ಒಡಿಶಾದಲ್ಲಿ ಹಳದಿ ಬಣ್ಣದ ಆಮೆ ಪತ್ತೆ

ಬಾಲಸೋರ್‌: ಒಡಿಶಾದ ಬಾಲಸೋರ್‌ ಜಿಲ್ಲೆಯ ಗ್ರಾಮವೊಂದರ ನಿವಾಸಿಗಳ ಕಣ್ಣಿಗೆ ರವಿವಾರ ಹಳದಿ ಬಣ್ಣದ ಆಮೆಯೊಂದು ಕಂಡಿದೆ. ಚಿಪ್ಪು ಸೇರಿ ಆಮೆಯ ದೇಹ ಸಂಪೂರ್ಣವಾಗಿ ಹಳದಿ ಬಣ್ಣದಲ್ಲಿ ಇದೆ. ಗ್ರಾಮ ಸ್ಥರು ಈ ಆಮೆಯನ್ನು ಅರಣ್ಯ ಇಲಾಖೆಗೆ ಒಪ್ಪಿಸಿದ್ದಾರೆ. ಇದು ಅಪರೂಪದ ಆಮೆ. ನಾನು ಈ ರೀತಿಯ ಆಮೆ ಯನ್ನು ಹಿಂದೆ ಎಂದೂ ಕಂಡಿರಲಿಲ್ಲ ಎಂದು ಇಲ್ಲಿಯ ಅರಣ್ಯ ಇಲಾಖೆ ಸಿಬಂದಿ ಭಾನುಮಿತ್ರ ಆಚಾರ್ಯ ತಿಳಿಸಿದ್ದಾರೆ.

ಈ ಆಮೆಯ ಫೋಟೋವನ್ನು ಟ್ವಿಟರ್‌ನಲ್ಲಿ ಪೋಸ್ಟ್‌ ಮಾಡಿರುವ ಅಧಿಕಾರಿ ಸುಸಂತ ನಂದಾ, ಬಾಲಸೋರ್‌ನಲ್ಲಿ ಈ ಅಪರೂಪದ ಆಮೆ ಕಾಣಿಸಿಕೊಂಡಿದೆ. ಬಹುಶಃ ಆಮೆಯಲ್ಲಿ ವರ್ಣದ್ರವ್ಯದ ಕೊರತೆಯಿಂದ ಹಳದಿ ಬಣ್ಣ ಬಂದಿದೆ ಎಂದು ಬರೆದಿದ್ದಾರೆ.