂಚಿಂಗ್ ಡೈಲಾಗ್, ಪವರ್‍ ಫುಲ್ ಆ್ಯಕ್ಷನ್ ತುಂಬಿಕೊಂಡಿರುವ ಟ್ರೈಲರ್ ಸಿನಿಮಾ ಮೇಲಿನ ನಿರೀಕ್ಷೆ ದುಪಟ್ಟುಗೊಳಿಸುವಂತಿದೆ.
ಇದುವರೆಗೂ ಯುವರತ್ನದ ಚಿತ್ರಕಥೆ ಕುರಿತು ಚಿತ್ರತಂಡ ಏನನ್ನೂ ಹೇಳಿಲ್ಲ. ಆದರೆ, ಇಂದು ರಿಲೀಸ್ ಆಗಿರುವ ಟ್ರೇಲರ್ ನಲ್ಲಿ ಶಿಕ್ಷಣದ ಖಾಸಗೀಕರಣ ಹಾಗೂ ವಿದ್ಯಾ ಕೇಂದ್ರಗಳಲ್ಲಿ ನುಸುಳಿರುವ ಮಾದಕ ದ್ರವ್ಯಗಳ ಜಾಲದ ಕುರಿತು ಕಥೆ ಹೊಂದಿದೆ ಎಂಬುದರ ಸಣ್ಣ ಸುಳಿವು ನೀಡಿದೆ. ಬಿಡುಗಡೆಯಾದ ಕೆಲವೇ ಗಂಟೆಗಳಲ್ಲಿ ಯುವರತ್ನ ಟ್ರೇಲರ್ ಯುಟ್ಯೂಬ್‍ ನಲ್ಲಿ ಲಕ್ಷಗಟ್ಟಲೆ ವೀಕ್ಷಣೆ ಪಡೆಯುತ್ತಿದೆ.
ಇನ್ನು ರಾಮಾಚಾರಿ ಹಾಗೂ ರಾಜಕುಮಾರ ಚಿತ್ರಗಳ ಯಶಸ್ವಿ ನಿರ್ದೇಶಕ ಸಂತೋಷ್ ಆನಂದ್ ರಾಮ್ ಯುವರತ್ನ ಚಿತ್ರಕ್ಕೆ ಆ್ಯಕ್ಷನ್ ಕಟ್ ಹೇಳಿದ್ದಾರೆ. ಇದು ಪುನೀತ್ ರಾಜಕುಮಾರ್ ಹಾಗೂ ಸಂತೋಷ್ ಆನಂದ್ ರಾಮ್ ಅವರ ಕಾಂಬಿನೇಷನ್‍ನಲ್ಲಿ ರೆಡಿಯಾಗುತ್ತಿರುವ ಎರಡನೇ ಸಿನಿಮಾ. ಈ ಮೊದಲು ಈ ಜೋಡಿ ರಾಜಕುಮಾರ ಹೆಸರಿನ ಬ್ಲಾಕ್ ಬಸ್ಟರ್ ಸಿನಿಮಾ ನೀಡಿತ್ತು.
ಇನ್ನು ಯುವರತ್ನ ಸಿನಿಮಾದಲ್ಲಿ ಪುನೀತ್ ರಾಜಕುಮಾರ್ ನಾಯಕ ನಟರಾಗಿ ಕಾಣಿಸಿಕೊಂಡಿದ್ದಾರೆ. ಇವರಿಗೆ ನಾಯಕಿಯಾಗಿ ತಮಿಳು ನಟಿ ಶೆಯೇಷಾ ಅಭಿನಯಿಸಿದ್ದಾರೆ. ಬಹುಭಾಷಾ ನಟ ಪ್ರಕಾಶ್ ರಾಜ್ ( ರೈ), ಗೌರವ ಪಾತ್ರದಲ್ಲಿ ದೂಧ್ ಪೇಡಾ ದಿಗಂತ್ ಹಾಗೂ ಖಳ ನಟನ ಪಾತ್ರದಲ್ಲಿ ಡಾಲಿ ಧನಂಜಯ್ ನಟಿಸಿದ್ದಾರೆ. ವಿಜಯ ಕಿರಂಗದೂರು ಸಿನಿಮಾ ನಿರ್ಮಾಣ ಮಾಡಿದ್ದಾರೆ.
