ನಾವೇನು ಕೋರ್ಟಿನಲ್ಲಿ ಜೋಕ್‌ ಮಾಡ್ತಿದ್ದೀವಾ?

ಬೆಂಗಳೂರು: “ಕೋರ್ಟ್‌ ಆದೇಶಗಳೆಂದರೆ ನಿಮಗೆ ಲೆಕ್ಕಕ್ಕೆ ಇಲ್ವಾ? ಇದೇನು ಪಿಕ್‌ನಿಕ್‌ ಜಾಗಾನಾ? ನಾವೇನು ಇಲ್ಲಿ ಜೋಕ್‌ ಮಾಡ್ತಿದ್ದೀವಾ?’ ಕೆಲಸ ಮಾಡಿ ಎಂದು  ಕೋರ್ಟ್‌ ಹೇಳುತ್ತಿರುವುದು ಅರ್ಥ ಆಗುತ್ತಿಲ್ಲ ಎಂದಾದರೆ ನಿಮಗೆ ಅರ್ಥವಾಗುವ ಬೇರೆ ಭಾಷೆಯೂ ನಮಗೆ ಗೊತ್ತಿದೆ’. ಹೀಗೆಂದು ಬಿಬಿಎಂಪಿ ಅಧಿಕಾರಿಗಳನ್ನು ಮಂಗಳವಾರ ಹೈಕೋರ್ಟ್‌ ಚಾಟಿ ನೀಡಿತು.

ನಗರದ ವ್ಯಾಪ್ತಿಯಲ್ಲಿರುವ ರಸ್ತೆ ಗುಂಡಿಗಳನ್ನು ಮುಚ್ಚುವಂತೆ ಬಿಬಿಎಂಪಿಗೆ ನಿರ್ದೇಶನ ನೀಡಬೇಕು ಎಂದು ಕೋರಿ ಸಲ್ಲಿಸಲಾಗಿರುವ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ವಿಚಾರಣೆಯನ್ನು ನಡೆಸಿದ ಮುಖ್ಯ ನ್ಯಾ. ದಿನೇಶ್‌ ಮಹೇಶ್ವರಿ ಹಾಗೂ ನ್ಯಾ. ಎಸ್‌. ಸುಜಾತ ಅವರಿದ್ದ ವಿಭಾಗೀಯ ನ್ಯಾಯಪೀಠ, ಬಿಬಿಎಂಪಿಯ ವಿಳಂಬ ಧೋರಣೆ, ಅಧಿಕಾರಿಗಳ ನಿರ್ಲಕ್ಷ್ಯಕ್ಕೆ ಸಿಡಿಮಿಡಿಗೊಂಡಿತು.

ವಿಚಾರಣೆ ವೇಳೆ, ನ್ಯಾಯಪೀಠದ ಎಲ್ಲ ಪ್ರಶ್ನೆಗಳಿಗೆ “ರಸ್ತೆ ಗುಂಡಿ ಮುಚ್ಚುವ ಕೆಲಸ ನಡೆಯುತ್ತಿದೆ, ಮಾಡಲಾಗುವುದು, ಅಧಿಕಾರಿಗಳಿಗೆ ಸೂಚಿಸಲಾಗುವುದು, ಕೋರ್ಟ್‌ ನಿರ್ದೇಶನಗಳನ್ನು ಪಾಲಿಸಲಾಗುವುದು, ಕಾಮಗಾರಿ ಪೂರ್ಣಗೊಳಿಸಲು ಇನ್ನಷ್ಟು ಕಾಲಾವಕಾಶ ಬೇಕು,’ ಎಂಬ ಬಿಬಿಎಂಪಿ ಪರ ವಕೀಲರ ಹೇಳಿಕೆಗೆ ಸಿಟ್ಟಾದ ನ್ಯಾಯಮೂರ್ತಿ,

