Yadagiri: ವಕ್ಫ್ ಹೋರಾಟ ರೈತರ ಪರವಾಗಿದೆ: ಶಾಸಕ ಯತ್ನಾಳ

ಯಾದಗಿರಿ: ರೈತರಿಗೆ ರಾಜ್ಯದಲ್ಲಿ ವಕ್ಫ್ ನೆಪದಲ್ಲಿ ಅನ್ಯಾಯವಾಗುತ್ತಿದೆ. ನಮ್ಮ ಹೋರಾಟ ಇರುವುದು ವಕ್ಫ್ ಬೋರ್ಡ ದಿಂದ ಅನ್ಯಾಯಕ್ಕೊಳಗಾದ ರೈತರ ಪರವಾಗಿ, ಮಠಾಧೀಶರ ಪರವಾಗಿದೆ. ಇದು ಯಾರ ವಿರುದ್ಧವೂ ಅಲ್ಲ. ಇದು ಸಹಿಸದವರು ಏನೇನೋ ಹೇಳುತ್ತಾರೆ ಎಂದು ಬಿಜೆಪಿ ನಾಯಕ, ಹಿರಿಯ ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ್ ಹೇಳಿದರು.

ಇತ್ತೀಚಿಗೆ ನಿಧನರಾದ ಮಾಜಿ ಶಾಸಕ ವೆಂಕಟರಡ್ಡಿ ಮುದ್ನಾಳ್ ಅವರ ಇಲ್ಲಿನ ನಿವಾಸಕ್ಕೆ ಮಂಗಳವಾರ (ನ.26) ರಾತ್ರಿ ಭೇಟಿ ನೀಡಿದ ಸಂದರ್ಭದಲ್ಲಿ ಅವರು ಮಾಧ್ಯಮದವರೊಂದಿಗೆ ಮಾತನಾಡಿದರು.

ಪಕ್ಷದ ವೇದಿಕೆಯಿಂದ ಹೋರಾಟ ನಡೆಸಬೇಕು ಎಂದು ಹೇಳಿದ ಸಿ.ಟಿ.ರವಿ ಹೇಳಿಕೆಗೆ ಪ್ರತಿಕ್ರಿಯಿಸಿದ ಅವರು, ರವಿ ನಿತ್ಯ ನಮ್ಮ ಟೀಂ ಜೊತೆ ದೂರವಾಣಿ ಮೂಲಕ ಮಾತನಾಡುತ್ತಾರೆ. ನಿಮ್ಮ ಹೋರಾಟ ಸತ್ಯದ ಪರ ಇದೆ ಎಂದು ನಮಗೆ ಹೇಳಿ ಈಗ ಹೀಗೆ ಹೇಳಿದ್ದಾರೆಂದರೆ ಅವರನ್ನೇ ಕೇಳಿ ಎಂದರು.

ನಾವು ಶಾಸಕರನ್ನು, ಮುಖಂಡರನ್ನು ನಂಬಿ ಈ ಹೋರಾಟ ಹಮ್ಮಿಕೊಂಡಿಲ್ಲ, ನಮ್ಮ ಜೊತೆ ಕಾರ್ಯಕರ್ತರಿದ್ದಾರೆ, ರೈತರಿದ್ದಾರೆ ಎಂದು ಹೇಳಿದರು.