ಮುಂಬಯಿ: ಕಿಂಗ್‌ ಖಾನ್ ಶಾರುಖ್ ಅಭಿನಯದ ʼಜವಾನ್‌ʼ ಈ ವರ್ಷದ ಬಹು ನಿರೀಕ್ಷಿತ ಸಿನಿಮಾಗಳಲ್ಲೊಂದು. ಸಿನಿಮಾದ ಬಗ್ಗೆ ದಿನಕಳೆದಂತೆ ಹೈಪ್‌ ಹೆಚ್ಚಾಗುತ್ತಿದೆ. ರಿಲೀಸ್‌ ಡೇಟ್‌ ಹತ್ತಿರವಾಗುತ್ತಿದ್ದಂತೆ, ಟ್ರೇಲರ್‌ ರಿಲೀಸ್‌ ಗಾಗಿ ಪ್ರೇಕ್ಷಕರು ಕಾಯುತ್ತಿದ್ದಾರೆ.
ಕಾಲಿವುಡ್‌ ನ ಸೂಪರ್‌ ಹಿಟ್‌ ನಿರ್ದೇಶಕ ಅಟ್ಲಿ ನಿರ್ದೇಶನದಲ್ಲಿ ʼಜವಾನ್‌ʼ ಮೂಡಿ ಬರುತ್ತಿದೆ. ಈಗಾಗಲೇ ಸಿನಿಮಾದ ಟೀಸರ್‌ ಹಾಗೂ ಹಾಡುಗಳು ಗಮನ ಸೆಳೆದಿದೆ. ಶಾರುಖ್ ಖಾನ್ ಅವರ ʼಜವಾನ್‌ʼ ಲುಕ್‌ ನೋಡಿ ಫ್ಯಾನ್ಸ್ ಫಿದಾ ಆಗಿದ್ದಾರೆ.
ಕನ್ನಡ, ತಮಿಳು, ಮಲಯಾಳಂ ಸೇರಿದಂತೆ ಇತರೆ ಭಾಷೆಯಲ್ಲಿ ಡಬ್‌ ಆಗಿ ʼಜವಾನ್‌ʼ ತೆರೆ ಕಾಣುತ್ತಿದೆ. ಹಿಂದಿಯಲ್ಲಿ ಶಾರುಖ್ ಅವರು ಡಬ್‌ ಮಾಡಿದ್ದು, ಕನ್ನಡ ಹಾಗೂ ಇತರೆ ಭಾಷೆಯಲ್ಲಿ ಅವರ ಧ್ವನಿಗೆ ಬೇರೆ ಕಲಾವಿದರು ಡಬ್‌ ಮಾಡಿದ್ದಾರೆ ಎನ್ನಲಾಗಿದೆ.
ಸಿನಿಮಾಗಳಿಗೆ ರೇಟಿಂಗ್‌ ನೀಡುವ ಐಎಂಡಿಬಿಯಲ್ಲಿ ʼಜವಾನ್‌ʼ ಸಿನಿಮಾದ ಪಟ್ಟಿಯಲ್ಲಿ ಕರಣ್‌ ಜೋಹರ್‌, ರಾಕಿಂಗ್‌ ಸ್ಟಾರ್‌ ಯಶ್ ಹಾಗೂ ಮಲಯಾಳಂ ನಟ ಪೃಥ್ವಿರಾಜ್ ಸುಕುಮಾರನ್ ಅವರಿಗೆ ವಿಶೇಷ ಧನ್ಯವಾದವನ್ನು ಚಿತ್ರತಂಡ ಸಲ್ಲಿಸಿದೆ.
ಈ ಪಟ್ಟಿಯನ್ನು ನೋಡಿದ ಬಳಿಕ ನೆಟ್ಟಿಗರು ಕನ್ನಡ ಹಾಗೂ ಮಲಯಾಳಂ ʼಜವಾನ್‌ʼ ವರ್ಷನ್‌ ಗೆ ಯಶ್ ಹಾಗೂ ಪೃಥ್ವಿರಾಜ್ ವಾಯ್ಸ್ ಡಬ್‌ ಮಾಡಿದ್ದಾರೆ ಎಂದು ಟ್ವೀಟ್‌ ಮಾಡಿ ವಿಚಾರವನ್ನು ಹಂಚಿಕೊಳ್ಳುತ್ತಿದ್ದಾರೆ. ಆದರೆ ತಮಿಳಿನಲ್ಲಿ ಯಾರು ಡಬ್‌ ಮಾಡಿದ್ದಾರೆ ಎನ್ನುವ ಬಗ್ಗೆ ಪ್ರಶ್ನಿಸಿದ್ದಾರೆ.
ಸದ್ಯ ಯಶ್, ಪೃಥ್ವಿರಾಜ್ ವಾಯ್ಸ್ ಡಬ್‌ ವಿಚಾರ ವೈರಲ್ ಆಗಿದ್ದು, ಈ ಬಗ್ಗೆ ಚಿತ್ರತಂಡ ಅಧಿಕೃತವಾಗಿ ಎಲ್ಲೂ ಹೇಳಿಲ್ಲ.
ಈ ಹಿಂದೆ ಶಾರುಖ್ ಖಾನ್ ಯಶ್,ದಳಪತಿ ವಿಜಯ್, ರಜಿನಿಕಾಂತ್‌ ಅವರ ಸಿನಿಮಾಗಳು ನನಗೆ ʼಜವಾನ್‌ʼ ನಲ್ಲಿನ ಪಾತ್ರಕ್ಕೆ ತಯರಾಗಲು ನೆರವಾಯಿತೆಂದು ಹೇಳಿದ್ದರು.
ʼಜವಾನ್‌ʼ ನಲ್ಲಿ ದಳಪತಿ ವಿಜಯ್ ನಟಿಸಿದ್ದಾರೆ ಎನ್ನಲಾಗುತ್ತಿದೆ. ಸಿನಿಮಾದಲ್ಲಿ ನಯನತಾರಾ, ವಿಜಯ್ ಸೇತುಪತಿ ಸೇರಿದಂತೆ ಇತರ ಪ್ರಮುಖರು ನಟಿಸಿದ್ದಾರೆ. ಇದೇ ಸೆ.7 ರಂದು ʼಜವಾನ್‌ʼ ವರ್ಲ್ಡ್‌ ವೈಡ್‌ ತೆರೆಗೆ ಬರಲಿದೆ.
