Women’s Premier League : ಒಂದು ರನ್ನಿನಿಂದ ಗೆದ್ದ ಯುಪಿ

ಹೊಸದಿಲ್ಲಿ: ಅಗ್ರಸ್ಥಾನಿ ಡೆಲ್ಲಿ ಕ್ಯಾಪಿಟಲ್ಸ್‌ ವಿರುದ್ಧ ಸಣ್ಣ ಮೊತ್ತ ದಾಖಲಿಸಿಯೂ ಯುಪಿ ವಾರಿಯರ್ ಗೆಲುವು ಕಾಣುವಲ್ಲಿ ಯಶಸ್ವಿಯಾಗಿದೆ. ಅಂತರ ಕೇವಲ ಒಂದು ರನ್‌!

ಯುಪಿ 8 ವಿಕೆಟಿಗೆ 138 ರನ್‌ ಗಳಿಸಿದರೆ, ಡೆಲ್ಲಿ 19.5 ಓವರ್‌ಗಳಲ್ಲಿ 137ಕ್ಕೆ ಆಲೌಟ್‌ ಆಯಿತು. ಇದು 7 ಪಂದ್ಯಗಳಲ್ಲಿ ಯುಪಿ ಸಾಧಿಸಿದ 3ನೇ ಜಯ. ಡೆಲ್ಲಿ 6 ಪಂದ್ಯಗಳಲ್ಲಿ 2ನೇ ಸೋಲುಂಡಿತು.

ಡೆಲ್ಲಿ ಚೇಸಿಂಗ್‌ ವೇಳೆ ನಾಯಕಿ ಮೆಗ್‌ ಲ್ಯಾನಿಂಗ್‌ 60 ರನ್‌ ಬಾರಿಸಿದರು (46 ಎಸೆತ, 12 ಬೌಂಡರಿ). ಆದರೆ ಅನಂತರ ಯುಪಿ ಬೌಲಿಂಗ್‌ ಬಿಗಿಗೊಂಡಿತು. ದೀಪ್ತಿ ಶರ್ಮ 19ನೇ ಓವರ್‌ನಲ್ಲಿ 3 ವಿಕೆಟ್‌ ಹಾರಿಸಿ ಪಂದ್ಯಕ್ಕೆ ತಿರುವು ಕೊಟ್ಟರು. ಅಂತಿಮ ಓವರ್‌ನಲ್ಲಿ ಮತ್ತೆ 3 ವಿಕೆಟ್‌ ಬಿತ್ತು. ಕೊನೆಯ 2 ಓವರ್‌ಗಳಲ್ಲಿ 6 ವಿಕೆಟ್‌ ಉಡಾಯಿಸಿದ ಯುಪಿ ಅಮೋಘ ಬೌಲಿಂಗ್‌ ಪರಾಕ್ರಮ ಮೆರೆಯಿತು.

ದೀಪ್ತಿ ಶರ್ಮ ಅವರ ಅರ್ಧ ಶತಕದಿಂದಾಗಿ ಯುಪಿ ಗೌರವಯುತ ಮೊತ್ತ ದಾಖಲಿಸಿತು. ದೀಪ್ತಿ ಗಳಿಕೆ 48 ಎಸೆತಗಳಿಂದ 59 ರನ್‌ (6 ಬೌಂಡರಿ, 1 ಸಿಕ್ಸರ್‌). ನಾಯಕಿ ಅಲಿಸ್ಸಾ ಹೀಲಿ 29 ರನ್‌ ಮಾಡಿದರು. ಎರಡಂಕೆಯ ಸ್ಕೋರ್‌ ದಾಖಲಿಸಿದ ಮತ್ತೋರ್ವ ಆಟಗಾರ್ತಿ ಗ್ರೇಸ್‌ ಹ್ಯಾರಿಸ್‌ (14). ಡೆಲ್ಲಿ ಪರ ತಿತಾಸ್‌ ಸಾಧು ಮತ್ತು ರಾಧಾ ಯಾದವ್‌ ತಲಾ 2 ವಿಕೆಟ್‌ ಕೆಡವಿದರು.