ಒಂದು ಕ್ಷಣವೂ ವೇಸ್ಟ್ ಮಾಡುತ್ತಿಲ್ಲ, ಆದಷ್ಟು ಬೇಗ ಬರುತ್ತೇನೆ: ಹೊಸ ಚಿತ್ರದ ಬಗ್ಗೆ ಯಶ್

“ನಿಮ್ಮ ಮುಂದಿನ ಸಿನಿಮಾ ಯಾವಾಗ, ಯಾರ ಜೊತೆ? – ನಟ ಯಶ್‌ ಎಲ್ಲೇ ಹೋಗಲಿ, ಮಿಸ್‌ ಇಲ್ಲದೇ ಈ ಪ್ರಶ್ನೆ ಎದುರಾಗುತ್ತದೆ. ಇಷ್ಟು ದಿನ “ಶೀಘ್ರದಲ್ಲೇ’ ಎಂದು ಒನ್‌ಲೈನ್‌ನಲ್ಲಿ ಉತ್ತರಿಸುತ್ತಿದ್ದ ಯಶ್‌, ಬುಧವಾರ ಮಾತ್ರ ಈ ಪ್ರಶ್ನೆಗೆ ಪ್ರೇಕ್ಷಕರನ್ನು ದೃಷ್ಟಿಯಲ್ಲಿಟ್ಟುಕೊಂಡು ಉತ್ತರಿಸಿದ್ದಾರೆ.

ಬುಧವಾರ ನಂಜನಗೂಡು ದೇವಾಲಯಕ್ಕೆ ಯಶ್‌ ಕುಟುಂಬ ಸಮೇತ ಭೇಟಿ ನೀಡಿದ್ದರು. ಈ ವೇಳೆ “ನಿಮ್ಮ ಹೊಸ ಸಿನಿಮಾ ಯಾವಾಗ?’ ಎಂಬ ಪ್ರಶ್ನೆ ಎದುರಾಗಿದೆ. ಇದಕ್ಕೆ ಉತ್ತರಿಸಿದ ಯಶ್‌, “ಜನ ನನಗೆ ಆಶೀರ್ವಾದ ಮಾಡಿ ಕಳುಹಿಸಿದ್ದಾರೆ. ಅವರು ಕೊಡೋ ದುಡ್ಡಿಗೆ ವ್ಯಾಲ್ಯೂ ಇರಬೇಕು. ಅವರು ಫ್ರೀಯಾಗಿ ಬಂದು ಸಿನಿಮಾ ನೋಡಲ್ಲ. ಹಾಗಾಗಿ, ನಾವು ಮಾಡುವ ಕೆಲಸದಲ್ಲಿ ಶ್ರದ್ಧೆ ಇರಬೇಕು. ಬಹಳ ದಿನಗಳಿಂದ ಕೆಲಸ ಮಾಡುತ್ತಲೇ ಇದ್ದೀವಿ. ನಾನಂತೂ ಒಂದು ದಿನ, ಒಂದು ಕ್ಷಣಾನೂ ವೇಸ್ಟ್‌ ಮಾಡುತ್ತಿಲ್ಲ. ಇಡೀ ದೇಶ ಜಗತ್ತು ನೋಡುತ್ತಾ ಇದೆ. ಆದಷ್ಟು ಬೇಗ ಬರುತ್ತೇನೆ’ ಎಂದಿದ್ದಾರೆ.

“ಕೆಜಿಎಫ್-2′ ಬಿಡುಗಡೆಯಾಗಿ ಒಂದು ವರ್ಷ ಕಳೆದರೂ ಯಶ್‌ ಹೊಸ ಸಿನಿಮಾ ಅನೌನ್ಸ್‌ ಆಗದ ಹಿನ್ನೆಲೆಯಲ್ಲಿ ಅವರ ಹೊಸ ಸಿನಿಮಾ ಕುರಿತಾದ ಕುತೂಹಲ ಜಾಸ್ತಿಯಾಗಿದೆ. ಈ ನಡುವೆಯೇ ಅನೇಕ ನಿರ್ದೇಶಕರ ಹೆಸರುಗಳು ಯಶ್‌ ಸಿನಿಮಾ ಸುತ್ತ ಕೇಳಿಬಂದವು. ಆದರೆ, ಯಾವುದೂ ಇನ್ನೂ ಅಧಿಕೃತವಾಗಿ ಅಂತಿಮವಾಗಿಲ್ಲ.

