ಕುರ್ಚಿಗೆ ಅಂಟಿಕೊಂಡಿಲ್ಲ: ಯಡಿಯೂರಪ್ಪ ಟಾಂಗ್‌

ಮೈಸೂರು: ನಾನು ಎಂದಿಗೂ ಕುರ್ಚಿಗೆ ಅಂಟಿಕೊಂಡಿಲ್ಲ ಎನ್ನುವ ಮೂಲಕ ರಾಜ್ಯ ಬಿಜೆಪಿ ಅಧ್ಯಕ್ಷ ಬಿ.ಎಸ್‌. ಯಡಿಯೂರಪ್ಪ ಅವರು ಈಶ್ವರಪ್ಪ ಅವರಿಗೆ ಟಾಂಗ್‌ ನೀಡಿದ್ದಾರೆ. 

ನಗರದಲ್ಲಿ ನಡೆಯುತ್ತಿರುವ ರಾಜ್ಯ ಬಿಜೆಪಿ ಕಾರ್ಯಕಾರಿಣಿ ಸಭೆಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು. “1991ಕ್ಕಿಂತ ಮುಂಚೆ ನಾನು ರಾಜ್ಯ ಬಿಜೆಪಿ ಅಧ್ಯಕ್ಷನಾಗಿ, ಅನಂತ ಕುಮಾರ್‌ ಪ್ರಧಾನ ಕಾರ್ಯದರ್ಶಿಯಾಗಿ ಇಬ್ಬರೂ ರಾಜ್ಯ ಸುತ್ತಿದ್ದೇವು. ಅಂದು ಈಗಿನಂತೆ ಬಿಜೆಪಿಗೆ ಜನಬೆಂಬಲ ಇರಲಿಲ್ಲ. ಅಂತಹ ಸಂದರ್ಭದಲ್ಲೂ ಹಿಂದುಳಿದ ವರ್ಗಗಳ ನಾಯಕರಾದ ಎಲ್‌.ಜಿ.ಹಾವನೂರು, ಎಂ.ವೆಂಕಟಸ್ವಾಮಿ, ಶ್ರೀಕಂಠದತ್ತ ನರಸಿಂಹರಾಜ ಒಡೆಯರ್‌ ಅಂತಹವರು ಬಿಜೆಪಿಗೆ ಬಂದರು. ಅವರು ಬಿಜೆಪಿಗೆ ಬರುವುದರಿಂದ ನಮ್ಮ ಕುರ್ಚಿಗೆ ಕುತ್ತು ಬರುತ್ತೆ ಎಂದು ಯೋಚಿಸಲಿಲ್ಲ. ಎಂದೂ ಕುರ್ಚಿಗೆ ಅಂಟಿಕೊಂಡವನಲ್ಲ ನಿಮ್ಮ ಯಡಿಯೂರಪ್ಪ’ ಎಂದರು.

ಮೇ 18ರಿಂದ ಪ್ರವಾಸ: ರಾಜ್ಯದಲ್ಲಿ ಎದುರಾಗಿರುವ ಬರ ಪರಿಸ್ಥಿತಿಯ ವೀಕ್ಷಣೆ ಹಾಗೂ ಪಕ್ಷದ ಸಂಘಟನೆಗೆ ಒತ್ತು ನೀಡುವ ದೃಷ್ಟಿಯಿಂದ ಮೇ 18ರಿಂದ 45 ದಿನಗಳ ಕಾಲ ರಾಜ್ಯದ ಪ್ರತಿ ಜಿಲ್ಲೆಯ ಪ್ರವಾಸ ಕೈಗೊಳ್ಳುತ್ತೇನೆ. 

ಕೇಂದ್ರ ಸಚಿವರು, ಮಾಜಿ ಮುಖ್ಯಮಂತ್ರಿಗಳು, ಪ್ರತಿಪಕ್ಷ ನಾಯಕರುಗಳು, ಶಾಸಕರು, ಸಂಸದರು ಈ ಪ್ರವಾಸದಲ್ಲಿ ಜತೆಗೂಡಲಿದ್ದಾರೆ. ಮುಂಬರುವ ಚುನಾವಣೆ ಯಲ್ಲಿ ವಿಧಾನಸಭೆಗೆ 150 ಸ್ಥಾನ ಹಾಗೂ ಲೋಕಸಭೆಗೆ ರಾಜ್ಯದಿಂದ 25 ಸ್ಥಾನ ಗೆಲ್ಲಲು ಈಗಿನಿಂದಲೇ ಸಂಘಟನೆಗೆ ಪರಿಶ್ರಮ ಹಾಕಬೇಕಿದೆ ಎಂದು ಹೇಳಿದರು.