“ಎಲ್ಲದಕ್ಕೂ ನಿಮ್ಮದು ಒಂದೇ ಸಿದ್ಧ ಉತ್ತರ, ಮಾತೆತ್ತಿದರೆ ಕಾಲಾವಕಾಶ ಕೇಳುತ್ತೀರಿ. ಈ ಅರ್ಜಿ ಸಲ್ಲಿಸಿ ಮೂರು ವರ್ಷ ಆಗಿದೆ. ಕೆಲಸ ಮಾಡಿ ಎಂದು ನಾವು (ಕೋರ್ಟ್‌) ಹೇಳಿ ಆರು ತಿಂಗಳಾಗಿದೆ. ಇದೇನಾ ನೀವು ಕೆಲಸ ಮಾಡುವ ರೀತಿ, ನೀವು ಮಾಡುತ್ತಿರುವುದು ಸರಿಯೇ ಎಂದು ನಿಮ್ಮನ್ನೇ ಪ್ರಶ್ನಿಸಿಕೊಳ್ಳಿ ಎಂದರು.

ಇದೇನು ಪಿಕ್‌ನಿಕ್‌ ಜಾಗವೇ: ವಿಚಾರಣೆ ವೇಳೆ ಬಿಬಿಎಂಪಿ ಇಂಜಿನಿಯರುಗಳು ಕೋರ್ಟ್‌ ಹಾಲ್‌ನಲ್ಲಿ ಹಾಜರಿದ್ದಿದ್ದಕ್ಕೆ ಕೆಂಡಾಮಂಡಲವಾದ ಮುಖ್ಯ ನ್ಯಾಯಮೂರ್ತಿಗಳು, ” ಈ ಇಂಜಿನಿಯರುಗಳು ಇಲ್ಲೇನು ಮಾಡುತ್ತಿದ್ದಾರೆ? ಅವರನ್ನು ಇಲ್ಲಿಗೆ ಬರಲು ಹೇಳಿದವರು ಯಾರು? ಫೀಲ್ಡ್‌ನಲ್ಲಿದ್ದು ಕಾಮಗಾರಿ ನೋಡಿಕೊಳ್ಳಬೇಕಿದ್ದ ಇವರು ಕೋರ್ಟ್‌ಗೆ ಬಂದಿದ್ದಾರೆ ಎಂದರೆ ಇದೇನು (ಕೋರ್ಟ್‌) ಪಿಕ್‌ನಿಕ್‌ ಜಾಗವೇ, ಅವರೆಲ್ಲ ಇಲ್ಲಿ ಪಿಕ್‌ನಿಕ್‌ ಮಾಡಲು ಬಂದಿದ್ದಾರಾ? ನಾವೇನು ಇಲ್ಲಿ ಜೋಕ್‌ ಮಾಡ್ತಿದ್ದೀವಾ? ಎಂದು ಕಿಡಿಕಾರಿದರು. 

ಈ ವೇಳೆ ಮಹದೇವಪುರ ವಲಯದ ಮುಖ್ಯ ಇಂಜಿನಿಯರುಗಳಾದ ಪರಮೇಶ್ವರಯ್ಯ ಹಾಗೂ ಎಸ್‌. ಸೋಮಶೇಖರ್‌ ಆವರನ್ನು ನ್ಯಾಯಪೀಠದ ಎದುರು ಕರೆದ ಮುಖ್ಯ ನ್ಯಾಯಮೂರ್ತಿಗಳು, ಅವರ ಕೆಲಸದ ಬಗ್ಗೆ ವಿಚಾರಣೆ ನಡೆಸಿ ತರಾಟೆಗೆ ತೆಗೆದುಕೊಂಡರು. ಅಲ್ಲದೇ ಕಾಮಗಾರಿಗಳಿಗೆ ಸಂಬಂಧಿಸಿದಂತೆ ನೀವು ಪರಿಶೀಲಿಸಿದ ಕಡತಗಳನ್ನು ಮುಂದಿನ ವಿಚಾರಣೆ ವೇಳೆಗೆ ಹಾಜರುಪಡಿಸುವಂತೆ ಎಂದು ತಾಕೀತು ಮಾಡಿದರು.

