Women’s ಟಿ20: ಇಂಗ್ಲೆಂಡ್‌ ವಿರುದ್ಧ ಆಸ್ಟ್ರೇಲಿಯ ವಿಜಯ

ಬರ್ಮಿಂಗ್‌ಹ್ಯಾಮ್‌: ಇಂಗ್ಲೆಂಡ್‌ ಎದುರಿನ ವನಿತಾ ಟಿ20 ಸರಣಿಯಲ್ಲಿ ಪ್ರವಾಸಿ ಆಸ್ಟ್ರೇಲಿಯ ಗೆಲುವಿನ ಆರಂಭ ಪಡೆದಿದೆ. ಇಲ್ಲಿನ ಎಜ್‌ಬಾಸ್ಟನ್‌ ಅಂಗಳದಲ್ಲಿ ನಡೆದ ಪಂದ್ಯವನ್ನು 4 ವಿಕೆಟ್‌ಗಳಿಂದ ತನ್ನದಾಗಿಸಿಕೊಂಡಿದೆ.

ಬ್ಯಾಟಿಂಗ್‌ಗೆ ಇಳಿಸಲ್ಪಟ್ಟ ಇಂಗ್ಲೆಂಡ್‌ 7 ವಿಕೆಟಿಗೆ 153 ರನ್‌ ಗಳಿಸಿದರೆ, ಆಸ್ಟ್ರೇಲಿಯ 19.5 ಓವರ್‌ಗಳಲ್ಲಿ 6 ವಿಕೆಟಿಗೆ 154 ರನ್‌ ಬಾರಿಸಿತು.

ಆಸೀಸ್‌ ಆರಂಭಿಕ ಆಟಗಾರ್ತಿ ಬೆತ್‌ ಮೂನಿ ಅಜೇಯವಾಗಿ ಉಳಿದು ತಂಡವನ್ನು ದಡ ಮುಟ್ಟಿಸಿದರು. ಅವರು 47 ಎಸೆತಗಳಿಂದ 61 ರನ್‌ ಹೊಡೆದರು. ಈ ಪಂದ್ಯಶ್ರೇಷ್ಠ ಇನ್ನಿಂಗ್ಸ್‌ ನಲ್ಲಿ 9 ಬೌಂಡರಿ ಸೇರಿತ್ತು. ಟಹ್ಲಿಯಾ ಮೆಕ್‌ಗ್ರಾತ್‌ 40, ಆ್ಯಶ್ಲೀ ಗಾರ್ಡನರ್‌ 31 ರನ್‌ ಮಾಡಿ ಮಧ್ಯಮ ಕ್ರಮಾಂಕವನ್ನು ಆಧರಿಸಿ ನಿಂತರು. ಇವರಿಬ್ಬರೊಂದಿಗೆ ಮೂನಿ ಉತ್ತಮ ಜತೆಯಾಟ ನಿಭಾಯಿಸಿದರು. 2ನೇ ವಿಕೆಟಿಗೆ 49 ರನ್‌, 3ನೇ ವಿಕೆಟಿಗೆ 61 ರನ್‌ ಒಟ್ಟುಗೂಡಿತು.

ಇಂಗ್ಲೆಂಡ್‌ ಇನ್ನಿಂಗ್ಸ್‌ ಆಧರಿಸಿದವರು ಆರಂಭಿಕ ಆಟಗಾರ್ತಿ ಸೋಫಿಯಾ ಡಂಕ್ಲಿ. ಅವರು 56 ರನ್‌ ಹೊಡೆದರು (49 ಎಸೆತ, 6 ಬೌಂಡರಿ). ಆ್ಯಮಿ ಜೋನ್ಸ್‌ 40, ನಾಯಕಿ ಹೀತರ್‌ ನೈಟ್‌ 29 ರನ್‌ ಮಾಡಿದರು. ಆಸ್ಟ್ರೇಲಿಯದ ಎಡಗೈ ಸ್ಪಿನ್ನರ್‌ ಜೆಸ್‌ ಜೊನಾಸೆನ್‌ 3 ವಿಕೆಟ್‌ ಕಿತ್ತರು.