Advertisement
ಅಮೆರಿಕದ ನೂತನ ಅಧ್ಯಕ್ಷ ಜೋ ಬೈಡೆನ್‌ (78)ಅವರು ಡಿಸೆಂಬರ್‌ನಲ್ಲಿ ಮೊದಲ ಲಸಿಕೆ ಪಡೆದಿದ್ದಾರೆ. ಜನವರಿ ತಿಂಗಳ ಎರಡನೇ ವಾರದಲ್ಲಿ ಎರಡನೇ ಲಸಿಕೆ ಪಡೆದಿದ್ದಾರೆ. ವಿಶೇಷ ಎಂದರೆ ತಾವು ಅಧ್ಯಕ್ಷರಾಗಿ ಅಧಿಕಾರ ಸ್ವೀಕರಿಸುವ ಮುನ್ನವೇ ಅವರು ಲಸಿಕೆಯನ್ನು ಹಾಕಿಸಿಕೊಂಡಿದ್ದಾರೆ. ಈ ಮೂಲಕ ಆ ದೇಶದ ಆರೋಗ್ಯ ಇಲಾಖೆಯ ಮೇಲಿನ ನಂಬಿಕೆಯನ್ನು ಮತ್ತಷ್ಟು ಹೆಚ್ಚಿಸಿದ್ದರು. ಯಾಕೆಂದರೆ ಆಗಿನ್ನೂ ಟ್ರಂಪ್‌ ಅವರು ಅಧ್ಯಕ್ಷರಾಗಿದ್ದರು. ಫೈಜರ್‌-ಬಯೋಟೆಕ್‌ ಲಸಿಕೆಯನ್ನು ಬೈಡೆನ್‌ ಅವರು ಟಿವಿ ನೇರ ಪ್ರಸಾರ ಕಾರ್ಯಕ್ರಮದಲ್ಲಿ ಪಡೆದಿದ್ದರು. ಹಿರಿಯ ವಯಸ್ಸಿನವರಾಗಿರುವ ಬೈಡೆನ್‌ ಅವರು ಸುಲಭವಾಗಿ ಕೋವಿಡ್ ಸೋಂಕಿಗೆ ಒಳಗಾಗುವ ಸಾಧ್ಯತೆ ಇತ್ತು.
Related Articles
ಅಮೆರಿಕದ ಉಪಾಧ್ಯಕ್ಷೆ, ಭಾರತೀಯ ಮೂಲದ ಕಮಲಾ ಹ್ಯಾರಿಸ್‌ ಅವರು ಜೋ ಬೈಡೆನ್‌ ಅವರು ಲಸಿಕೆ ಸ್ವೀಕರಿಸಿದ ವಾರದ ಬಳಿಕ ಅಂದರೆ ಡಿಸೆಂಬರ್‌ 31ರಂದು ಲಸಿಕೆಯನ್ನು ಪಡೆದರು. ಮಾಡೆರ್ನಾ ಲಸಿಕೆಯನ್ನು ಕಮಲಾ ಹ್ಯಾರಿಸ್‌ ಅವರು ಮಾಧ್ಯಮಗಳ ಎದುರಿನಲ್ಲೇ ಹಾಕಿಸಿಕೊಂಡು ಜನರಲ್ಲಿ ಆತ್ಮವಿಶ್ವಾಸವನ್ನು ಹೆಚ್ಚಿಸುವ ಪ್ರಯತ್ನ ಮಾಡಿದರು.
Advertisement
ಇಸ್ರೇಲ್‌ನ ಪ್ರಧಾನ ಮಂತ್ರಿ ಬೆಂಜಮಿನ್‌ ನೆತನ್ಯಾಹು ಅವರು ಡಿಸೆಂಬರ್‌ 20ರಂದು ಫೈಜರ್‌ ಕೋವಿಡ್ -19 ಲಸಿಕೆ ಪಡೆದರು. ಆ ಮೂಲಕ ದೇಶವ್ಯಾಪಿ ಲಸಿಕಾ ಅಭಿಯಾನಕ್ಕೆ ಚಾಲನೆ ನೀಡಲಾಯಿತು. ಇದು ಇಸ್ರೇಲ್‌ನ ಟಿವಿ ಕಾರ್ಯಕ್ರಮಗಳಲ್ಲಿ ನೇರ ಪ್ರಸಾರವಾಗಿತ್ತು. ಈ ಮೂಲಕ ಇಸ್ರೇಲಿಗರಿಗೆ ಲಸಿಕೆ ಕುರಿತಾಗಿದ್ದ ಭಯವನ್ನು ಹೋಗಲಾಡಿಸುವ ಪ್ರಯತ್ನ ಮಾಡಿದ್ದರು.