ಡಿಸೆಂಬರ್‌ 17ರ ಗಡುವು: ವಿಚಾರಣೆ ವೇಳೆ ರಸ್ತೆ ಗುಂಡಿ ಮುಚ್ಚುವ ಕಾಮಗಾರಿಯ ಪ್ರಗತಿಯನ್ನು ಕೇಳಿದ ನ್ಯಾಯಪೀಠ, ಮಹದೇವಪುರ ವಲಯದಲ್ಲಿ ಅತಿ ಹೆಚ್ಚು ಸಮಸ್ಯೆ ಇದೆ ಎಂದು ಬಿಬಿಎಂಪಿ ಪರ ವಕೀಲರು ಹೇಳಿದ್ದಕ್ಕೆ ಡಿ.17ಕ್ಕೆ ಮಹದೇವಪುರ ವಲಯ ರಸ್ತೆ ಗುಂಡಿ ಶೂನ್ಯ ಆಗಿರಬೇಕು.

ಇದನ್ನು ನಿಮ್ಮ ಇಂಜಿನಿಯರುಗಳಿಗೆ ನಿಮ್ಮ ಭಾಷೆಯಲ್ಲಿ ತಿಳಿಸಿ, ಇಲ್ಲದಿದ್ದರೆ ಅವರಿಗೆ ಅರ್ಥವಾಗುವ ಬೇರೆ ಭಾಷೆ ನಮಗೆ ಗೊತ್ತಿದೆ. ನಿಗದಿತ ಗಡುವಿನೊಳಗೆ ಕೆಲಸ ಆಗದಿದ್ದರೆ ಅಧಿಕಾರಿಗಳು ತಕ್ಕ ಪರಿಣಾಮ ಎದುರಿಸಬೇಕಾಗುತ್ತದೆ. ಮಹದೇವಪುರ ವಲಯದ ಕೆಲಸದಲ್ಲಿ ಬೇರೆ ಕಡೆಗಳ ಕೆಲಸಗಳನ್ನು ಮರೆತು ಬಿಡಬೇಡಿ ಎಂದು ಎಚ್ಚರಿಸಿ ವಿಚಾರಣೆಯನ್ನು ಡಿ.17ಕ್ಕೆ ಮುಂದೂಡಿದರು.

ಬೆಂಗಳೂರು ಮುಚ್ಚಿಬಿಡಿ: ವಿಚಾರಣೆ ವೇಳೆ, ಬಿಬಿಎಂಪಿ ಆಯುಕ್ತರು ಕೋರ್ಟನ್ನು ಲಘುವಾಗಿ ಪರಿಗಣಿಸಿದ್ದಾರೆ. ಅವರು ಇಂದು ಯಾಕೆ ಬಂದಿಲ್ಲ ಎಂದು ಮುಖ್ಯ ನ್ಯಾಯಮೂರ್ತಿಗಳು ಕೇಳಿದರು. ವಿಧಾನಸಭೆ ಅಧಿವೇಶನ ನಡೆಯುತ್ತಿದೆ ಎಂದು ಬಿಬಿಎಂಪಿ ಪರ ವಕೀಲರು ಹೇಳಿದರು.

ಇದಕ್ಕೆ ಅಸಮಾಧಾನ ವ್ಯಕ್ತಪಡಿಸಿದ ಮುಖ್ಯ ನ್ಯಾಯಮೂರ್ತಿಗಳು, ಅಧಿವೇಶನ ನಡೆದಾಗ ಕೆಲಸಗಳು ಆಗುವುದಿಲ್ಲ ಎಂದಾದರೆ ಅಧಿವೇಶನ ಮುಗಿಯುವವರೆಗೆ ಬೆಂಗಳೂರು ಅನ್ನು ಮುಚ್ಚಿಬಿಡಿ ಎಂದು ಕಟುವಾಗಿ ಹೇಳಿದರು.