ಪ್ರೀತಿ ಮಾಡೋಕ್‌ ಪುರುಸೊತ್ತಿದೆಯಾ?

ನಾನ್‌ ಪಕ್ಕಾ ಲೋಕಲ್‌. ನಾನು ಇರೋದೇ ಹೀಗೆ. ನಾನು ಬದುಕೋದು ನನಗೋಸ್ಕರ ಮಾತ್ರ. ಇನ್ನೊಬ್ರನ್ನ ಮೆಚ್ಚಿಸೋಕೆ ನಾನು ಬದಲಾಗೋದಿಲ್ಲ. ನನ್ನ ನೇಚರ್‌, ನನ್ನ ಬಿಹೇವಿಯರ್‌, ನನ್ನ ಮನ್ಸು, ಕನ್ಸು ಎಲ್ಲಾರಿಗೂ ವಿಚಿತ್ರವಾಗೇ ಕಾಣ್ಸುತ್ತೆ. ಮೊದಲೆಲ್ಲ ಲೂಸು, ಮೆಂಟ್ಲು, ಅಂತ ನಿಕ್‌ ನೇಮ್‌ ಇಟ್ಟಿದ್ದ ಫ್ರೆಂಡ್ಸು ಈಗ “ವಿಚಿತ್ರಾ’ ಅಂತ ಬೇರೆ ಮಡ್ಗವ್ರೆ. 

ನನ್ಗೆ ಫ್ರೆಂಡ್ಸ್‌ ಅಂದ್ರೆ ಹೆಣ್ಣು-ಗಂಡು ಅನ್ನೋ ಭೇದ ಇಲ್ಲ. ನನಗೆ ಎಲ್ರೂ ಒಂದೇ. ಎಲ್ಲರ ಹಾಗೆ ಫ್ರೆಂಡ್‌ಗೆ ಹಾಯ್‌ ಹೇಳಿ, ಶೇಕ್‌ ಹ್ಯಾಂಡ್‌ ಮಾಡಿ, ಹಲ್ಲು ಕಿಸಿದು ನಾನು ಮಾತಾಡ್ಸಲ್ಲ. ನೇರವಾಗಿ ಎದೆಗೆ ಹೊಡೆದೇ ಮಾತಿಗಿಳಿಯೋದು. ನನ್ನ ಫ್ರೆಂಡ್ಸ್‌ ಎಲ್ರೂ ಹೇಳ್ತಾರೆ: “ಆ ರೀತಿ ಎಲ್ಲರ ಜೊತೆ ನಗುನಗುತ್ತಾ ಮಾತಾಡಬೇಡ. ಹುಡುಗರು ಅದನ್ನೇ ಅಪಾರ್ಥ ಮಾಡ್ಕೊತಾರೆ. ನಿನ್ನ ಮಾತಿಂದ ಕೆಲವರ ಹೃದಯದಲ್ಲಿ ಅಲ್ಲೋಲ ಕಲ್ಲೋಲ ಆಗಿ, ಲವ್ವು-ಗಿವ್ವು ಅಂತ ಏನೇನೋ ಕನಸು ಕಟ್ಕೊಂಡು ಮನ್ಸಲ್ಲಿ ಮಂಡ್ಗಿ ತಿಂದ್ಕೊಂಡು ಹಾಳಾಗಿ ಹೋದ್ರೆ ಆ ಅಪವಾದ ಬೇರೆ ನಿನಗೇ’.. ಹೀಗೆಲ್ಲಾ ಹೇಳಿದ್ರೂ, ಐ ಡೋಂಟ್‌ ಕೇರ್‌. ನಾನ್‌ ಈ ಥರಾ ಅಂತ ಗೊತ್ತಿದ್ದೂ ನಮ್ಮ ಕ್ಲಾಸ್‌ಮೇಟ್ಸು ಬಂದು ಪ್ರಪೋಸ್‌ ಮಾಡಿ ಹೋಗಿದ್ದಾರೆ. ನಾನು ಅವರಿಗೆ ಕೊಟ್ಟಿರೋ ರಿಯಾಕ್ಷನ್‌ಗೆ ಮತ್ತೆ ನನ್ನ ಕಡೆ ಅವ್ರು ತಿರುಗಿ ಕೂಡ ನೋಡಿಲ್ಲ. ನನಗಂತೂ ಈ ಪ್ರೀತಿ-ಗೀತಿ ಇತ್ಯಾದಿ ಕಡೆ ಯಾಕೋ ಅಟ್ರ್ಯಾಕ್ಷನ್ನೇ ಆಗಲಿಲ್ಲ. ನಾನಾಯ್ತು, ನನ್ನ ಡಿಫ್ರೆಂಟ್‌ ಲೈಫಾಯ್ತು, ಹಾಗಿದ್ದೆ. ಇಟ್ಸ್‌ ಓಕೆ. ಅದ್ನ ಬಿಟಾಕು. ಈಗ, ನನ್ನಷ್ಟಕ್ಕ ನಾನೇ ಬದಲಾಗಿದ್ದೀನಿ. ಯಾಕೆ ಅಂತ ಮಾತ್ರ ಗೊತ್ತಿಲ್ಲ. 