ಸೌದಿ ಅರೇಬಿಯಾದ ರಾಜ ಸಲ್ಮಾನ್‌ ಜನವರಿ ತಿಂಗಳ ಆರಂಭದಲ್ಲಿ ಲಸಿಕೆಯನ್ನು ಪಡೆದಿದ್ದಾರೆ. ಮಧ್ಯಪ್ರಾಚ್ಯದ ಸಾಮ್ರಾಜ್ಯವು ಮೂರು-ಹಂತದ ಇನಾಕ್ಯುಲೇಶನ್‌ ಕಾರ್ಯಕ್ರಮವನ್ನು ಪ್ರಾರಂಭಿಸಿದ ಬಳಿಕ ರಾಜ ಸಲ್ಮಾನ್‌ ಲಸಿಕೆ ಪಡೆದಿದ್ದರು. ಸೌದಿ ಅರೇಬಿಯಾ ಫೈಜರ್‌-ಬಯೋಟೆಕ್‌ ಲಸಿಕೆಯನ್ನು ಅನುಮೋದಿಸಿತ್ತು. ದುಬಾೖ ಆಡಳಿತಗಾರ ಶೇಖ್‌ ಮೊಹಮ್ಮದ್‌ ಬಿನ್‌ ರಶೀದ್‌ ಅಲ…-ಮಕೌ¤ಮ್‌ ನವೆಂಬರ್‌ನಲ್ಲೇ ಲಸಿಕೆ ಹಾಕಿಸಿಕೊಂಡಿದ್ದರು.
94 ವರ್ಷದ ಬ್ರಿಟನ್‌ನ ರಾಣಿ ಎಲಿಜಬೆತ್‌ ಮತ್ತು ಅವರ ಪತಿ ಪ್ರಿನ್ಸ್‌ ಫಿಲಿಪ್‌ (99) ಅವರು ಜನವರಿ ತಿಂಗಳಿನಲ್ಲಿ ಲಸಿಕೆ ಪಡೆದಿದ್ದಾರೆ. ತುರ್ತು ಬಳಕೆಗಾಗಿ ಫೈಜರ್‌-ಬಯೋಟೆಕ್‌ ಕೊರೊನಾ ವೈರಸ್‌ ಲಸಿಕೆಯನ್ನು ಅನುಮೋದಿಸಿದ ವಿಶ್ವದ ಮೊದಲ ದೇಶ ಎಂಬ ಹೆಗ್ಗಳಿಕೆಗೆ ಯುಕೆ ಪಾತ್ರವಾಗಿತ್ತು. ಇಂಗ್ಲೆಂಡ್‌ನ‌ಲ್ಲಿ ರಾಷ್ಟ್ರವ್ಯಾಪಿಯಾಗಿ ಲಸಿಕೆ ಕಾರ್ಯಕ್ರಮ ನಡೆಯುತ್ತಿದೆ.
ಯುಎನ್‌ ಸೆಕ್ರೆಟರಿ ಜನರಲ್‌ ಆಂಟೋನಿಯೊ ಗುಟೆರೆಸ್‌ ಜನವರಿಯಲ್ಲಿ ಕೋವಿಡ್-19 ಲಸಿಕೆಯನ್ನು ಪಡೆದರು. ಬಳಿಕ ಅವರು ಕೋವಿಡ್ ಹೋಗಲಾಡಿಸಲು ಅಂತಾರಾಷ್ಟ್ರೀಯ ಸಮೂಹವನ್ನು ಕೋರಿಕೊಂಡಿದ್ದು, ಲಸಿಕೆಯ ಕುರಿತು ಇರುವ ಭಯದಿಂದ ಹೊರಬರುವಂತೆ ಮನವಿ ಮಾಡಿದ್ದರು.
ಲಸಿಕೆ ಪಡೆದ ವಿಶ್ವ ನಾಯಕರ ಪಟ್ಟಿಗೆ ಪೋಪ್‌ ಫ್ರಾನ್ಸಿಸ್‌ ಮತ್ತು ಅವರ ಹಿಂದಿನ ಪೋಪ್‌ ಬೆನೆಡಿಕ್ಟ್ ಇತ್ತೀಚೆಗೆ ಸೇರ್ಪಡೆಯಾಗಿದ್ದರು. ಬಳಿಕ ಜನರಲ್ಲಿ ಮನವಿ ಮಾಡಿರುವ ಅವರು ಲಸಿಕೆ ಪಡೆಯುವುದು ನೈತಿಕ ಕರ್ತವ್ಯ. ತಮ್ಮನ್ನು ಮಾತ್ರವಲ್ಲದೆ ತಮ್ಮ ಸುತ್ತಮುತ್ತಲಿನ ವರನ್ನು ಸಹ ರಕ್ಷಿಸುವುದು ನಮ್ಮ-ನಿಮ್ಮೆಲ್ಲರ ಆದ್ಯ ಕರ್ತವ್ಯ ಎಂದಿದ್ದರು.
ಇಂಡೋನೇಷ್ಯಾ ಅಧ್ಯಕ್ಷ ಜೋಕೊ ವಿಡೊಡೋ ಅವರು ಚೀನದ ಕೋವಿಡ್ -19 ಲಸಿಕೆ ಸಿನೋವಾಕ್‌ನ ಮೊದಲ ಲಸಿಕೆಯನ್ನು ಜನವರಿಯಲ್ಲಿ ಸ್ವೀಕರಿಸಿದ್ದಾರೆ. ಗಮನಾರ್ಹ ಸಂಗತಿ ಎಂದರೆ ಈ ಲಸಿಕೆ ಕೊನೆಯ ಹಂತದ ಕ್ಲಿನಿಕಲ್‌ ಪ್ರಯೋಗಗಳಲ್ಲಿ ಶೇ. 65.3ರಷ್ಟು ಪರಿಣಾಮಕಾರಿಯಾಗಿದೆ ಎಂದು ವರದಿ ಹೇಳಿತ್ತು. ಹೀಗಿದ್ದರೂ ಜೋಕೊ ಅವರು ಧೈರ್ಯದಿಂದ ಈ ಲಸಿಕೆಯನ್ನು ಪಡೆದಿದ್ದಾರೆ.