ಉತ್ತರ ಪ್ರದೇಶ : ಪಟಾಕಿ ತ್ಯಾಜ್ಯದಲ್ಲಿ ಸ್ಫೋಟ; ಮಹಿಳೆಗೆ ಗಂಭೀರ ಗಾಯ

ಮುಜಫ‌ರನಗರ : ಉತ್ತರ ಪ್ರದೇಶದ ಶಾಮ್ಲಿ ಜಿಲ್ಲೆಯ ಥಾನಾಭವಾನ ಪಟ್ಟಣದಲ್ಲಿ ಸುಡುಮದ್ದುಗಳ ತ್ಯಾಜ್ಯದಲ್ಲಿ ಆಕಸ್ಮಿಕವಾಗಿ ಉಂಟಾದ ಸ್ಫೋಟದಿಂದ ಮಹಿಳೆ ಗಂಭೀರವಾಗಿ ಗಾಯಗೊಂಡ ಘಟನೆ ವರದಿಯಾಗಿದೆ.

ಸುಡುಮದ್ದುಗಳ ತ್ಯಾಜ್ಯಕ್ಕೆ ಮಹಿಳೆಯು ಬೆಂಕಿ ಕೊಟ್ಟಾಗ ಅನಿರೀಕ್ಷಿತವಾಗಿ ಸ್ಫೋಟ ಉಂಟಾಗಿ ಆಕೆ ಗಂಭೀರವಾಗಿ ಗಾಯಗೊಂಡಳು ಎಂದು ಹೆಚ್ಚುವರಿ ಪೊಲೀಸ್‌ ಸುಪರಿಂಟೆಂಡೆಂಟ್‌ ರಾಜೇಶ್‌ ಶ್ರೀವಾಸ್ತವ ತಿಳಿಸಿದರು.

ಶಾಲೆಯೊಂದರ ಸಮೀಪ ತ್ಯಾಜ್ಯಗಳ ರಾಶಿಯಲ್ಲಿ ಪಟಾಕಿ ತ್ಯಾಜ್ಯವೂ ಸೇರಿಕೊಂಡಿತ್ತು ಎಂದವರು ಹೇಳಿದರು.

ಗಾಯಾಳು ಮಹಿಳೆಯನ್ನು ಲತಾ ಬಾಲ್ಮೀಕಿ ಎಂದು ಗುರುತಿಸಲಾಗಿದ್ದು ಆಕೆಯನ್ನು ಆಸ್ಪತ್ರೆಗೆ ಸೇರಿಸಲಾಗಿದೆ. ಪೊಲೀಸರು ಕೇಸು ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.