ಕಳ್ಳರಿಂದ್ಲೇ ತನ್ನ ಸೈಕಲ್‌ ಕದ್ದ  ಮಹಿಳೆ!

ಲಂಡನ್‌: ಕಳುವಾಗಿದ್ದ ಸೈಕಲ್‌ ಅನ್ನು ಅದರ ಒಡತಿ ಕಳ್ಳರಿಂದಲೇ ಕದ್ದು ವಾಪಸ್‌ ತಂದ ಕುತೂಹಲಕಾರಿ ಘಟನೆ ಯೊಂದು ಬ್ರಿಟನ್‌ನಲ್ಲಿ ನಡೆದಿದೆ. ವಿಶೇಷವೆಂದರೆ ಕಳುವಾಗಿದ್ದ ತಮ್ಮ  ಸೈಕಲ್‌ ಯಾರ ಬಳಿ ಇದೆ ಎಂದು ಪತ್ತೆ ಹಚ್ಚಲು ಮಹಿಳೆಗೆ ನೆರವಾಗಿರುವುದು ಫೇಸ್‌ಬುಕ್‌! ಬ್ರಿಸ್ಟಾಲ್‌ ಮೂಲದ ಜೆನ್ನಿ ಮೋರ್ಟನ್‌ ಎಂಬವರ ಸೈಕಲ್‌ ಕೆಲ ದಿನಗಳ ಹಿಂದೆ ಕಳುವಾಗಿತ್ತು. ಅದನ್ನು ಹುಡುಕಿ ಕೊಡುವಂತೆ ಜೆನ್ನಿ ಫೇಸ್‌ಬುಕ್‌ನಲ್ಲಿ ಸೈಕಲ್‌ ಚಿತ್ರದೊಂದಿಗೆ ಮನವಿಯೊಂದನ್ನು ಹಾಕಿದ್ದರು.

ಇದೇ ವೇಳೆ ಜೆನ್ನಿ ಅವರ ಸೈಕಲ್‌ ಮಾರಾಟಕ್ಕಿರುವ ಕುರಿತ ಜಾಹೀರಾತೊಂದನ್ನು ಫೇಸ್‌ಬುಕ್‌ನಲ್ಲಿ ಗಮನಿಸಿದ ಆಕೆಯ ಪರಿಚಿತ, ವಿಷಯವನ್ನು ಜೆನ್ನಿಗೆ ತಿಳಿಸಿದ್ದಾನೆ. ಅನಂತರ ಅವರಿಬ್ಬರೂ ಕಳ್ಳನಿಂದ ಸೈಕಲ್‌ ಕೊಳ್ಳಲು ನಿರ್ಧರಿಸಿದ್ದಾರೆ. ಅದರಂತೆ ಜಾಹೀರಾತು ಹಾಕಿದ ಕಳ್ಳನಿಗೆ ಕರೆ ಮಾಡಿದ ಜೆನ್ನಿ, ಸೈಕಲ್‌ ಟೆಸ್ಟ್‌ ರೈಡ್‌ ಮಾಡಬೇಕು ಎಂದಿದ್ದಾರೆ. ಆತ ಕೊಟ್ಟಿದ್ದಾನೆ. ಟೆಸ್ಟ್‌ ರೈಡ್‌ಗೆ ಹೋದ ಜೆನ್ನಿ ತಮ್ಮ ಸೈಕಲ್‌ನೊಂದಿಗೆ ಪರಾರಿಯಾಗಿದ್ದಾರೆ. ಜೆನ್ನಿ ಮತ್ತು ಆಕೆಯ ಸ್ನೇಹಿತನ ನೆರವಿನಿಂದ ಪೊಲೀಸರು ಸೈಕಲ್‌ ಕಳ್ಳನನ್ನು ಬಂಧಿಸಿದ್ದಾರೆ. ‘ಮುಳ್ಳನ್ನ ಮುಳ್ಳಿಂದಲೇ ತೆಗೆಯೋದು’ ಅಂದ್ರೆ ಇದೇ ಅಲ್ಲವೇ?