ರಾಜಸ್ತಾನಕ್ಕೆ ಮರಳಿದ 22 ಜನರಿಗೆ ಬೀಳ್ಕೊಡುಗೆ

ಖಾನಾಪುರ: ಪಟ್ಟಣದಲ್ಲಿ ಕಬ್ಬಿನ ರಸ ಮಾರಾಟ ಮಾಡಿ ಬದುಕು ಸಾಗಿಸುತ್ತಿದ್ದ ಆರು ಕುಟುಂಬಗಳು ಲಾಕ್‌ ಡೌನ್‌ದಿಂದ ಸಮಸ್ಯೆಗೆ ಸಿಲುಕಿ ಕೊನೆಗೂ ತಮ್ಮ ತವರು ರಾಜಸ್ತಾನಕ್ಕೆ ತೆರಳಿವೆ. ಬಿಜೆಪಿ ಮುಖಂಡ ರಾಜೇಂದ್ರ ರಾಯಕಾ ಈ ಕುಟುಂಬಗಳು ಮರಳಲು ಸಹಾಯ ಮಾಡಿದ್ದಾರೆ.

ಕಳೆದ ಎರಡು ತಿಂಗಳಿಂದ ಉದ್ಯೋಗ ಇಲ್ಲದೇ ಈ ಕುಟುಂಬಗಳು ಪರದಾಡುವಂತಾಗಿತ್ತು. ಕಬ್ಬಿನ ರಸ ಮಾರುವ ಗೋಟುಸಿಂಗ ಮತ್ತು ಕಿಶನಲಾಲ್‌ ಅವರು ರಾಜೇಂದ್ರ ರಾಯಕಾ ಅವರನ್ನು ಭೇಟಿಯಾಗಿ ಸಹಾಯ ಮಾಡುವಂತೆ ಮನವಿ ಮಾಡಿದ್ದರು. ರಾಯಕಾ ಇ-ಪಾಸ್‌ ವ್ಯವಸ್ಥೆ ಮಾಡಿ ಅವರನ್ನು ಕಳುಹಿಸಿದ್ದಾರೆ.

ರಾಜೇಂದ್ರ ರಾಯಕಾ, ಬಿಜೆಪಿ ಬ್ಲಾಕ್‌ ಅಧ್ಯಕ್ಷ ಸಂಜಯ ಕುಬಲ್‌, ಜಿಲ್ಲಾ ಉಪಾಧ್ಯಕ್ಷ ಪ್ರಮೋದ ಕೊಚೇರಿ, ಮಹಾಂತೇಶ ಬಾಳೇಕುಂದ್ರಿ, ತಾನಾಜಿ ಗೊರಲ್‌, ಹರ್ಷಾ ರಾಯಕಾ, ಗುಲಾಬ ಜೈನ್‌ ಇತರರು ಬಸ್‌ ನಿಲ್ದಾಣದಲ್ಲಿ ರಾಜಸ್ತಾನಿ ಕುಟುಂಬಗಳನ್ನು ಬೀಳ್ಕೊಟ್ಟರು.