ನೇರವಾಗಿ ವಿಷಯಕ್ಕೆ ಬರ್ತೀನಿ. ನನ್ನ ಬಗ್ಗೆ ನಿನಗೆಷ್ಟು ಗೊತ್ತಿದೆಯೋ ಕಾಣೆ. ಆದ್ರೆ, ನಿನ್ನ ಬಗ್ಗೆ ನನಗೆ ಸಾಕಷ್ಟು ಗೊತ್ತಿದೆ. ನೀನು, ನಿನ್ನ ಇನೋಸೆನ್ಸ್‌, ಫ್ರೆಂಡ್ಸ್‌ ಜೊತೆ ನಿನ್ನ ಕಮ್ಯುನಿಕೇಶನ್ನು, ಕ್ಲಾಸಲ್ಲಿ ನಿನ್ನ ಪಾರ್ಟಿಸಿಪೇಶನ್‌, ನಿನ್ನ ಹೆಲ್ಪಿಂಗ್‌ ನೇಚರ್‌, ಪರ್ಸನಾಲಿಟಿ, ಕ್ಯಾರೆಕ್ಟರ್‌ ಎಲ್ಲಾ ಸಿಕ್ಕಾಪಟ್ಟೆ ಇಷ್ಟ ಆಗ್ಬಿಟ್ಟಿದೆ. ಇಷ್ಟೆಲ್ಲದರ ಮಧ್ಯೆ, ನಿನಗೆ ನನ್ನ ಪ್ರೀತಿ ಮಾಡೋಕ್‌ ಪುರುಸೊತ್ತಿದೆಯಾ? ಇದೆ ಅಂದ್ರೆ ಹಿಂದೆ-ಮುಂದೆ ನೋಡ್ದೆ ಒಪ್ಕೋಡ್‌ ಬಿಡು. ನನ್ಗೆ ಜಾಸ್ತಿ ಟೈಮಿಲ್ಲ. ಅಪರೂಪಕ್ಕೆ ನನ್ನ ಮನಸ್ಸಿನಲ್ಲಿ ಈ ಪ್ರೀತಿ ಅನ್ನೋದು ಹುಟ್ಕೊಂಡಿದೆ. ಬಹುಶಃ ಆ ಪ್ರೀತಿಗೂ ನನ್ನ ಮೇಲೆ ಲವ್ವಾಗಿದೆ ಅನ್ಸುತ್ತೆ! ಇನ್ನು ನಿನಗೆ ಆಗೋಲ್ವಾ? ಆಗೇ ಆಗುತ್ತೆ ಅನ್ನೋ ಹುಚ್ಚು ಭರವಸೇಲಿ ನಿನ್ನ ಉತ್ತರಕ್ಕಾಗಿ ಕಾಯ್ತಾ ಇರೋ ಮೆಂಟಲ್‌ ಹುಡ್ಗಿ…

ವಿಚಿತ್ರಾ