Advertisement

ವನಿತಾ ಟಿ20 ಚಾಲೆಂಜ್‌: ವೆಲಾಸಿಟಿಗೆ 7 ವಿಕೆಟ್‌ ವಿಕ್ಟರಿ

10:43 PM May 24, 2022 | Team Udayavani |

ಪುಣೆ: ಓಪನರ್‌ ಶಫಾಲಿ ವರ್ಮ ಮತ್ತು ಮಧ್ಯಮ ಕ್ರಮಾಂಕದ ಆಟಗಾರ್ತಿ ಲಾರಾ ವೋಲ್ವಾರ್ಟ್‌ ಸಿಡಿಸಿದ ಆಕರ್ಷಕ ಅರ್ಧ ಶತಕ ಸಾಹಸದಿಂದ ವನಿತಾ ಟಿ20 ಚಾಲೆಂಜರ್‌ ಸರಣಿಯ ಮಂಗಳವಾರದ ಪಂದ್ಯದಲ್ಲಿ ವೆಲಾಸಿಟಿ ತಂಡ 7 ವಿಕೆಟ್‌ಗಳಿಂದ ಸೂಪರ್‌ ನೋವಾವನ್ನು ಮಣಿಸಿದೆ.

Advertisement

ಮೊದಲು ಬ್ಯಾಟಿಂಗ್‌ ನಡೆಸಿದ ಸೂಪರ್‌ ನೋವಾ 5 ವಿಕೆಟಿಗೆ 150 ರನ್‌ ಪೇರಿಸಿದರೆ, ವೆಲಾಸಿಟಿ 18.2 ಓವರ್‌ಗಳಲ್ಲಿ ಮೂರೇ ವಿಕೆಟ್‌ ಕಳೆದುಕೊಂಡು ಗುರಿ ಮುಟ್ಟಿತು.

ಸೂಪರ್‌ ನೋವಾ ತನ್ನ ಮೊದಲ ಮುಖಾಮುಖಿಯಲ್ಲಿ . ಟ್ರೈಬ್ಲೇಜರ್ ತಂಡವನ್ನು ಮಣಿಸಿತ್ತು. ವೆಲಾಸಿಟಿ-ಟ್ರೈಬ್ಲೇಜರ್ ಗುರುವಾರ ಮುಖಾಮುಖಿಯಲ್ಲಿಯಾಗಲಿವೆ.

ಸೂಪರ್‌ ನೋವಾ 18 ರನ್ನಿಗೆ 3 ವಿಕೆಟ್‌ ಕಳೆದುಕೊಂಡ ಬಳಿಕ ನಾಯಕಿ ಹರ್ಮನ್‌ಪ್ರೀತ್‌ ಕೌರ್‌ ಮತ್ತು ಕೀಪರ್‌ ತನಿಯಾ ಭಾಟಿಯಾ ಸೇರಿಕೊಂಡು ತಂಡವನ್ನು ಆಧರಿಸತೊಡಗಿದರು. 4ನೇ ವಿಕೆಟಿಗೆ 82 ರನ್‌ ಪೇರಿಸಿದರು. ನಾಯಕಿಯ ಆಟವಾಡಿದ ಕೌರ್‌ 51 ಎಸೆತ ಎದುರಿಸಿ ಪಂದ್ಯದಲ್ಲೇ ಸರ್ವಾಧಿಕ 71 ರನ್‌ ಬಾರಿಸಿದರು. ಸಿಡಿಸಿದ್ದು 7 ಬೌಂಡರಿ ಹಾಗೂ 3 ಸಿಕ್ಸರ್‌. ಭಾಟಿಯಾ ಗಳಿಕೆ 32 ಎಸೆತಗಳಿಂದ 36 ರನ್‌. ಸುನೆ ಲುಸ್‌ ಔಟಾಗದೆ 20 ರನ್‌ ಮಾಡಿದರು.

ಚೇಸಿಂಗ್‌ ವೇಳೆ ಶಫಾಲಿ ವರ್ಮ ಸಿಡಿದು ನಿಂತರು. 33 ಎಸೆತ ನಿಭಾಯಿಸಿದ ಅವರು 9 ಬೌಂಡರಿ, ಒಂದು ಸಿಕ್ಸರ್‌ ನೆರವಿನಿಂದ 51 ರನ್‌ ಹೊಡೆದರು. ವೋಲ್ವಾರ್ಟ್‌ ತಮ್ಮ ಏಕೈಕ ಸಿಕ್ಸರ್‌ ಮೂಲಕ ಅರ್ಧ ಶತಕ ಪೂರ್ತಿಗೊಳಿಸಿದರು.

Advertisement

ಅವರ ಅಜೇಯ 51 ರನ್‌ 35 ಎಸೆತಗಳಿಂದ ಬಂತು. 7 ಬೌಂಡರಿ, ಒಂದು ಸಿಕ್ಸರ್‌ ಇದರಲ್ಲಿ ಸೇರಿತ್ತು. ನಾಯಕಿ ದೀಪ್ತಿ ಶರ್ಮ 24 ರನ್‌ ಮಾಡಿ ಅಜೇಯರಾಗಿ ಉಳಿದರು.

ಸಂಕ್ಷಿಪ್ತ ಸ್ಕೋರ್‌: ಸೂಪರ್‌ ನೋವಾ-5 ವಿಕೆಟಿಗೆ 150 (ಕೌರ್‌ 71, ತನಿಯಾ 36, ಲುಸ್‌ ಔಟಾಗದೆ 20. ಕೇಟ್‌ ಕ್ರಾಸ್‌ 24ಕ್ಕೆ 2). ವೆಲಾಸಿಟಿ-18.2 ಓವರ್‌ಗಳಲ್ಲಿ 3 ವಿಕೆಟಿಗೆ 151 (ಶಫಾಲಿ 51, ವೋಲ್ಟಾರ್ಟ್‌ ಔಟಾಗದೆ 51, ದೀಪ್ತಿ ಔಟಾಗದೆ 24, ಡಿಯಾಂಡ್ರ ಡಾಟಿನ್‌ 21ಕ್ಕೆ 2).

ಪಂದ್ಯಶ್ರೇಷ್ಠ: ಹರ್ಮನ್‌ಪ್ರೀತ್‌ ಕೌರ್‌.

ಪ್ರೊಪೋಸಲ್‏ಗೆ ನಿರೀಕ್ಷಿಸುತ್ತಿದ್ದೀರಾ? ಕನ್ನಡ ಮ್ಯಾಟ್ರಿಮೋನಿಯಲ್ಲಿ - ಉಚಿತ ನೋಂದಣಿ !

Advertisement

Udayavani is now on Telegram. Click here to join our channel and stay updated with the latest news.

Next