ಇದನ್ನೂ ಓದಿ:ಅಮೆರಿಕನ್ನರು ಭಾರತದ ನಾಟು ನಾಟು ಟ್ಯೂನ್ ಗೆ ಕುಣಿಯುತ್ತಿದ್ದಾರೆ: ಔತಣಕೂಟದಲ್ಲಿ ಮೋದಿ ಮಾತು

ಒಂದು ಸಿನಿಮಾದ ದೊಡ್ಡ ಗೆಲುವು ಆ ಚಿತ್ರದ ನಾಯಕನನ್ನು ದೊಡ್ಡ ಸ್ಟಾರ್‌ ನಟನನ್ನಾಗಿ ಮಾಡುತ್ತದೆ. ಈಗ ಯಶ್‌ ಕೂಡಾ “ಕೆಜಿಎಫ್’ ಚಿತ್ರದ ಮೂಲಕ ಪ್ಯಾನ್‌ ಇಂಡಿಯಾ ಸ್ಟಾರ್‌ ಆಗಿದ್ದಾರೆ. ಈಗ ಸವಾಲಿರುವುದೇ ಅಲ್ಲಿ. ಒಂದು ದೊಡ್ಡ ಯಶಸ್ಸು ಸಿಕ್ಕ ನಂತರ ಇಡೀ ಚಿತ್ರರಂಗ, ಅಭಿಮಾನಿಗಳು… ಎಲ್ಲರೂ ಆ ನಟನ ಮುಂದಿನ ಸಿನಿಮಾ ಯಾವುದು ಎಂಬ ಕುತೂಹಲದಿಂದ ಎದುರು ನೋಡುತ್ತಿರುತ್ತಾರೆ. ಈ ತರಹದ ಕುತೂಹಲ ನಟನಿಗೆ ದೊಡ್ಡ ಸವಾಲು.

ಮುಂದೆಯೂ ಆತ ಇದೇ ತರಹದ ದೊಡ್ಡ ಹಿಟ್‌ ಕೊಡಬೇಕು, ಬಾಕ್ಸ್‌ ಆಫೀಸ್‌ ನಲ್ಲಿ ಸಿನಿಮಾ ಸೂಪರ್‌ ಹಿಟ್‌ ಆಗಬೇಕೆಂದು ಅಭಿಮಾನಿಗಳು ಬಯಸುತ್ತಾರೆ. ಈ ತರಹದ ನಿರೀಕ್ಷೆ ಹೆಚ್ಚಾಗುತ್ತಾ ಹೋದಾಗಲೇ ನಾಯಕನ ಆಯ್ಕೆಗಳು ತಡವಾಗುತ್ತಾ ಹೋಗುತ್ತದೆ. ಮುಂದೆ ಯಾವ ರೀತಿಯ ಕಥೆ ಆಯ್ಕೆ ಮಾಡಬೇಕು, ಯಾವ ಜಾನರ್‌ ನ ಸಿನಿಮಾ ಒಪ್ಪಿಕೊಳ್ಳಬೇಕು ಎಂಬ ಸಣ್ಣ ಗೊಂದಲ ಸೃಷ್ಟಿಯಾಗೋದು ಸಹಜ. ಇದೇ ಕಾರಣದಿಂದ ಯಶ್‌ ಕೂಡಾ ಅಳೆದು ತೂಗಿ ಕಥೆಯ ಆಯ್ಕೆ ಮಾಡಿಕೊಳ್ಳುತ್ತಿದ್ದಾರೆ.

 ರವಿಪ್ರಕಾಶ್‌ ರೈ