Train ಯಶವಂತಪುರ-ಮಂಗಳೂರು ಸೆಂಟ್ರಲ್‌ ರೈಲು: ಕಣ್ಣೂರಿನಿಂದ ಕೋಯಿಕ್ಕೋಡ್‌ ವರೆಗೆ ವಿಸ್ತರಣೆ

ಮಂಗಳೂರು: ಯಶವಂತಪುರ – ಮಂಗಳೂರು ಸೆಂಟ್ರಲ್‌ (ಕಣ್ಣೂರು) ರಾತ್ರಿ ರೈಲು ಕೇರಳದಲ್ಲಿ ಎರಡನೇ ಬಾರಿಗೆ ವಿಸ್ತರಣೆಗೊಂಡಿದ್ದು, ಇದೀಗ ಕಣ್ಣೂರಿನಿಂದ ಕೋಯಿಕ್ಕೋಡ್‌ ವರೆಗೆ ವಿಸ್ತರಣೆಯಾಗಿದೆ.

ನಂ. 16511/512 ಬೆಂಗಳೂರು – ಕಣ್ಣೂರು – ಬೆಂಗಳೂರು ರಾತ್ರಿ ರೈಲನ್ನು ಕೋಯಿಕ್ಕೋಡ್‌ ವರೆಗೆ ವಿಸ್ತರಿಸುವ ಕುರಿತ ದಕ್ಷಿಣ ರೈಲ್ವೇಯ ಪ್ರಸ್ತಾವನೆಗೆ ರೈಲ್ವೇ ಸಚಿವಾಲಯ ಒಪ್ಪಿಗೆ ಸೂಚಿಸಿದೆ. ಈಗ ಇರುವ ವೇಳಾಪಟ್ಟಿಯಂತೆ ರೈಲು ಸಂಚರಿಸಲಿದ್ದು, ನಂ. 16511 ರೈಲು ಕೋಯಿಕ್ಕೋಡ್‌ಗೆ ಮಧ್ಯಾಹ್ನ 12.40ಕ್ಕೆ ತಲುಪಲಿದೆ. ಈ ರೈಲು ತಲಶ್ಶೇರಿ, ವಡಕರ ಮತ್ತು ಕ್ವಿಲಾಂಡಿಯಲ್ಲಿ ನಿಲುಗಡೆಯಾಗಲಿದೆ. 16512 ರೈಲು ಸಂಜೆ 3.30ಕ್ಕೆ ಕೋಯಿಕ್ಕೋಡ್‌ನಿಂದ ಹೊರಡಲಿದೆ.

ರೈಲನ್ನು ವಿಸ್ತರಿಸುವುದಿಲ್ಲ ಎಂದು ರೈಲ್ವೇ ಸಚಿವ ಅಶ್ವಿ‌ನಿ ವೈಷ್ಣವ್‌ ಅವರು ಸಂಸದ ನಳಿನ್‌ ಕುಮಾರ್‌ ಅವರಿಗೆ ನೀಡಿರುವ ಭರವಸೆಯ ಹೊರತಾಗಿಯೂ ಈ ವಿಸ್ತರಣೆ ಪ್ರಕ್ರಿಯೆ ನಡೆದಿದೆ.

2007ರಲ್ಲಿ ಆರಂಭವಾಗಿದ್ದು, ಯಶವಂತಪುರ – ಮಂಗಳೂರು ಸೆಂಟ್ರಲ್‌ ರೈಲು ಮೊದಲನೇ ಬಾರಿ ರೈಲು 2009ರಲ್ಲಿ ಮಂಗಳೂರಿನಿಂದ ಕಣ್ಣೂರು ವರೆಗೆ ವಿಸ್ತರಣೆಯಾಗಿತ್ತು. ಕಾರವಾರಕ್ಕೆ ವಿಸ್ತರಿಸಬೇಕು ಎನ್ನುವ ಬೇಡಿಕೆ ಹೊರತಾಗಿಯೂ ಈ ರೈಲನ್ನು ಕಣ್ಣೂರಿಗೆ ವಿಸ್ತರಿಸಲಾಗಿತ್ತು.

ವಿಸ್ತರಣೆಗೆ ವಿರೋಧ
ಪಶ್ಚಿಮ ಕರಾವಳಿ ರೈಲ್ವೇ ಯಾತ್ರಿ ಸಮಿತಿ ಈ ವಿಸ್ತರಣೆಯನ್ನು ವಿರೋಧಿಸಿದ್ದು, ಇದು ಕರಾವಳಿಯ ಪ್ರಯಾಣಿಕರಿಗೆ ಸೀಟ್‌ ಅಲಭ್ಯತೆಗೆ ಕಾರಣವಾಗಲಿದೆ. ಕೇರಳಿಗರು ಬೆಂಗಳೂರಿಗೆ ತೆರಳಲು ಇದೇ ರೈಲನ್ನು ಅವಲಂಬಿಸುವ ಕಾರಣ, ಕಾದಿರಿಸದ ಸೀಟ್‌ಗಳಿರುವ ಬೋಗಿಗಳು ಮಂಗಳೂರು ತಲುಪುವಾಗಲೇ ಭರ್ತಿಯಾಗಲಿದೆ ಎಂದು ಅಭಿಪ್ರಾಯಪಟ್ಟಿದೆ.