ಮಾಜಿ ಮುಖ್ಯಮಂತ್ರಿ ಎಚ್.ಡಿ.ಕುಮಾರಸ್ವಾಮಿ ಅವರಿಗೆ ಬಿಜೆಪಿಯ ಆಂತರಿಕ ವಿಚಾರಗಳ ಬಗೆಗೆ ಮಾಹಿತಿ ನೀಡುತ್ತಿರುವವರು ಯಾರು? ಎಂಬ ಪ್ರಶ್ನೆ ಇದೀಗ ಬಿಜೆಪಿ ಪಾಳಯವನ್ನು ಕಾಡತೊಡಗಿದೆಯಂತೆ. ಬಿಜೆಪಿಯಲ್ಲಿ ಉನ್ನತ ಸ್ಥಾನಕ್ಕೆ ಟವಲ್‌ ಹಾಕಿರುವವರದೇ ಈ ಕೆಲಸ ಎಂಬುದು ನಂಬಲರ್ಹ ಮೂಲಗಳ ಮಾಹಿತಿ. ಈ ನಾಯಕರು ಕುಮಾರಸ್ವಾಮಿ ಅವರ ನಿರಂತರ ಸಂಪರ್ಕದಲ್ಲಿದ್ದು, ಪಕ್ಷದಲ್ಲಿನ ಎಲ್ಲ ಆಗು-ಹೋಗುಗಳು ಮತ್ತು ಬೆಳವಣಿಗೆಗಳ ಬಗೆಗೆ ಕ್ಷಣಕ್ಷಣದ ವರದಿ ಒಪ್ಪಿಸುತ್ತಿದ್ದಾರೆ ಎನ್ನುತ್ತಿವೆ ಈ ಮೂಲಗಳು.
ಇಷ್ಟು ಮಾತ್ರವಲ್ಲದೆ ಸರಕಾರದ ಮಟ್ಟದಲ್ಲಿ ಕೈಗೊಳ್ಳಲಾಗುವ ತೀರ್ಮಾನಗಳ ಬಗ್ಗೆಯೂ ಜೆಡಿಎಸ್‌ ನಾಯಕರಿಗೆ ಬಿಜೆಪಿ ಮುಖಂಡರೇ ತಿಳಿಸುತ್ತಿದ್ದಾರಂತೆ. ಈ ವಿಚಾರ ಬಿಜೆಪಿ ಮತ್ತು ಪಕ್ಷದ ಹಿರಿಯ ನಾಯಕರ ಪಾಲಿಗೆ ಬಿಸಿ ತುಪ್ಪವಾಗಿ ಪರಿಣಮಿಸಿದೆಯಂತೆ.
ಪಕ್ಷದ ಕೆಲವು ನಾಯಕರಂತೂ ವರಿಷ್ಠರು ಅಥವಾ ಸರಕಾರದ ಮಟ್ಟದಲ್ಲಾಗುವ ನಿರ್ಧಾರಗಳ ಬಗೆಗೆ ತಮಗೆ ಯಾವುದೇ ಮಾಹಿತಿ ಲಭಿಸದೇ ಇರುವಾಗ ಕುಮಾರಸ್ವಾಮಿ ಅವರಿಗೆ ಅಷ್ಟೊಂದು ಬೇಗ ಪಕ್ಷದ ವಿಚಾರಗಳು ಹೇಗೆತಿಳಿಯುತ್ತವೆ ಎಂದು ತಲೆಕೆಡಿಸಿಕೊಳ್ಳಲಾರಂಭಿಸಿದ್ದಾರಂತೆ.
ಪಕ್ಷದ ಆಂತರಿಕ ವಿಚಾರಗಳು ಸೋರಿಕೆಯಾಗುತ್ತಿರುವುದು ಮತ್ತು ಇದರಲ್ಲಿ ಪಕ್ಷದ ಕೆಲವು ಮುಖಂಡರೇ ಶಾಮೀಲಾಗಿರುವ ಬಗೆಗೆ ಮಾಹಿತಿಗಳು ಲಭಿಸಿದ ಬಳಿಕ ಬಿಜೆಪಿ ನಾಯಕರು ಮದ್ದು ಅರೆಯುವ ಕೆಲಸಕ್ಕೆ ಇಳಿದಿದ್ದಾರಂತೆ. ಮಾಹಿತಿ ಸೋರಿಕೆಯ ಮೂಲ ಕೆದಕುವ ಕೆಲಸ ಆರಂಭಿಸಿದ್ದಾರಂತೆ. ಈ ಎಲ್ಲ ಅಂತೆಕಂತೆಗಳ ನಡುವೆ ಈ ಮಾಹಿತಿಯೂ ಸೋರಿಕೆಯಾದದ್ದು ಹೇಗೆ? ಎಂಬುದು ಬಿಜೆಪಿ ನಾಯಕರನ್ನು ಚಿಂತೆಗೀಡು ಮಾಡಿದೆಯಂತೆ.
