ಚಲಿಸುತ್ತಿದ್ದ ಆಟೋದಿಂದ ಮಗುವನ್ನು ಎಸೆದು ತಾಯಿ ಮೇಲೆ ಗ್ಯಾಂಗ್ ರೇಪ್!

ಗುರ್ಗಾಂವ್: ಚಲಿಸುತ್ತಿದ್ದ ಆಟೋದೊಳಗಿಂದ 9 ತಿಂಗಳ ಪುಟ್ಟ ಕಂದನನ್ನು ಹೊರಗೆಸೆದ ಕಾಮುಕರು ಮಗುವಿನ ತಾಯಿ ಮೇಲೆ ಸಾಮೂಹಿಕವಾಗಿ ಅತ್ಯಾಚಾರ ಎಸಗಿದ ಪೈಶಾಚಿಕ ಕೃತ್ಯ ದೆಹಲಿ ಸಮೀಪದ ಗುರ್ಗಾಂವ್ ನಲ್ಲಿ ಸೋಮವಾರ ನಡೆದಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.

ಆಟೋದಿಂದ ಹೊರಗೆಸೆದಿದ್ದ ವೇಳೆ ಗಂಭೀರವಾಗಿ ಗಾಯಗೊಂಡಿದ್ದ ಮಗು ಸ್ಥಳದಲ್ಲೇ ಸಾವನ್ನಪ್ಪಿತ್ತು ಎಂದು ವರದಿ ಹೇಳಿದೆ. 

ಘಟನೆ ವಿವರ:
ತನ್ನ ಗಂಡನ ಜೊತೆ ರಂಪಾಟ ಮಾಡಿಕೊಂಡಿದ್ದ 29 ವರ್ಷದ ಸಂತ್ರಸ್ತೆ ಮೇ 29ರಂದು ಮಧ್ಯರಾತ್ರಿ ಪೋಷಕರ ಮನೆಯತ್ತ ಹೊರಟಿದ್ದಳು. ಅದಕ್ಕಾಗಿ ಆಕೆ ಆಟೋ ಹತ್ತಿದ್ದಳು. ಆಟೋದಲ್ಲಿ ಮೊದಲೇ ಮೂವರು ಗಂಡಸರು ಇದ್ದಿದ್ದರು ಎಂದು ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ತಿಳಿಸಲಾಗಿದೆ.

ಆಟೋದಲ್ಲಿ ಕುಳಿತುಕೊಂಡ ಸ್ವಲ್ಪ ಹೊತ್ತಿನಲ್ಲಿಯೇ ಮೂವರು ಪ್ಯಾಸೆಂಜರ್ ಆಕೆಗೆ ಕಿರುಕುಳ ಕೊಡಲು ಪ್ರಾರಂಭಿಸಿದ್ದರು. ಏತನ್ಮಧ್ಯೆ 9 ತಿಂಗಳ ಮಗು ಅಳಲು ಆರಂಭಿಸಿತ್ತು. ಇದರಿಂದ ಸಿಟ್ಟಿಗೆದ್ದ ಕೀಚಕ ಕಾಮುಕರು ಮಗುವನ್ನು ಆಟೋದಿಂದ ಹೊರಗೆಸೆದಿದ್ದರು. ಬಳಿಕ ದೆಹಲಿ ಗುರ್ಗಾಂವ್ ನಿರ್ಜನ ರಸ್ತೆಯಲ್ಲಿ ಆಕೆಯ ಮೇಲೆ ಸಮೂಹಿಕವಾಗಿ ಅತ್ಯಾಚಾರ ಎಸಗಿದ್ದರು ಎಂದು ಪೊಲೀಸರಿಗೆ ತಿಳಿಸಿದ್ದಾಳೆ.

ಕೊಲೆ ಮತ್ತು ಲೈಂಗಿಕ ಕಿರುಕುಳ ಆರೋಪದ ಪ್ರಕರಣವನ್ನು ದಾಖಲಿಸಿಕೊಂಡಿದ್ದಾರೆ. ಸಾಮೂಹಿಕ ಅತ್ಯಾಚಾರ ನಡೆಸಿರುವುದಾಗಿ ಆರೋಪಿಸಿರುವ ಮಹಿಳೆ ವೈದ್ಯಕೀಯ ಪರೀಕ್ಷೆಗೆ ಒಳಗಾಗಲು ನಿರಾಕರಿಸಿರುವುದಾಗಿ ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ಹೇಳಿದ್ದಾರೆ. ಕಳೆದ ಒಂದು ತಿಂಗಳಲ್ಲಿ ಹರ್ಯಾಣದಲ್ಲಿ ನಡೆದ 3ನೇ ಅತ್ಯಾಚಾರದ ಪ್ರಕರಣ ಇದಾಗಿದೆ.