ಸೌದಿಯಲ್ಲಿ ಜೀತಕ್ಕಿದ್ದ ಮಹಿಳೆ ವಾಪಸ್‌

ಹೈದರಾಬಾದ್‌: ದುಬೈನಲ್ಲಿ ಕೆಲಸ ಸಿಗುತ್ತದೆಂಬ ಭರವಸೆ ನಂಬಿ ಸೌದಿ ಅರೇಬಿಯಾದ ಅಭಾಕ್ಕೆ ತೆರಳಿ ಮೋಸ ಹೋಗಿದ್ದ ಹೈದರಾಬಾದ್‌ ಮೂಲದ ಮಹಿಳೆ, ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್‌ ಅವರ ನೆರವಿನಿಂದ ಸ್ವದೇಶಕ್ಕೆ ಹಿಂದಿರುಗಿದ್ದಾರೆ. ಏ. 9ರಂದು ಹೈದರಾಬಾದ್‌ ವಿಮಾನ ನಿಲ್ದಾಣಕ್ಕೆ ಬಂದಿಳಿದ ಮಹಿಳೆ, ತಮ್ಮನ್ನು ಜೀತದ ಸಂಕಷ್ಟದಿಂದ ಪಾರು ಮಾಡಿದ ಸುಷ್ಮಾಗೆ ಧನ್ಯವಾದ ಅರ್ಪಿಸಿದ್ದಾರೆ.

47 ವರ್ಷದ ಈ ಮಹಿಳೆಗೆ ಸೌದಿಯಲ್ಲಿ ಉತ್ತಮ ಉದ್ಯೋಗ ಕೊಡಿಸುವ ಭರವಸೆ ನೀಡಿದ್ದ ಏಜೆಂಟ್‌ ಒಬ್ಟಾತ, ಆಕೆಯನ್ನು ಹಾಗೂ ಆಕೆಯ ಪತಿಯನ್ನು ನಂಬಿಸಿ ಅಭಾ ನಗರಕ್ಕೆ ಕರೆದೊಯ್ದಿದ್ದ. ಅದರೆ, ಅಲ್ಲಿ ಹೋದ ಮೇಲೆ ತಾನು ಮಾನವ ಕಳ್ಳಸಾಗಣೆಗೆ ಜಾಲಕ್ಕೆ ಸಿಲುಕಿರುವುದು ಆಕೆಯ ಗಮನಕ್ಕೆ ಬಂತು. ಆಕೆಯನ್ನು ಶ್ರೀಮಂತರೊಬ್ಬರ ಮನೆಗೆಲಸಕ್ಕೆ ತಳ್ಳಿದ್ದ ಆ ಏಜೆಂಟ್‌ ಅಲ್ಲಿಂದ ಹೊರಟು ಹೋಗಿದ್ದ. ಆ ಶ್ರೀಮಂತನ ಮನೆಯಲ್ಲಿ ಜೀತದಾಳಾಗಿ ದುಡಿಯಬೇಕಿದ್ದ ಆಕೆ ಶ್ರೀಮಂತನಿಂದ ದೌರ್ಜನ್ಯಕ್ಕೂ ಒಳಗಾಗಿದ್ದಳು. ಅದೊಂದು ದಿನ ಫೋನಿನಲ್ಲಿ ತಮ್ಮ ಪತಿಯನ್ನು ಸಂಪರ್ಕಿಸಿದ ಆಕೆ ತನ್ನ ಪರಿಸ್ಥಿತಿಯನ್ನು ವಿವರಿಸಿದ್ದಳು. ನಂತರ ಆಕೆಯ ಪತಿ ವಿದೇಶಾಂಗ ಇಲಾಖೆಯ ಮೊರೆ ಹೋಗಿದ್ದರು.