ನಾಳೆಯಿಂದ ಜೆನ್‌ ಬೀಟಾ ತಲೆಮಾರಿನ ಯುಗ!

ಹೊಸದಿಲ್ಲಿ: ಸಮಾಜದಲ್ಲಿ “ಜೆನ್‌-ಝಡ್‌’ ತಲೆಮಾರಿನ ಬಗ್ಗೆಯೇ ಮಾತುಕತೆಗಳಾಗುತ್ತಿರುವ ನಡುವೆಯೇ 2025ರ ಜ. 1ರಿಂದ ಹುಟ್ಟುವ ಮಕ್ಕಳು ಹೊಸ ತಲೆಮಾರಿಗೆ ಸೇರಲಿದ್ದಾರೆ ಎಂದು ಸಮಾಜಶಾಸ್ತ್ರಜ್ಞರು ಹೇಳಿದ್ದಾರೆ. ಈ ತಲೆಮಾರನ್ನು “ಜೆನ್‌- ಬೀಟಾ’ ಹೆಸರಿನಿಂದ ಗುರುತಿಸಲಾಗುತ್ತದೆ.

2025ರಿಂದ 2039ರವರೆಗೆ ಹುಟ್ಟುವ ಮಕ್ಕಳು ಈ ತಲೆಮಾರಿಗೆ ಸೇರಲಿದ್ದು, ಇವರಲ್ಲಿ ಬಹುತೇಕರು 22ನೇ ಶತಮಾನದ ಆರಂಭವನ್ನು ನೋಡಲಿದ್ದಾರೆ ಎಂದು ಸಮಾಜ ಶಾಸ್ತ್ರಜ್ಞ ಮಾರ್ಕ್‌ ಮೆಕ್‌ಕ್ರಿಂಡಲ್‌ ಅವರು ಹೇಳಿದ್ದಾರೆ. ಅಲ್ಲದೆ ಮುಂದಿನ 10 ವರ್ಷದಲ್ಲಿ ಜೆನ್‌- ಬೀಟಾ ತಲೆಮಾರು ಜಗತ್ತಿನ ಜನಸಂಖ್ಯೆಯ ಶೇ.16ರಷ್ಟಾಗಲಿದ್ದಾರೆ ಎಂದು ಅವರು ಹೇಳಿದ್ದಾರೆ.

ಎಲ್ಲಿಂದ ತಲೆಮಾರು ಲೆಕ್ಕಾಚಾರ ಆರಂಭ?
1925ರಿಂದ ಈ ತಲೆಮಾರು ಲೆಕ್ಕಚಾರವನ್ನು ಆರಂಭಿಸಲಾಗಿದ್ದು, 1925-45ರವರೆಗೆ ತಲೆಮಾರನ್ನು “ಬಿಲ್ಡರ್‌’, 1946- 64ರವರೆಗಿನ ತಲೆಮಾರನ್ನು “ಬೂಮರ್’, ಇದಾದ ಬಳಿಕ 1965-80 “ಜೆನ್‌-ಎಕ್ಸ್‌’, 1981-1994 “ಜೆನ್‌-ವೈ’, 1995-2009 “ಜೆನ್‌-ಝಡ್‌’, 2010-2024ರ ನಡುವಿನ ತಲೆಮಾರನ್ನು “ಜೆನ್‌ ಆಲ್ಫಾ’ ಎಂದು ಗುರುತಿಸಲಾಗುತ್ತದೆ.

ಹೊಸ ತಲೆಮಾರಿನ ಮಕ್ಕಳನ್ನು ಬೀಟಾ ಬೇಬೀಸ್‌ ಎಂದು ಗುರುತಿಸಲಿದ್ದು, ಇವರು ಯುವ ಜೆನ್‌-ವೈ ಮತ್ತು ಹಿರಿಯ ಜೆನ್‌-ಝಡ್‌ನ‌ ಮಕ್ಕಳಾಗಿರಲಿದ್ದಾರೆ ಎಂದು ಮೆಕ್‌ಕ್ರಿಂಡಲ್‌ ಹೇಳಿದ್ದಾರೆ.

ಎಐ ಜತೆಗೆ ಬೀಟಾ ಬೇಬಿ ಬೆಳವಣಿಗೆ
ತಂತ್ರಜ್ಞಾನ ಸಾಕಷ್ಟು ಮುಂದುವರಿದಿದ್ದು, ಜೆನ್‌- ಬೀಟಾ ತಲೆಮಾರಿನ ಮಕ್ಕಳು ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನದ ಜತೆಗೆ ಬೆಳವಣಿಗೆ ಹೊಂದಲಿದ್ದಾರೆ. ಈ ಮಕ್ಕಳ ಕಾಲದಲ್ಲಿ ಜೀವನದ ಪ್ರತಿಯೊಂದು ಘಳಿಗೆಯನ್ನು ಎಐ ವಶಪಡಿಸಿಕೊಳ್ಳಲಿದೆ. ಇವರ ಶಿಕ್ಷಣ, ಆರೋಗ್ಯ, ಕೆಲಸ ಎಲ್ಲವನ್ನೂ ಎಐ ನಿರ್ಧಾರ ಮಾಡಲಿದೆ ಎಂದು ಅವರು ಹೇಳಿದ್ದಾರೆ.