ಐಪಿಎಲ್ ಪ್ರದರ್ಶನ ವಿಶ್ವಕಪ್ ಆಯ್ಕೆಗೆ ಮಾನದಂಡವಲ್ಲ: ಕೊಹ್ಲಿ

ಹೈದರಾಬಾದ್: ಮಾರ್ಚ್ 23ರಿಂದ ಆರಂಭವಾಗಲಿರುವ ಇಂಡಿಯನ್ ಪ್ರೀಮಿಯರ್ ಲೀಗ್ ನಲ್ಲಿನ ಭಾರತೀಯ ಆಟಗಾರರ ಪ್ರದರ್ಶನ ವಿಶ್ವಕಪ್ ತಂಡಕ್ಕೆ ಮಾನದಂಡವಲ್ಲ ಎಂದು ಭಾರತೀಯ ಕ್ರಿಕೆಟ್ ನಾಯಕ ವಿರಾಟ್ ಕೊಹ್ಲಿ ಹೇಳಿದ್ದಾರೆ.

ಐಪಿಎಲ್ ನಲ್ಲಿನ ಭಾರತೀಯ ಆಟಗಾರರ ಪ್ರದರ್ಶನದ ಮೇರೆಗೆ ವಿಶ್ವಕಪ್ ತಂಡವನ್ನು ಅಂತಿಮ ಮಾಡಲಾಗುವುದಿಲ್ಲ. ವಿಶ್ವಕಪ್ ತಂಡದ ಆಯ್ಕೆಗೆ ಅದರದೇ ಆದ ಕೆಲವು ಮಾನದಂಡಗಳಿವೆ ಎಂದು ವಿರಾಟ್ ಕೊಹ್ಲಿ ಅಭಿಪ್ರಾಯ ಪಟ್ಟಿದ್ದಾರೆ.

ವಿಶ್ವಕಪ್ ಗಾಗಿ ನಮಗೆ ಅದ್ಭುತ ತಂಡದ ಅಗತ್ಯವಿದೆ. ಐಪಿಎಲ್ ಗಿಂತಲೂ ಮೊದಲೇ ಈ ತಂಡ ಅಂತಿಮವಾಗುತ್ತದೆ. ಐಪಿಎಲ್ ನಂತರ ಈ ತಂಡದಲ್ಲಿ ಬದಲಾವಣೆ ಆಗುತ್ತದೆ ಎಂದು ನನಗನಿಸುವುದಿಲ್ಲ. ಒಂದೆರಡು ಭಾರತೀಯ ರಾಷ್ಟ್ರೀಯ ತಂಡದ ಆಟಗಾರರು ಐಪಿಎಲ್ ನಲ್ಲಿ ಉತ್ತಮ ಪ್ರದರ್ಶನ ನೀಡದೇ ಇರಬಹುದು. ಹಾಗಾದಲ್ಲಿ ವಿಶ್ವಕಪ್ ತಂಡಕ್ಕೆ ಅವರನ್ನು ಪರಿಗಣಿಸುವುದಿಲ್ಲ ಎಂದರ್ಥವಲ್ಲ ಎಂದು ಕೊಹ್ಲಿ ಅಭಿಪ್ರಾಯಪಟ್ಟರು. 

ಭಾರತದ ವಿಶ್ವಕಪ್ ತಂಡ ಬಹುತೇಕ ಅಂತಿಮವಾಗಿದ್ದು, ಉಳಿದಿರುವ ಒಂದೆರಡು ಸ್ಥಾನಗಳ ಆಯ್ಕೆ ಆಗಬೇಕಿದೆ. ಹಾಲಿ ಚಾಂಪಿಯನ್ ವಿರುದ್ಧ ಶನಿವಾರದಿಂದ ಏಕದಿನ ಸರಣಿ ಆರಂಭವಾಗುತ್ತಿದ್ದು, ಇದನ್ನು ವಿಶ್ವಕಪ್ ಅಭ್ಯಾಸ ಸರಣಿ ಎಂದೇ ಪರಿಗಣಿಸಲಾಗುತ್ತಿದೆ.