ಮಹಿಳೆಯರು ಆರ್ಥಿಕವಾಗಿ ಅಭಿವೃದ್ಧಿ ಹೊಂದಲು ಸಲಹೆ

ಕಕ್ಕೇರಾ: ಮಹಿಳಾ ಸ್ವ-ಸಹಾಯ ಗುಂಪು ರಚಿಸಿಕೊಂಡು ಸಮಾಜದಲ್ಲಿ ಮಹಿಳೆಯರು ಆರ್ಥಿಕವಾಗಿ
ಸದೃಢರಾಗಲು ಶ್ರಮಿಸಬೇಕು ಎಂದು ಮುಖಂಡ ಹಣಮಂತ್ರಾಯಗೌಡ ಜಹಾಗೀರದಾರ ಹೇಳಿದರು.

ಸಮೀಪದ ಬಂದೊಡ್ಡಿ ಗ್ರಾಮದಲ್ಲಿ ಧರ್ಮಸ್ಥಳ ಗ್ರಾಮೀಣಾಭಿವೃದ್ಧಿ ಸಂಸ್ಥೆಯ ವತಿಯಿಂದ ಗುರುವಾರ ಹಮ್ಮಿಕೊಂಡಿದ್ದ ಸಮಾಲೋಚನೆ ಸಭೆಯನ್ನುದ್ದೇಶಿಸಿ ಅವರು ಮಾತನಾಡಿದರು.

ಪುರುಷರಂತೆ ಮಹಿಳೆಯರು ಕೂಡ ಉದ್ಯಮ ಸೇರಿದಂತೆ ವಿವಿಧ ರಂಗದಲ್ಲಿ ಬೆಳೆಯಲು ಸಾಕಷ್ಟು ಅವಕಾಶ ಇವೆ. ಆದರೆ ಆರ್ಥಿಕ ಕೊರತೆಯಿಂದ ಸಾಧಿಸಲು ಸಾಧ್ಯವಾಗುತ್ತಿಲ್ಲ ಎಂದು
ಕಳವಳ ವ್ಯಕ್ತಪಡಿಸಿದರು.

ಸ್ವ-ಸಹಾಯ ಸಂಘದಿಂದಲೇ ಅನೇಕ ಮಹಿಳೆಯರು ಸ್ವಾವಲಂಬನೆ ಜೀವನ ನಡೆಸುತ್ತಿದ್ದಾರೆ. ಹೀಗಾಗಿ ಪ್ರತಿಯೊಂದು ಕಡೆಗೂ ಮಹಿಳಾ ಸಂಘಗಳ ಸಂಖ್ಯೆ ಹೆಚ್ಚಿಸಿ ಮಹಿಳೆಯರನ್ನು ಅಭಿವೃದ್ಧಿ ಕಡೆಗೆ ಗಮನ ಹರಿಸುತ್ತಿರುವ ಧರ್ಮಸ್ಥಳ ಸಂಸ್ಥೆ ಕಾರ್ಯ ಮೆಚ್ಚುವಂತ್ತದು ಎಂದು ಶ್ಲಾಘಿಸಿದರು.

ಈ ವೇಳೆ ಜಿಲ್ಲಾ ನಿರ್ದೇಶಕ ದಿನೇಶ ಎ. ತಾಲೂಕು ಯೋಜನಾಧಿಕಾರಿ ಸಂದೀಪ, ವಲಯ ಮೇಲ್ವಿಚಾರಕ ಮಂಜಪ್ಪ, ಸೇವಾ ಪ್ರತಿನಿಧಿ  ಸೂರಿಯಾ ಬೇಗಂ, ಶರಣಮ್ಮ, ಮಹಿಬೂಬ ಸುರಪುರ, ಹಣಮಂತ ಸೇರಿದಂತೆ ಮಹಿಳಾ ಸ್ವ-ಸಹಾಯ ಸದಸ್ಯರು ಪಾಲ್ಗೊಂಡಿದ್ದರು.